Kudiza 11

Tuheka na Tushidikilu twa Munen̂eshan̂a Nzambi

Muchidinyi wa tuheka na tushidikilu twekala twahen̂a? (1)

Komana akwa Kristu atela kukuhwelela nawu kwekala aNzambi Asatu? (2)

Mulon̂adi akwa Kristu alala chabulilan̂awu kwila chawija cha Krisimansi, Esita, hela ifuku dakusemuka? (3, 4)

Komana afu atesha kukatisha amomi? (5)

Indi Yesu wafwilili hamusalaba? (6)

Chekalan̂ahi chalema kumuzan̂alesha Nzambi? (7)

1. Bayineyi tuheka natushidikilu twejima twatamaku. Ilan̂a Nzambi hatwitijan̂aku neyi chakwila twafuma mukwitiya kwa kutwamba hela twambuka nakutan̂isha kwa Bayibolu.—Matewu 15:6.

2. Wunzambi Wusatu: Komana Yehova wekala Musatu—antu asatu mudi Nzambi wumu? Nehi! Yehova, Tata, diyi “Nzambi walala wumu hohu.” (Yowanu 17:3; Maku 12:29) Yesu diyi Mwanindi wa wedi, nawa wadizoza kudi Nzambi. (1 Akorinda 11:3) Tata yawantu wabadika hadi Mwana. (Yowanu 14:28) Spiritu wajila himuntuku, hin̂ovu ya Nzambi.—Kutachika 1:2; Yililu 2:18.

3. Krisimansi na Esita: Yesu wasemukili ha December 25 wanyi. Wasemukili kukamwihi na October 1, diyi mpinji yabulilen̂a atubin̂a kuleta yimuna yawu mumatan̂a nawufuku. (Luka 2:8-12) Yesu hayikambijili atumbanji twindi kwanakana ifuku dakusemuka kwindiku. Ilan̂a, wayilejeli atumbaji twindi kwanukan̂a hela kuvuluka, kufwa kwindi. (Luka 22:19, 20) Krisimansi hamu nitushidikilu twayu jafuma mukwitiya kwakutwamba kwanyaka ya munyima. Hohamu tuhu ni tushidikilu twa Esita, twafwana neyi kuzatisha mateta ni tululu. Akwa Kristu atachi hiyadin̂a nakudya chawija cha Krisimansi hela Esitaku, hohamu tuhu nakwa Kristu alala mumafuku alelu.

4. Mafuku akusemuka: Kwanakana kwamafuku akuvwalika kuyedi hohu kwashimunawu muBayibolu kwadin̂i kwa wantu abulilan̂a kumulomba Yehova. (Kutachika 40:20-22; Maku 6:21, 22, 24-27) Akwa Kristu ahatachi hiyadin̂i nakwanakana mafuku akuvwalikaku. Tushidikilu twa kwanakana mafuku akuvwalika twafuma kunyima ku kwitiya kwa kutwamba. Akwa Kristu alala ahanan̂a yawana ni kuzan̂alala hampiji jikwawu muchaka.

5. Kuchina Afu: Afu hiyanatweshi kwila chuma chidi chejima hela kutiya chuma chejimaku. Hitunatweshi kuyikwashaku, hela wena hiyanatweshi kutukatishaku. (Masamu 146:4; Mukwakutaŋisha 9:5, 10) Wumi wafwan̂a; hiwatwalekan̂a kwikalaku hanyima yakufwaku. (Ezekeli 18:4, NW) Ilan̂a mpinji yikwawu an̂elu atama, atenan̂awu nawu ademoni, adimwekeshan̂a kwikala nyijimu. Tushidikilu tudi twejima twa kuchinan̂a hela kulomba afu twekala twahen̂a.—Isaya 8:19.

6. Musalaba: Yesu wafwilili hamusalaba wanyi. Wafwilili hamutondu woloka hela chishimi. Izu dachi Heleni diyabalumuna mumaBayibolu amavulu nawu “musalaba” dabalumunan̂a ipulanga dimu hohu. Chinjikijilu chamusalaba chafuma kukwitiya kwakutwamba kwakunyima. Musalaba hiyawuzatishili hela kuwulombela kudi akwa Kristu atachiku. Komana, wunaton̂ojoki chikwikala chachiwahi kuzatisha musalaba mukulomba?—Kuhituluka 7:26; 1 Akorinda 10:14.

7. Tuheka tumu natushidikilu mpinji yikwawu chinatweshi kwikala chakala hakutuleka. Awusokujeyi namambwambu anatweshi kweseka kukuzeyesha kulonda wubuli kuhimpa tushidikilu tweyi. Ilan̂a kuzan̂alesha Nzambi chabadika kulema hadi kuzan̂alesha antu.—Yishimu 29:25; Matewu 10:36, 37.

[Mwevulu wudi hefu 22]

Nzambi hekala musatuku

[Mwevulu wudi hefu 23]

Krisimansi na Esita yafuma kukwitiya kwakutwamba kwa kunyaka nanyaka

[Mwevulu wudi hefu 23]

Hikudi mulon̂a watelela wakulombela afu hela kuyichinaku