Yehova Wamukiñili Yesu

Mwituña dakumusela waIsarela, mwadiña antu akuhweleleli nawu tutumbwa tunateli kuyilombola. Ifuku dimu nawufuku, kwadiña amayala aKumusela amweni chuma chamwekeneña neyi katumbwa katoñeka chinakwenda muluzwizu nawa achilondeleli. Aka “katumbwa” kayilombweli kuYerusalema. Awa amayala atachikili kwihula antu nawu: ‘Indi owu mwana wakekala mwanta wawaYudeya wudi kudihi? Tunenzi nakudifukula kudi yena.’

Herodi, mwanta wakuYerusalema, chatiyiliyi nsañu yamwanta wamuha, wakameneni nankashi. Wayihwili akulumpi jawatupristu nindi: ‘Iwu Mwanta wateleleli kuvwalikila kudihi?’ Amwakwili nawu: ‘Atuprofwetu ahosheli nawu wakavwalikila muBetelemi.’ Dichi Herodi watambikili amayala akumusela nakuyileja nindi: ‘Yenu kuBetelemi mwakamukeñakeñi iwu mwana. Mwakafunti nakunleja kudiyi. Ninami inakukeña kudifukula kudi yena.’ Ilaña watwambileña.

Aka “katumbwa” katachikili cheñi kwenda. Awa amayala akilondeleli nakushika kuBetelemi. Kemeni hewulu detala nawa eñilili mukachi. Amuwanini Yesu namama yindi Mariya. Adifukwili kudi iwu mwana nawa amwinkeli yawaana yawuru, manaña evumba dadiwahi nimora. Komana Yehova diyi watemesheli awa amayala kuya nakumukeñakeña Yesu? Inehi.

Hawowuna wufuku, Yehova wamulejeli Yosefu muchilota nindi: ‘Herodi nakukeña kumujaha Yesu. Sendaku ñodeyi nimwaneyi mutemukili kuEjipitu. Wakashakami kwenoku, sampu nakuleji nami funtaku.’ Hohenohu, Yosefu nichisaka chindi ayili kuEjipitu.

Yehova walejeli awa amayala aKumusela nindi abuli kufunta kudi Herodi. Herodi chamweniyi nindi anakufunta wanyi, wahilili nankashi. Chineli hamuwanini Yesuku, wahanini lushimbi lwakujaha anyana anyanya awamayala ejima amuBetelemi adiña nayaaka yoyimu naYesu. Ilaña Yesu wapulukili, muloña wadiña kuEjipitu.

Mukuhita kwampinji, Herodi wafwili. Yehova wamulejeli Yosefu nindi: ‘Ichi dinu funtaku.’ Yosefu, Mariya niYesu afuntili kuIsarela nawa ashakamini mumusumba waNazareta.