KUDIZA 12

Chumanyi Chamwekanaña Neyi Muntu Nafwi?

Kufwa kunambuki na wumi. Kufwa kudi neyi kukama tulu twatweni. (Yowanu 11:11-14) Afu hiyanatweshi kutiya, kumona, kuhosha, hela kutoñozhoka hachumaku. (Mukwakutaŋisha 9:5, 10) Kwitiya kwa kutwamba kwatañishaña nawu afu ayaña kwituña dawaspiritu nakushakama nawankakulula zhawu. Bayibolu hiyatañishaña ichiku.

Afu hiyanatweshi kutukwasha, hela kutukatishaku. Antu amavulu elaña yidika nakuhana nyilambu yakuhwelelawu nawu yinatweshi kuzañalesha afu. Ichi chamuneñeshaña Nzambi muloña chashindamena hakutwamba kwa Satana. Hichatela kuzañalesha afu hela chanteshaku, muloña wena hiyakweti wumiku. Hitwatela kuchina hela kudifukula kudi afuku. Twatela kudifukula kudi Nzambi hohu.—Matewu 4:10.

Afu akekala amomi cheñi. Yehova wakahindwisha afu kuwumi muparadisa heseki. Iyi mpinji yichidi kumbidi. (Yowanu 5:28, 29; Yililu 24:15) Nzambi natweshi kuhindwisha afu neyi chochu wunatweshi kuhindwisha muntu hatulu.—Maku 5:22, 23, 41, 42.

Satana Diyabolu diyi washimunaña makudi nindi hitwafwañaku. Satana niademoni zhindi diwu aleteshaña antu kutoñozhoka nawu aspiritu awafu ekala kwoku nawa diwu akozhezhaña yikatu nimakabi makwawu. Mpinji yikwawu, Satana wadimbaña antu kuhitila muyilota nimuyimwenu. Yehova wahela antu ahanjikaña nawafu.—Kuhituluka 18:10-12.