MPANJI 102
Yesu waMumi
WUNAMWILUKI iwu mumbanda ninawa amayala ayedi? Iwu mumbanda diyi Mariya Mandaleni, ibwambu daYesu. Awa amayala anavwali yikovwelu yitooka diwu añelu. Imu mukapeka kanyanya munakutalayi Mariya dimwashiliwu mujimba waYesu hafwiliyi. Atenañamu nawu mwijamu. Ilaña mujimba mwosiwu! Wawusendeli hinyi? Tutalenu ntahi.
Chelili Yesu nafwi dehi, atupristu hiyakumuleja Pilatu nawu: ‘Henohu Yesu wuchidi wamumi wahosheli nindi akamusañula hanyima yamafuku asatu. Dichi ilenu kulonda ahembi ijamu. Muloña atumbanji twindi abuli kwiya mujimba windi nakuhosha nawu anamusañuli mudi afu!’ Pilatu hakuleja atupristu kulonda atemeshi amashidika akuhemba ijamu.
Ilaña nabudidi nankashi hefuku damuchisatu hanyima yakufwa kwaYesu kañelu kaYehova hakwinza. Hakulañumuna ilola kwijamu. Amashidika hiyakutiya woma chakwila hiyakukañanya nikwenda. Nkumininaku, chaneliwu nawu atali mukachi kejamu, mujimba mwosiwu! Amashidika amakwawu hiyakuya mumusumba nakuyilejamu atupristu. Wuneluki chineliwu atupristu atama? Hiyakufweta amashidika kulonda atwambi. Atupristu hiyakuleja amashidika nawu, ‘Muhoshi nenu atumbanji twindi enza nawufuku henohu twakaama, hiyakwiya mujimba.’
Muyenoyu mpinji, amabwambu jaYesu awambanda amakwawu hiyakwinza nakuhempula kwijamu. Ochahayaminiwu hakwila awani mwosi mujimba! Hohenohu añelu ayedi anavwali yikovwelu yinakukejima hiyakumwekana. Hiyakwihula nawu, ‘Muloñadi chimunakumukeñela Yesu kunu? Anamusañuli dehi. Endeshenu, yenuña mukayileji atumbanji twindi.’ Olufuchi lwatemukiliwu ambanda! Chafuntileñawu muntu wumu hakuyimika. Wunamwiluki iwu muntu? Yesu diyi! Hakuhosha nindi, ‘Yenu mukayileji atumbanji twami.’
Chineli ambanda ayileji atumbanji nawu Yesu wamumi nawa anadimoni nindi, atumbanji hichikuyikalila hakwila nawu eteji. Petulu naYowanu hiyakutemukila kwijamu kulonda adimweni awenawu, ilaña kuwana mwijamu mwosi mujimba! Chelili Petulu naYowanu anayi dehi, Mariya Mandaleni hakushala munyima. Diyi mpinji yinataliyi mukachi nakumona añelu ayedi.
Wuneluki chuma chamwekeni kumujimba waYesu? Nzambi wawujimbañesheli. Nzambi hamusañwili Yesu namujimba wawuntu wafwiliyi nawuku. Wamwinkeli Yesu mujimba wawuha wakuspiritu, neyi wukweti añelu mwiwulu. Ilaña hakwila yadimwekeshi kudi atumbanji twindi nindi wamumi, Yesu hakuvwala mujimba wunatweshi kumonawu kudantu, neyi chitukudiza.
Matewu 27:62-66; 28:1-15; Luka 24:1-12; Yowanu 20:1-12.