KUDIZA 3

Wunakukeñeka Kudiza Hadi Nzambi

Hakwikala ibwambu daNzambi, watela kudiza hadi yena. Indi amabwambu zheyi adiluka izhina deyi, nawa adizatishaña? Eña. Nzambi niyena nakukeña wumwiluki izhina dindi nawa wudizatisheña. Izhina daNzambi diyi Yehova. (Masamu 83:18; Matewu 6:9) Watela kwiluka cheñi yuma yakeñayi niyahelayi. Watela kwiluka amabwambu zhindi niayilumbu zhindi. Chasendaña mpinji hakwiluka muntu. Bayibolu yahoshaña nawu, chidi chamaana kwambulahu mpinji yakudiza hadi Yehova.—Aefwesesa 5:15, 16.

Amabwambu zhaNzambi elaña yuma yamuzañaleshaña. Toñozhokaku hadi amabwambu zheyi. Neyi wukuyila katama nakukoña yuma yahelawu, komana atela kutwalekahu kwikala amabwambu zheyi tahindi? Inehi! Chochimu neyi wunakukeña kwikala ibwambu daNzambi, watela kwila yuma yamuzañaleshaña.—Yowanu 4:24.

Bayi neyi kwitiya kwezhima kwalombolaña kuwubwambu naNzambiku. Yesu, ibwambu daNzambi wadikundayi nindi, wahosheli hazhinzhila zhiyedi. Nzhila yimu yabwambañana nawa mwayaña antu amavulu. Iyi nzhila yalombolaña kukuzhilumuka. Nzhila yikwawu yanyanya, nawa mwayaña antu antesha. Iyi nzhila yalombolaña kuwumi wahaya nyaka. Ichi chinakulumbulula nawu, neyi wunakukeña wubwambu naNzambi, watela wiluki nzhila yayiwahi yakudifukwilamu kudi Nzambi.—Matewu 7:13, 14.