Wanta waNzambi Wakatachika Kuyuula Iseki Mpinjinyi?

YUMANYI YASHIMWINIYI YESU NINDI YIKAMWEKANA?

Yesu wahosheli nindi: “Muza wakanyamuka nakuzuña namuza wukwawu, wanta niwena wakanyamuka nakuzuña nawanta wukwawu. Kwakekala nyitentanshi yamaneni nankashi, kwakekala nzala yakapwelendendi kweñi-nakweñi niyipupu.” (Luka 21:10, 11) Neyi chochamwekanaña munu wamuntu neyi nafwachiki, iyi yuma yejima yamwekeshaña nawu hiyinjikijilu. Nawa neyi chochabulaña kudifwana nyinu yawantu anafwachiki, iyi yuma yinakumwekana yinakumwekesha nawu “Wanta waNzambi wudi kwakwihi.” Komana iyi yuma yinakumwekana hampinji yoyimu nawa mukaayi kejima? Talenu yuma yinakumwekana.

1.MAJITA

Mu 1914, kwatachikili njita yeneni chikupu yakwila kanda yimwekaneñahu dehi! Antu eluka nsañu jakunyima kakavulu anukaña chaaka cha 1914 nawu yuma yahimpikili muloña dimu mwatachikili iyi njita yakaayi yatachi. Muniyi njita dimwatachikili kuzatishawu nankashi nyotoka yakwasa nachu njita, nyitenda nzumbu, mata, mpempela yafwana niyitwa yanjita yikwawu yafwana. Halondeleli njita yakaayi yamuchiyedi, haswejeliwu kuzatisha nyitenda nzumbu. Kufuma tuhu mu 1914, antu anakuzuña njita mumaluña amavulu nawa iji njita jinakuhondesha antu amavulu.

2.NYITENTANSHI

Britannic Academica yahosha nawu “yuma yayivulu yinakukisika,” muloña kunakumwekanaña nyitentanshi yamaneni kwakwihi na 100 chaaka nichaaka. Mutayi Watalaña Maluña waUnited States wahosheli nawu “kwesekeja nayinleji (kutachika tuhu muma 1900), chaaka nichaaka kwekalaña nyitentanshi yamaneni kwakwihi na 16.” Hela chakwila amakwawu anateli kwakamena wanyi nyitentanshi yikuholoka muloña wamakina akwetiwu akupima nachu, hela chochu, nyitentanshi yamaneni yinakuholokaña nawa yinakuletesha antu amavulu kukabakana nikufwa mukaayi kejima.

3. NZALA YAKAPWELENDENDI

Mukaayi mwekalaña nzala muloña wanjita, majika kanwa, kubula mali, kubula kwiluka wundimi indi kwiji muloña wakwila yakuda yinediki chiwahi wanyi. “Lipoti yamu 2018” yaMutayi Watalaña Hayakuda Mukaayi yamwekesheli nawu: “Mukaayi kejima, antu 821 miliyoni anakukaamaña nanzala, antu 124 miliyoni adi nanzala yakapwelendendi.” Chaaka nichaaka anyana akushika ku 3.1 miliyoni anakufwa nachipilu. Dikwila nawu anyana akushika kuchinkunku chawanyana afwaña chaaka nichaaka mukaayi kejima afwaña nachipilu.

4. NYISOÑU NIYIPUPU

Kuloñesha kwaMukaayi Kwatalaña Hakuhanda Kwawantu kwahosheli nawu: “Yipupu yaswejeli nankashi hadi yaaka 20 yinahitihu. Yikatu yadiñaku kunyima yidi neyi kolela, mashika niyipupu yikwawu yinafunti cheñi, nawa kunenzi cheñi yikwawu yidi neyi SARS, chipwembu, MERS, Ebola niZika.” Chipupu chaCOVID-19 chinenzi katataka. Hela chakwila asayantisiti niandotolu anadizi yuma yayivulu hayikatu, ilaña anakañanyi kuwana yitumbu yakuka nachu yikatu yikwawu.

5. MUDIMU WAKUSHIMWINA MUKAAYI KEJIMA

Yesu washimwini cheñi chinjikijilu chikwawu chahosheliyi nindi: “Ninsañu iyi yayiwahi yaWanta akayishimwina mwahita iseki dejima mwashakamawu antu kulonda yikekali wunsahu kudi akwanyuza yejima, mwaka dinu kukuma kwakenzi.” (Matewu 24:14) Hela chakwila antu mukaayi anakumona kukala kwashiyashana, antu akubadika ha 8 miliyoni kufuma kunyuza yejima anakushimwina nsañu yayiwahi yaWanta waNzambi mumatuña 240 mumadimi kubadika 1,000. Ichi chuma kanda chimwekaneñahu dehi.

ICHI CHINJIKIJILU CHIKUTULETESHA KWILADI?

Yinjikijilu yashimwiniyi Yesu yinakumwekana makonu. Muloñadi chitwatela kushilaku muchima kuniyi nsañu? Muloña Yesu wahosheli nindi: “Neyi mumona yumiyi hiyikumwekana, mwakeluki nenu Wanta waNzambi wudi kwakwihi.”—Luka 21:31.

Yinjikijilu yashimwiniyi Yesu, kushilahu nikuchinda mundonda kwamuBayibolu, kwatukwashaña kwiluka netu Wanta waNzambi watachikili kuyuula mwiwulu mu 1914.a Hayina mpinji, wamuswanyikili mwanindi Yesu Kristu kwikala Mwanta. (Masamu 2:2, 4, 6-9) Katataka Wanta waNzambi wutachiki kuyuula heseki, wakafumishahu jinfulumendi jejima nawa wakelisha iseki kwikala paradisa kulonda antu akashakameñahu haya nyaaka.

Katataka mazu ekala mukulomba kwachitalilu kwashimwiniyi Yesu ashikijewi, akwila nawu: “Wanta weyi winzi. Nkeñelu yeyi ayili hamaseki neyi chayilañawu mwiwulu.” (Matewu 6:10) Hanu dinu iwu Wanta welañadi kufuma tuhu mu 1914 hiwatachikili kuyuula? Nawa yumanyi yitunakutalila kumona chikela Wanta wukatachi kuyuula antu ejima?