Adama naEva Hiyamwovwahilili Nzambiku

Ifuku dimu Eva hadiñayi nkawindi, kapela wahosheli nayena nindi: ‘Komana mwalala Nzambi nayikaanishi kuda kunyitondu yejima?’ Eva wahosheli nindi: ‘Tunateli kuda kunyitondu yejima kufumishaku hohu mutondu wumu. Neyi tuda kunyikaabu yaniwu mutondu, twakafwa.’ Kapela wahosheli nindi: ‘Mwakafwa wanyi. Nawa neyi mudaku, mwakekala neyi Nzambi.’ Komana mwahosheliyi diimu? Inehi, watwambili. Ilaña Eva wetejeli. Eva welileña chatalayi mukaabu, mpwila yakuwida niyena hiyikuswejelaku. Wadiili mukaabu nawa wamwinkelihu niAdama. Welukili nindi neyi abula kumwovwahila Nzambi akufwa. Ilaña Adama niyena wadiili.

Chimwahitili mpinji hadodina ifuku, Yehova wahosheli naAdama niEva. Wayihwili chaletesheli abuli kumwovwahila. Eva wahosheli nindi kapela diyi, Adama niyena nindi Eva diyi. Chineli aAdama naEva akaanini kumwovwahila Yehova, wayifumishili mwitempa. Hakwila abuli kufunta cheñi, washili añelu nimpoku yakabali yakesi kuwiñililu.

Yehova wahosheli nindi owu wamudimba Eva niyena atela kumubabesha. Bayi neyi kapela diyi wahosheli naEvaku. Yehova haleñeli tupela twahoshañaku. Kañelu watama diyi wakojejeli kapela ahoshi. Wakeñeleña kumudimba Eva. Ona kañelu amutenaña nawu Satana Diyabolu. Kumbidi, Yehova wakamukisañana Satana kulonda akabuli cheñi kuluwañesha antu nakwila yuma yatama.