Añelu adiKañili muWanta wawaSpiritu
Chelili Satana yazatishi kapela kuhosha naEvu, Evu wadibombeli naSatana hakudikaña naNzambi
Antu akuspiritu ejima yaleñeluwu kudi Yehova adiña aloña. Kufumahu kañelu wumu wekalili watama. Diyi Satana Diyabolu. Satana wakeñeleña nindi antu ahamaseki adifukuleña kudi yena chatela kudifukula kudi Yehova. Chuma chazatikili dichi iche:
Mwitempa daEdeni mwadiña nyitondu yayivulu yasoñeleña nyikabu yayiwahi. Yehova walejeli Adama niñodindi Evu nindi, atela kudya mwanakeñeluwu kunyitondu yeniyi. Ilaña kwadiña mutondu wumu wahosheliyi Nzambi nindi, bayi adya kwoku. Wahosheli nindi, neyi adya kuwuna mutondu, chalala akufwa.—Kutachika 2:9, 16, 17.
Ifuku dimu Evu wadiña nkawindi helili kapela yamuhosheshi. Hela chochu, bayi neyi kapela diyi wahosheluku; Satana Diyabolu diyi welishili kapela kumwekana neyi nakuhosha. Satana wamulejeli Evu nindi neyi wukudya mukabu wayikanishiluwu, wukwikala namaana neyi aNzambi. Wahosheli cheñi nindi Evu hakafwaku. Nsañu yejima yashimwiniyi Satana yadiña yakutwamba. Ilaña Evu wamukuhweleleli Satana nawa wadyili kumukabu. Kufumahu, wamwinkeluku Adama, niyena hakudya.—Kutachika 3:1-6.
Tunateli kudizila kuniyi nsañu yalala netu, Satana himukwakudikaña nawa hintwambi. Satana wamulejeli Evu nindi neyi yadikaña naNzambi, hamba kafwaku. Awa mazu adiña akutwamba. Adama niEvu afwili. Hayina mpinji Satana hafwiluku, ilaña wamba kafwa muloña wavulumwini. Hela chochu, chayinu mpinji wuchidi wamumi nawa watwalekañahu kudimba muchidi wamuntu. Satana wuchidi ntwambi nawa wakeñaña kweseka antu kulonda afumpi nshimbi jaNzambi.—Yowanu 8:44.
Añelu Amakwawu Anadikañi
Chimwahitili yaaka, añelu amakwawu alumbukili. Awa añelu amweni ambanda alubanji hamaseki, dichi akeñeli kwila nawu wuvumbi. Dichi enjili hamaseki nakuvwala nyijimba yawantu awamayala. Asumbwili ambanda. Chumichi chadiña chambuka nankeñelu yaNzambi.—Kutachika 6:1, 2; Yuda 6.
Añelu atama enjili hamaseki nakwila wuvumbi nawambanda
Chumichi chaleteli kukala hadi muchidi wamuntu. Añodi janawa añelu avweli anyana, ilaña hiyadiña neyi chekala nyana yejimaku. Akulili nakwikala ataluka chikupu, akwamadombu nawa awukatu. Nkumininaku hamaseki henzeli madombu chakwila Yehova wafukwiluhu kujilumuna antu atama nadibaji deneni. Antu ahandili hohu haDibaji hiNowa waloña nichisaka chindi.—Kutachika 6:4, 11; 7:23.
Hela chochu, añelu atama hiyafwiluku; afuntili muwanta wawaspiritu. Ilaña ayibabesheli. Hiyayitejeli kwikala cheñi muchisaka chaNzambi chawañelu aloñaku. Cheñi nawa, Yehova hayitejeli kuvwala nyijimba yawuntuku. Nkumininaku, amba kafwa hakusompesha kweneni.—2 Petulu 2:4; Yuda 6.
Satana Amunatili Kufuma Mwiwulu
Satana niandemoni jindi atama ayinatili kufuma mwiwulu
Kukutachika kwayaaka yetu nkulakaji, mwiwulu mwadiña njita. Mukanda wamuBayibolu waChimwekeshu walumbulula chamwekeni: “Mwiwulu himukwila njita; Mikeli [Yesu Kristu wasañukili] nawañelu jindi [aloña] hiyakwasa njita nanowu chazañombi [Satana]; chazañombi niyena nawañelu jindi [atama] nawa hiyakwasa; kwimika mushindu nehi; mwiwulu himwamwekeni nawa cheñi mwakushakama wenaku. Owu chazañombi muneni hiyakumunatila heseki; yowu kapela mukulu atenañawu nawu Diyabolu, diyi Satana, wadimbaña antu ampata yamunu mwishina ejima. Yena hiyakumunatila hamaseki, niañelu jindi [atama] hiyakuyinatila hamu nayena.”
Chumanyi chafuminumu? Nsañu yatwalekahu nawu: “Dichi enu mawulu, zañalalenu, ninenu mwashakamamu.” Añelu aloña azañaleli muloña Satana niañelu atama hela aspiritu, hiyadiña cheñi mwiwuluku. Chumanyi chamwekeneni antu ahamaseki? Bayibolu yahosha nawu: ‘Oyihuñu yakamona iseki nakaluñalwiji! Muloña Diyabolu nayisulukili, wudi nandombu yayeni, chanelukiyi nindi kunashali dehi mpinji yindi yantesha hohu.’—Chimwekeshu 12:7-9, 12.
Chalala, Satana nialundanindi atama anakudimbana nikuleta yihuñu yamaneni kudi antu hamaseki. Añelu atama wenawa ayitenaña nawu andemoni. Hiyayilumbu jaNzambi. Wejima wawu atama.