KUDIZA 2

Nzambi Diyi Ibwambu Wabadika Kuwaha Yiwunatweshi Kuwana

Kwikala ibwambu daNzambi hichuma chabadika kuwaha kudeyi. Nzambi wukulezha chiwatela kuwana muzañalu nikukiñewa; wukulubula kutushidikilu niyililu yaluwa yayivulu. Nzambi wukutiya kulomba kweyi. Wukukwasha chakudiluñisha kuwunda kwamuyitoñozhoka nichikuhwelelu. (Masamu 71:5; 73:28) Nzambi wukakukwasha mumpinji yamakabi. (Masamu 18:18) Nzambi nakwinki chamukunkulu chindi chawumi wahaya nyaka.—Aroma 6:23.

Chiwaswila kwakwihi naNzambi wukuswila kwakwihi namabwambu zhindi. Niwena akwikala amabwambu zheyi. Cheñi nawa anatweshi tuhu kwikala neyi anakweyi niaheleyi. Akwikala namuzañalu wakudizisha hadi Nzambi nawa akakukwasha nikukukolesha.

Hitwesekana naNzambiku. Chiwukukeñakeña wubwambu naNzambi, watela kwiluka chuma chimu chalema. Wubwambu naNzambi hiwudi neyi wubwambu wahakachi kawantu esekanaku. Nzambi watubadika maana ni ñovu nawa himukulumpi hadi etu. HiMwanta wetu waloña. Neyi tunakukeña kwikala ibwambu dindi, chiña tumutiyililaña nakwila mwezhima mwakutulezhayi. Kwila mwenomu chikutuwahilaña mpinji yezhima.—Isaya 48:18.