KUDIZA 7

Kubabesha Kwadiñaku Kunyima

Yehova haketezha antu atama kukisañana Paradisaku. Amabwambu zhindi hohu diwu akashakamamu. Chumanyi chakayimwekena antu atama? Hakwila nawu twakuli ilu lwihu, toñozhokaku hansañu yalala yaNowa. Nowa wadiñaku makombakazhi ayaaka kunyima. Wadiña muntu wamuwahi, wadinkeleñaku kwila mwaya kukeña kwa Yehova. Ilaña antu amakwawu hamaseki akoñeleña yuma yatama. Dichi Yehova walezheli Nowa nindi Wukaleta dibazhi kulonda akazhilumuni antu atama ezhima. Nzambi walezheli Nowa kutuña watu kulonda yena ni chisaka chindi akabuli kufwa neyi Dibazhi dinenzi.—Kutachika 6:9-18.

Nowa nichisaka chindi atuñili watu. Nowa wababesheli antu nindi Dibazhi dakenza, ilaña hiyamutiyililiku. Atwalekelihu nakwila yuma yatama. Chamanishiliyi kutuña watu, Nowa weñizhili anyama muwatu, dichi yena nichisaka chindi eñilili niwena muwatu. Kutwala muna Yehova wanokesheli nvula yeneni chikupu. Nvula yanokeli hadi mafuku 40 nimwaana niwufuku. Iseki dezhima denzeli nadibazhi damenzhi.—Kutachika 7:7-12.

Antu atama afwili; ilaña Nowa nichisaka chindi ahandili. Yehova wayihadishli ha Dibazhi nakuyileta heseki dakadi antu atama. (Kutachika 7:22, 23) Bayibolu yahoshaña nawu mpinji yinakwinza, Yehova wakazhilumuna cheñi antu abulaña kwila yuma yaloña. Antu amawahi hiyakayizhilumunaku. Akashakama haya nyaka mu Paradisa heseki.—2 Petulu 2:5, 6, 9.

Makonu antu amavulu anakukoña yuma yatama. Kaayi kanenzali namakabi. Yehova watemeshaña Ayinsahu zhindi mapampa namapampa kulonda ababeshi antu, ilaña amavulu hiyakeñaña kutiyilila mazu aYehovaku. Antu hiyanakukeña kuhimpa yililu yawuku. Hiyakeñaña kwitezha chahoshañayi Nzambi hayuma yaluwa ni yaloñaku. Chumanyi chikayimwekena wenawa antu? Atela kuhimpa mumpinji yakumbidi? Amavulu hiyakahimpaku. Mpinji yinakwinza yakuzhilumuna antu atama, nawa hiyakekala nawumi cheñiku.—Masamu 92:7.

Iseki hiyamba kadizhilumunaku; akadibalumuna kwikala paradisa. Antu akwikala amabwambu zhaNzambi akashakama haya nyaka mu Paradisa heseki.—Masamu 37:29.