KUDIZA 9

Amabwambu zha Nzambi Hiyanyi?

Yesu Kristu hiMwana kaYehova, cheñi nawa hibwambu dindi wakeñayi nankashi. Henohu kanda yenzi nakushakama hanu heseki neyi muntu, Yesu wadiña mwiwulu neyi chileñaleña chalema chakuspiritu. (Yowanu 17:5) Kufumahu wenzhili hanu heseki kulonda kutañisha antu walala waNzambi. (Yowanu 18:37) Waheni cheñi wumi windi kulonda kukula nachu antu amwovwahila kufuma kushindi na kufwa. (Aroma 6:23) Ichi Yesu diyi Mwanta waWanta wa Nzambi, nfulumendi yakwiwulu yamba kaleta Paradisa hanu heseki.—Chimwekeshu 19:16.

Añelu niwena hiyamabwambu zhaNzambi. Añelu hiyatachikili kuhanda neyi chatachikiliwu antu kuhanda hanu hamasekiku. Ayileñeleli mwiwulu henohu Nzambi kanda yaleñi maseki. (Yoba 38:4-7) Kudi yihita yawañelu. (Danyeli 7:10) Awa amabwambu zhaNzambi akwiwulu anakukeña antu adizi walala waYehova.—Chimwekeshu 14:6, 7.

Nzambi wukweti amabwambu zhindi hamaseki; wayitenaña nindi ayinsahu zhindi. Chinsahu muchota chanyiloña washimunaña wunsahu wunelukiyi hadi muntu hela hachuma. Ayinsahu zhaYehova alezhaña antu ochamwilukawu Yehova ni nkeñelu yindi. (Isaya 43:10) Kufwana añelu, Ayinsahu anakukeña akukwashiku wudizi walala waYehova. Anakukeña nineyi wikali ibwambu daNzambi.