Kudifukula Kwakutwamba Chikwamutamishaña Nzambi

Muloñadi kudifukula kwakuvulu kwadimwekeshaña neyi kwamwimenañaku Nzambi chikwelilaña yuma yatama? Muloña iku kudifukula kwejima kwakutwamba. Yuma yahoshañawu niyelañawu yaleteshaña antu kukuhwelela nsañu yakutwamba yahoshañawu hadi Nzambi. Amutamishaña ñahi? Watiyaña ñahi? Nawa chumanyi chakelayi?

1. Kudifukula kwakutwamba kwamutamishaña ñahi Nzambi nayuma yatañishañawu?

Kudifukula kwakutwamba “[kunahimpi] chalala chaNzambi namakudi.” (ARoma 1:25) Chakutalilahu, kudifukula kwakuvulu hikwalejaña antu jawu ijina daNzambiku. Ilaña Bayibolu yahosha nawu twatela kuzatishaña ijina daNzambi. (ARoma 10:13, 14) Akulumpi jamachechi amakwawu ahoshaña nawu neyi kumwekana chuma chatama, Nzambi diyi wunachikojeji. Iku hikutwamba. Nzambi hidiyi wakojejaña yuma yatamaku. (Tañenu Yakoba 1:13.) Chawushona, yuma yakutwamba yatañishañawu yinaleteshi antu kubula kumukeña Nzambi.

2. Kudifukula kwakutwamba kwamutamishaña ñahi Nzambi nayuma yelañawu?

Kudifukula kwakutwamba hikwamonaña antu neyi chayimonañayi Yehovaku. Bayibolu yahosha nawu nshidi jakudifukula kwakutwamba “jinavuli kushika nimwiwulu.” (Chimwekeshu 18:5) Hadi yaaka yayivulu, kudifukula kwakuvulu kwadiñijaña munsañu jamapolitiki, munsañu jamajita nikukojeja hela kwiteja antu amavulu kufwa. Akulumpi jamachechi amakwawu akeñaña kushakama chihandilu chachiwahi nawa alejaña antu jawu nawu ayifweteña. Yuma yelañawu yamwekeshaña nawu amwiluka Nzambi wanyi, dichi hiyashikilamu nikumwimenakuku.—Tañenu 1 Yowanu 4:8.

3. Nzambi watiyaña ñahi nakudifukula kwakutwamba?

Neyi chakwila yuma yelaña kudifukula kwakutwamba yayineñeshaña, munakutoñojoka nenu Yehova watiyaña ñahi? Wayikeña antu, ilaña watiyaña kutama akulumpi jamachechi amutamishaña nikukabisha antu jawu. Wakana nindi kudifukula kwakutwamba akakujiyisha nawa “hiyakamumona cheñiku.” (Chimwekeshu 18:21) Katataka Nzambi ajiyishi kudifukula kwakutwamba kwejima.—Chimwekeshu 18:8.

SANDUJOLENU CHIKUPU

4. Nzambi hetejaña kudifukula kwejimaku

Antu amavulu akuhwelela nawu kudifukula kwejima kudi neyi njila jashiyashana jaya kudi Nzambi. Komana diimu? Tañenu Matewu 7:13, 14, kuhiñahu hanjekenu hanilu lwihu:

• Bayibolu yalumbulula ñahi njila yatwalaña kuwumi?

Vumishenu VIDIYO, kuhiñahu hanjekenu halwihu lunalondelihu.

VIDIYO: Komana Nzambi Wetejaña Kwitiya Kwejima?—Kachibalu (3:22)

• Komana Bayibolu yahosha nawu kudi kudifukula kwakuvulu kwamutiyishaña Nzambi kuwaha?

5. Kudifukula kwakutwamba hikwamwekeshaña kukeña kwaNzambiku

Kudifukula kwakuvulu kunamutamishi Yehova munjila jajivulu. Njila yimu yatama nankashi, hikudiñija munsañu jamajita. Neyi munakukeña kumona chelañawu, vumishenu VIDIYO. Kuhiñahu hanjekenu hamalwihu analondelihu.

VIDIYO: Yuma Yelili Machechi haNjita yaKaayi Yamuchiyedi (2:22)

• Yumanyi yelili machechi amavulu haNjita yaKaayi Yamuchiyedi?

• Mukuhoshahu nenudi hayuma yeliliwu?

Tañenu Yowanu 13:34, 35 ni 17:16. Kuhiñahu hanjekenu hanawa malwihu:

• Munakutoñojoka nenu Yehova watiyaña ñahi neyi kudifukula kudi kwejima kudiñija munsañu jamajita?

• Kudifukula kwakutwamba dikunakuletesha yuma yatama kumwekana. Yumanyi yimunamoni yinakumwekesha nawu kudifukula kwakuvulu kunakañanyi kumwekesha kukeña kwaNzambi?

6. Nzambi nakukeña kufumisha antu mukudifukula kwakutwamba

Tañenu Chimwekeshu 18:4,a kuhiñahu hanjekenu hanilu lwihu:

• Munatiyi ñahi hakwiluka nenu Nzambi nakukeña kwamwina antu analuwañeshiwu kudi kudifukula kwakutwamba?

7. Twalekenuhu kudiza kulonda mumwiluki Nzambi walala

Komana yuma yelaña kudifukula kwakutwamba yinateli kuhimpa yitoñojoka yenu hadi Nzambi? Fwikijenu iwu mwana wunakaani munakumufumbawu kudi tata yindi, afuma hetala nawa atachika kwila yuma yatama. Tata yawantu hanatiyi kuwaha nayilwilu yamwanindiku. Chumanyi chikuletesha tubuli kumwinka tata yawantu nyiloña nayilwilu yatama yinakumwekeshayi mwanindi?

• Komana munateli kumwinka Yehova muloña nikuleka kudiza muloña wayuma yelaña kudifukula kwakutwamba?

YUMA YIMUNADIZI

Kudifukula kwakutwamba kwamutamishaña Nzambi nantañishilu yakutwamba niyaaku yawu yatama. Nzambi wakakisañana kudifukula kwakutwamba.

Kuhitulukamu

• Yuma yelaña kudifukula kwakutwamba niyikwatañishaña yinayitiyishi ñahi?

• Yehova watiyaña ñahi nakudifukula kwakutwamba?

• Kudifukula kwakutwamba akakwiladi kudi Nzambi?

ILUKILENUHU NSAÑU YIKWAWU

Talenu njila jiyedi kudifukula kwakuvulu mukwamutiyishilaña Nzambi kutama.

“Komana Kudifukula Kwejima Kwekala Kwokumu? Komana Kwejima Kwatuswijaña Kwakwihi naNzambi?” (Chibaaba chahaIntaneti)

Yehova wakeñelañadi nindi tudifukuleña kudi yena hamu nawakwetu?

“Komana Chalema Kwikala Mukudifukula Mudi Antu Anuñañana?” (Chibaaba chahaIntaneti)

Kapristu wumu waneñeleña nayuma yelileñawu mukudifukula kwawu. Ilaña yumiyi hiyamukañesheli kudiza chalala chahosha hadi Nzambiku.

“Ico Umupatili Afumine Uko Alepepa” (Loleni!, February 2015)

Hadi yaaka yayivulu, kudifukula kwamutwambilaña Nzambi nakumwekesha neyi wekala kwakulehi nawa watama. Ilukenu chalala hanawa makudi asatu.

“Makudi Amwekeshaña neyi Nzambi Wudana Kukeña” (Kaposhi Kakutalila, November 1, 2013)