KUDIZA 11
Kanaku Kwitiya Kwakutwamba!
Satana niademoni zhindi hiyanakukeña eyi kuzatila Nzambiku. Anakukeña kukokola antu ezhima kufuma kudi Nzambi neyi chinatwesheki. Hinzhilanyi yazatishañawu hakwila mwenimu? Nzhila yimu yidi yakuhitila mukwitiya kwakutwamba. (2 Akorinda 11:13-15) Kwitiya kukwikala kwa kutwamba neyi hikwatañishaña walala kufuma mu Bayiboluku. Kwitiya kwa kutwamba kudi neyi mali akutwamba—anateli kumwekana neyi himali alala, komana amukunkunkulwayi. Anatweshi nikukuletela yikonkozhola yamaneni.
Kwitiya kwa kutwamba hikunateli kumuzañalesha Yehova Nzambi walalaku. Hampinji yadiñayi Yesu hamaseki, kwadiña izanvu dawa kakwitiya dakeñeleña kumuzhaha. Atoñozhokeleña nawu nzhila yiyadifukwilileñamu yadiña yaloña. Ahosheli nawu: “Tukweti Tata yetu wumu, yowu Nzambi.” Indi ichi Yesu wetezheli? Inehi! Wayilezheli nindi: “Enu tata yenu Diyabolu.” (Yowanu 8:41, 44) Makonu antu amavulu atoñozhokaña nawu adifukulaña kudi Nzambi, komana enda akalakela tuhu Satana niademoni zhindi.—1 Akorinda 10:20.
Chochekala mutondu watoka wasoñaña nyikambu yatoka, nikwitiya kwakutwamba kwekala nawantu akoñaña yililu yatama. Kaayi kadi mukukala kwakweni muloña wayililu yatama yinakukoñawu antu. Munezali wuvumbi, madombu, wukombi, makabi, kuzhahañana, niwuvumbi wakukanjikizha. Antu amavulu akoñaña iyi yuma yatama hiyakakwitiya, ilaña nsakililu yawu hiyayitañishaña kukoña yililu yayiwahiku. Hiyanatweshi kwikala amabwambu zhaNzambiku chiña aleka kukoña yililu yatama.—Matewu 7:17, 18.
Kwitiya kwakutwamba kwatañishaña antu kulombelela akishi. Nzambi nindi, hitwatela kulombelelaña akishiku. Mwamweni. Wunateli kutiya kuwaha neyi mukwenu hakuhosheshañaku ilaña wahoshaña hohu namwevulu weyi? Chalala ona muntu nateli kwikala ibwambu deyi wamuchima? Inehi, hanateliku. Yehova wakeñaña antu ahosheña nindi, bayi kuyifwikizha hela kunyevulu, yakahandañaku.—Kwidika 20:4, 5.
Kwitiya kwakutwamba kwatañishaña nawu chekala chaloña kuzhaha antu mu mpinji yanzhita. Yesu wahosheli nindi amabwambu zhaNzambi akweti kukeña mukachi kawu. Hitwazhahaña antu yitwakeñaku. (Yowanu 13:35) Chikuswezha dinu kutama neyi tukuzhaha antu atama. Hampinji yenzhiliwu ayilumbu zhaYesu nakumukwata, hayitezheli atumbazhi twindi kulwa nakumukiñaku.—Matewu 26:51, 52.
Kwitiya kwakutwamba kwatañishaña nawu, antu atama akaha mukesi kahaya nyaka. Henohu Bayibolu yatañishaña nawu nshidi yalombolaña kukufwa. (Aroma 6:23) Yehova hiNzambi wakukeña. Komana Nzambi wakukeña watela kuyandisha antu haya nyaka? Inehi! Mu Paradisa, mwakekala kwitiya kumu hohu, kwokwetezhawu kudi Yehova. (Chimwekeshu 15:4) Kwitiya kwezhima kwashindamena hakutwamba kwa Satana hikwakekala kwokuku.