MPANJI 103
Mukachi kaKapeka kaKwenzela
HANYIMA yakwila Petulu naYowanu anafumi dehi kwijamu kwadiña mujimba waYesu, amushili Mariya kuna nkawindi. Hakutachika kudila. Dichi hakunoñama nakutala mukachi kejamu, neyi chitwamona hamwevulu wakukumishaku. Mwenamuna hakumona añelu ayedi! Hiyakumwihula nawu: ‘Wunakudiladi?’
Mariya hakwakula nindi: ‘Anamufumishimu dehi Mwanta wami, nawa hineluki kunamwinkiwuku.’ Mariya chineliyi nindi yabalumuki, hakumona muntu. Owu muntu hakumwila nindi: ‘Wunakukeñanyi?’
Mariya hakutoñojaka nindi iwu muntu hindimi wetempodu, nawa nindi hadaha diyi wunasendi mujimba waYesu. Hakuhosha nindi: ‘Neyi yeyi wunamusendi, nleji kuwunamwinki.’ Ilaña iwu muntu diyi Yesu. Wudi namujimba wunabuli kwilukayi Mariya. Ilaña chinamutambikiyi hejina, Mariya hakwiluka nindi diyi Yesu. Hakutemuka nakuleja atumbanji nindi: ‘Namumoni Mwanta!’
Chikuneli mwaana, henohu atumbanji ayedi anakuya kumukala waEmawusi, iyala wumu hakuya nawu. Atumbanji ananeñi nankashi muloña Yesu anamujahi. Ilaña chadiña nakuyawu, iyalowu hakulumbulula yuma yayivulu yamuBayibolu yinayileteshi kutiya kuwaha. Nkumininaku, chiyanemaniwu nawu adyi yakudya, atumbanji hiyakwiluka nawu iwu iyala diyi Yesu. Hohenohu Yesu hakujimbala, dichi awa atumbanji ayedi hiyakufunta lufuchi kuYerusalema nakuyileja apostolu hadi Yesu.
Henohu yumiyi yinakuzatika, Yesu hakumwekana cheñi kudi Petulu. Amakwawu hiyakutiya kuwaha hakutiya iyi nsañu. Hakwila awa atumbanji ayedi hiyakuya kuYerusalema nakuyiwana apostolu. Hiyakuyileja niwena chayimwekenayi Yesu hanjila. Henohu achidi kushimuna iyi nsañu, wuneluki chuma chakuhayamisha chinamwekani?
Talaku hamwevulu. Yesu hakumwekana mwenamuna mwitala, hela chakwila ipitu dakwenzela. Owu muzañalu wunatiyiwu atumbanji! Komana idi hifuku damuzañaluku? Ichi wunatweshi kuchinda mapampa kañahi Yesu kanamwekaniyi kudi atumbanji twindi? Wunachindi mapampa katanu?
Kapostolu Tomasi hadi nawu hanamwekaniyi Yesuku. Dichi atumbanji hiyakumuleja nawu: ‘Tunamumoni Mwanta!’ Ilaña Tomasi hakuhosha nindi chiña yamumoni Yesu yomwenindi henohu kanda yeteji. Chachiwahi, chimunahiti mafuku atanu nasatu apostolu adi wejima wawu mukapeka kakwenzela, hayinu mpinji niTomasi wudi nawu. Hohenohu, Yesu hakumwekana mwenamuna mukapeka. Ichi dinu Tomasi hakwiteja.
Yowanu 20:11-29; Luka 24:13-43.