KUDIZA 6
Paradisa Yidi Mukamwihi!
Yuma yatama yinakumwekana heseki hayinu mpinji yinakumwekesha nawu Paradisa yidi mukamwihi. Bayibolu yahoshaña nawu tukamona mpinji yakala henohu Paradisa kanda yinzi. Makonu tunakushakama mumpinji yamuchidiwu! Yuma yahosha Bayibolu nawu yikamwekana diyi iyi:
Nzhita zhamaneni. “Muza wumu wakanyamuka nakulwa namuza wukwawu, wanta wumu nawanta wukwawu.” (Matewu 24:7) Iwu wuprofwetu wunekali walala. Kutachika mu 1914, kwadiña zhinzhita zhiyedi zhakaayi kezhima nimazhita anyanya amavulu. Yihita yawantu anafwi munizhi zhinzhita.
Yikatu mukaayi kezhima. Kwakaholoka “yipupu kwacheñi nakwacheñi.” (Luka 21:11) Ichi komana chinashikizhewi? Eña. Kansa, yikatu yamuchima, kakohu muneni, mashika, chikalula muneni (AIDS), niyikatu yikwawu yinazhahi yihita yawantu.
Nzala. Kunyeñumuka kaayi kezhima antu hiyakweti yakudya yayivuluku. Yihita yawantu afwaña nanzala hachaaka hachaaka. Ichi hichinjikizhilu chikwawu chinakumwekesha nawu Paradisa yidi kwakwihi nakwinza. Bayibolu yahoshaña nawu: “Kwakaholoka nzala.”—Maku 13:8.
Nyitentanshi. “Kwamba kaholoka . . . nyitentanshi kweñi nakweñi.” (Matewu 24:7) Ichi chinakumwekana nimumafuku etu. Antu kubadika hachihita chimu anafwi nanyitentanshi kutachika tuhu mu 1914.
Antu atama. Antu akekala “akwakufwila mali” “[ni]akwakudikeña.” Akekala “akeñaña yakuditiyasha aweni kuwaha, kukeña Nzambi nehi.” Anyana akekala “abulaña kwovwahila anvwali zhawu.” (2 Timotewu 3:1-5) Komana himunatweshi kwitezha nenu makonu kudi antu amavulu amuchidiwuku? Hiyalemeshaña Nzambiku, nawa aletaña kukala kudi ana anakukeña kudiza hadi Nzambi.
Wubanzhi. Cheñi nawa “Kuluwa ‘kwakavula.’” (Matewu 24:12) Chakubula hela kuzhinoka wukwitezha neyi wubanzhi wunaswezhi kubadika chiwadiña kunyaka yakunyuma. Antu kudikwezhima adi mukukala kwa kuyibuwila, kuyidimba, hela kuyikatisha.
Yuma yezhimiyi yinakumwekesha nawu Wanta waNzambi wudi mukamwihi. Bayibolu yahoshaña nawu: “Chimwakamona yumiyi hiyikumwekana, kelukenu nenu wanta waNzambi keña wushiki.” (Luka 21:31) Wanta waNzambi hichumanyi? Hinfulumendi yaNzambi yakwiwulu yamba kaleta Paradisa heseki. Wanta waNzambi wakahiña zhinfulumendi zhawuntu.—Danyeli 2:44.