DIZISHENU ANYANENU

Nzambi Waneñaña—Chitunateli Kumuzañalesha

Akuneñeshahu dehi chikupu chakwila wutachika nikudila?—a Hadaha wonsu wetu atuneñeshahu dehi. Mpinji jikwawu, twadilaña muloña wakuneña. Hadaha kudi muntu wunatutwambili. Chumichi chinateli kukuneñesha, netu?— Nzambi niyena waneñaña nansañu yamutwambilañawu. Tuhanjekenu haniyi nsañu kulonda twiluki chitunateli kumuzañalesha Nzambi bayi kumuneñeshaku.

Bayibolu yatulejaña nawu antu ahosheli nawu amukeña Nzambi ‘amukatishili.’ ‘Amuneñesheli’ Nzambi. Ilaña, kwosi muntu wunateli kukatisha mujimba waYehova Nzambi. Muloña yena wayibadika ñovu nankashi. Tutalenu chaneñelañayi Yehova neyi tubula kwila yuma yatulejañayi.

Antu akusambila ayedi aleñeliyi Yehova hamaseki amuneñesheli nankashi. Awantu ayedi ayishili muParadisa hamaseki yatenañawu nawu ‘itempa daEdeni.’ Awa antu ayedi adiña anyi?— Wadiña Adama, nkumininaku niEvu. Tutalenu hachuma cheliluwu chamuneñesheli Yehova.

Chelili Yehova nayishi dehi mwitempa, wayilejeli nindi ahembeña itempa. Wayilejeli cheñi nindi anateli kuvwala nyana nakushakama hamu mwitempa chakadi kufwa. Henohu Adama naEvu kanda avwali anyana, kwamwekeni chiluwa cheneni nankashi. Wunachiluki ntahi?— Kañelu wamwilili Evu niAdama nindi adikañi naYehova. Tutalenu yuma yamwekeni.

Iwu kañelu waleñeleli inoka hela kapela yamwekani neyi nakuhosha. Nsañu yamulejeluwu Evu yamutiyishili kuwaha—kapela wahosheli nindi Evu wukwikala “neyi chadiyi Nzambi.” Dichi Evu welili mwamulejeluwu kudi kapela. Wuneluki chuma cheliliyi?—

Evu wadiili kumutondu wamulejeluwu Adama kudi Yehova nindi bayi yakadya kwokuku. Henohu Nzambi kanda yaleñi Evu, wamulejeli Adama nindi: “Nyitondu yamwitempa yejima wukudya tuhu; ilaña mutondu wakwiluka nachu niyayiwahi niyatama eyi bayi wakawidyaku; muloña ifuku diwakadya chalala wakafwa.”

Evu welukili ilu lushimbi. Hela chochu, watwalekeluhu nakutala iwu mutondu nawa wawumweni nindi “wunawahi wakudya, kuwutala wakutiyisha kuwaha . . . , hakukumunaku ninyikabu, hakudya.” Nkumininaku, yomwinkahu niAdama nyikabu, “niyena hakudya.” Muloñadi chadyililiyi?— Muloña Adama waswejeli kumukeña Evu kubadika Yehova. Wakeñeli kumuzañalesha ñodindi kubadika kumuzañalesha Nzambi. Ilaña kumwovwahila Yehova kwalema nankashi kubadika kwovwahila antu.

Wunamwiluki inoka hela kapela wahosheli naEvu? Chochelishañayi muntu kadoli kamwekaneña neyi kanakuhosha, kudi muntu welishili kapela kamwekaneña neyi kanakuhosha. Izu danyi dafumineña mukanwa kakapela?— Dadiña izu ‘dakapela mukulu atenañawu nawu Diyabolu, diyi Satana.’

Wuneluki chiwatela kumuzañalesha Yehova?— Wunateli kumuzañalesha neyi wukumwovwahilaña mpinji yejima. Satana wahoshaña nindi nateli kuhuñumuna antu ejima kulonda akoñeña yuma yakeñañayi. Ilaña Yehova nakutukonkomwena nindi: “Eyi mwanami, ikalaku mukwamaana, wutiyishaña muchima wami kuwaha, kulonda nakatweshi kwakula muntu wukunsawula.” Satana wamusawulaña hela kumusupisha Yehova. Wahoshaña nindi nateli kukañesha antu ejima kumukalakela Nzambi. Dichi mwovwahilenuña nikumukalakela Yehova kulonda mumuzañalesheña. Wunatweshi kwila mwenimu?—

Tañenu muBayibolu yenu

Masamu 78:40, 41

Kutachika 1:26-28; 2:15-17; 3:1-6

Chimwekeshu 12:9; Yishimu 27:11

[Tumazu twaheshina]