Kudiza 10
Yililu Yahelayi Nzambi
Watela kutiyan̂ahi hayuma yatenayi Nzambi nindi yatama? (1)
Kuhuman̂ana kwa nyichidinyi kwekala kwahen̂a? (2)
Mukwa Kristu watela kumona n̂ahi yililu yakutwamba? (3) yisela ya lwisu? (3) kwiya? (3) kuzuwa? (4) kupesha? (5) kushetasheta? (6)
Munjilanyi muntu mukutweshelayi kwambuka kuyililu yatama? (7)
1. Ambun̂a Nzambi aken̂a yuma yalon̂a. Ilan̂a atela nawa kudiza kuhela yuma yatama. (Masamu 97:10) Chinakubalumuna kutondwelela yililu oyu yahelayi Nzambi. Hiyililunyi oyu?
2. Wuvumbi: Kuhuman̂ana henohu wuluwi kanda, wusenji, kuditamisha nakanyama, ni wutumwa yejimiyi hinshidi yamaneni yakuvulumuna kudi Nzambi. (Alevi 18:6; Aroma 1:26, 27; 1 Akorinda 6:9, 10) Neyi adimuwuluwi anakushakama hamu ilan̂a hiyadisumbulaku, atela kwambuka neyi nehi adisumbuli mu nshimbi.—Aheberu 13:4.
3. Kutwamba, Yisela ya lwisu, Kwiya: Yehova Nzambi hatwamban̂aku. (Titusa 1:2) Muntu nakuken̂a kumutambwila watela kuleka kutwamba. (Yishimu 6:16-19; Akolose 3:9, 10) Yisela yejima yalwisu yenzan̂a na kababa. Komana akwa Kristu hiyen̂ilan̂a muyisela yidi yejima yalwisuku. Yidi neyi kweseka kwa kutokwa, kutemuka natuwalu nikuta njuka. (Aefwesesa 5:3-5) Nawa akwa Kristu hiyeyan̂aku. Hiyalandan̂a chuma chanelukiwu nawu chakwiyaku hela kusenda kwakubula kulombaku.—Kwidika 20:15; Aefwesesa 4:28.
4. Kuzuwa, Madombu: Kuzuwa kwakubula kudiyula kwaletan̂a kuzun̂a ndombu. (Kutachika 4:5-8) Muntu wamadombu hanatweshi kwikala mulunda na Nzambiku. (Masamu 11:5; Yishimu 22:24, 25) Chekala chaluwa kuditenda hela kufuntisha katama ha katama oku kanatwiliwu amakwawu.—Yishimu 24:29; Aroma 12:17-21.
5. Kupanda ni Kupesha: Antu amakwawu apeshelan̂a akishi kulonda ayinki n̂ovu yakuka nachu yikatu. Amakwawu akayan̂a ayilumbu jawu na kuyiletela yikatu hela kuyijiha. Novu yakwila yuma yejima iyi yafuman̂a kudi Satana. Komana akwa Kristu hiyatelela kuwanika muyuma yejimiyiku. (Kuhituluka 18:9-13) Kushakama kwakwihi na Yehova dichiswamu chachiwahi chakukan̂esha wan̂a wakumbilawu antu amakwawu hadi etu.—Yishimu 18:10.
6. Kusheta: Hichekala chahen̂a kunwa tuvinyu twanti, tuwalwa hela yakunwa yekwawu yashetanaku. (Masamu 104:15; 1 Timotewu 5:23) Ilan̂a kusweja kunwa nikusheta kwekala kwaluwa ku mesu aNzambi. (1 Akorinda 5:11-13; 1 Timotewu 3:8) Kunwa walwa wawuvulu kunatweshi kukisan̂ana kuhanda cheyi ni kusanda chisaka cheyi. Kunatweshi nawa kukutwala swayi mukweseka kukwawu.—Yishimu 23:20, 21, 29-35.
7. Muntu welan̂a yuma yatenayi Nzambi nindi yatama “hamba kaswana Wanta wa Nzambiku.” (Aŋalija 5:19-21) Neyi chalala wamuken̂a Nzambi nawa wunakuken̂a kumutiyisha kuwaha, watela kwambuka kuyililu yatama. (1 Yowanu 5:3) Ilukaku kuhela yuma yatenayi Nzambi nindi yatama. (Aroma 12:9) Dikundi na wantu akweti yililu yawuNzambi. (Yishimu 13:20) Wulunda na wakwa Kristu ashikahu diyi insulu yakukwasha. (Yakoba 5:14) Sweje-e, shindamenaku hadi Nzambi kuhitila mukulomba.—Afwilipi 4:6, 7, 13.
[Nyevulu yidi hefu 20, 21]
Nzambi wahela kusheta, kwiya, yisela yalwisu, ni madombu