Kudiza 4

Diyabolu Hinyi?

Satana Diyabolu—wafumini kudihi? (1, 2)

Satana wayidimban̂a n̂ahi antu? (3-7)

Mulon̂adi wunateleli kumukan̂esha Diyabolu? (7)

1. Izu dakwilanawu “diyabolu” dalumbulan̂a muntu washimunan̂a yatama yakutwambila muntu mukwawu. “Satana” dalumbululan̂a chilumbu hela mukwakudimbulula. Awa diwu majina amwinkawu ona chilumbu muneni waNzambi. Hatachi, wadin̂a kan̂elu walon̂a wadin̂a hamu naNzambi mwiwulu. Helachochu, nkumininaku watachikili kuditon̂ojokela yomweni nikuken̂a kulomba kuna kwadin̂i hohu kwaNzambi.—Matewu 4:8-10.

2. Yena kan̂elu iwu, Satana, wahosheli na Evu kuhitila mukapela. Hakumuleja jakutwamba, wamulen̂eleli kubula kovwahila Nzambi. Muniyinjila Satana walotokeleli ha “wanta” waNzambi, hela chifulu Chayomwini Wabadika. Satana wajinokeli kwilaneyi kuyula kwaNzambi diku kwabadikahu kuwaha nawa dikwaken̂awu uwo Ayulan̂ayi. Satana nawa wajinokeli neyi kwiji kwatela kwikalaku muntu wudi wejima wukwikala walala kudi Nzambi. Hakuzata mwejimimu, Satana wadilen̂eli yamweni kwikala chilumbu na Nzambi. Dihu hafumini kumutena nawu Satana Diyabolu.—Kutachika 3:1-5; Yoba 1:8-11; Chimwekeshu 12:9.

3. Satana wesekan̂a kudimba antu kulonda amulomben̂a yena. (2 Akorinda 11:3, 14) Njila yimu mwadimbilan̂ayi antu yekala kuhitila mukwitiya kwakutwamba. Neyi oku kwitiya kwatan̂ishan̂a yakutwamba kutalisha kudi Nzambi, chalala kunakuzatila kufuukula kwaSatana. (Yowanu 8:44) Antu ekala mukwitiya kwakutwamba akudikuhwelela nawu alomban̂a Nzambi walala. Ilan̂a anakuzatila Satana. Diyi ‘nzambi wayinu mpata.’—2 Akorinda 4:4.

4. Kupesha hinjila yikwawu Satana yakokwelamu antu kun̂ovu jindi. Anatweshi kutambika akishi kukudijikilila aweni, hela kukukatisha akwawu, hela kushimuna jakumbidi, hela kuzata yihayamisha. Satana diyi wahanan̂a n̂ovu yakuzata yuma yejima iyi. Hakwila nawu tumuzan̂aleshi Nzambi, twatela kwambuka kunjila jejima ja kupesha.—Kuhituluka 18:10-12; Yililu 19:18, 19.

5. Satana waluwan̂eshan̂a nawa antu kuhitila mukudivwimba nekowa ni kusha maana munsan̂u ya matun̂a nachuyulu. Amakwawu aton̂ojokan̂a nawu muza wawu hela ikowa dawu dabadika akwawu. Ilan̂a hidimuku. (Yililu 10:34, 35) Antu amakwawu ashindamena hansan̂u yamatun̂a na chiyulu kukumanisha makabi awantu. Hakuzata mwenimu, anakukana Wanta waNzambi. Diwu hohu wakakumisha makabi etu.—Danyeli 2:44.

6. Njila yikwawu Satana yaluwan̂eshelan̂amu antu yekala kuyeseka na kufwila yuma yanshidi. Yehova watulejan̂a kutondolwela nyidimu yanshidi mulon̂a weluka nindi yikutukatisha. (Aŋalija 6:7, 8) Antu amakwawu akufwila nawu wuyilondelan̂a muyililu yidi neyi yenoyu. Helachochu, anukaku neyi, Satana diyi nakuken̂a nindi wili yumoyu.—1 Akorinda 6:9, 10; 15:33.

7. Satana watwesha tuhu nikuzatisha makabisha hela wulumbu kulonda eyi wufumi kudi Yehova. Amabwambu jeyi amakwawu akukuhilila mulon̂a nanochu wunakudiza Bayibolu. Amakwawu anatweshi tuhu nikukulen̂ulula. Ilan̂a kudinyi okuwafumishili wumi weyi? Satana nakuken̂a hohu kukutiyisha woma kulonda wuleki kudiza kumwiluka Yehova. Bayi wuleki Satana ashindiku! (Matewu 10:34-39; 1 Petulu 5:8, 9) Neyi wukumukan̂esha Diyabolu, wukumutiyisha Yehova kuwaha ni kumwekesha nawa neyi walemesha wanta Windi.—Yishimu 27:11.

[Nyevulu yidi hefu 9]

Kwitiya kwakutwamba, kupesha, nichambu chanyuza yaluwan̂esha antu

[Mwevulu wudi hefu 9]

Kanenu Satana, nakutwaleka kudiza kumwiluka Yehova