CHIBALU 8

Kanaku Kwitiya kwaKutwamba; Nakwikala muKwitiya Kwalala

1. Kutalisha hansañu yakudifukula, makonu antu asakulañahu kwila chumanyi?

YESU wahosheli nindi: “Wabulaña kwikala chimu nanami hichilumbu chami.” (Matewu 12:30) Twekala kukabadi kaYehova hela kukabadi kaSatana. Antu amavulu atoñozhokaña nawu akalakelaña Nzambi munzhila yetezhewa, ilaña Bayibolu yahosha nawu Satana “wadimbaña antu ampata yamunu mwishina ezhima.” (Chimwekeshu 12:9) Yihita yawantu akuhwelela nawu adifukulaña kudi Nzambi, komana anakukalakela tuhu Satana Diyabolu! Antu makonu elaña mwaya kukeña kwawu: Anatweshi kukalakela Yehova, “Nzambi walala” hela Satana, “tata [yantwambi].”—Masamu 31:5; Yowanu 8:44.

Fumaku muKwitiya kwaKutwamba

2. Nzhilanyi yimu oyuSatana yesekelañamu kukañesha antu kudifukula kudi Yehova?

² Kufukulahu kumukalakela Yehova hikusakula kwakuwahi, nawa hikusakula kwalombolaña kukwitezhewa naNzambi. Ilaña Satana hatiyaña kuwaha nawudi wezhima wamukalakelaña Nzambiku; wakozhezhaña kukala kudi owu amuzatilaña. Nzhila yimu mwakoñelañayi ichi yidi yakuhitila mukadiwu hela ikañesha kufuma kudi antu acheñi, hela kufuma kudi amabwambu niamuchisaka. Yesu wababesheli nindi: “Akwankunyi namuntu akekala wowu amwitala dindi yomweni.”—Matewu 10:36.

3. Neyi chisaka cheyi hela amabwambu zheyi akukañesha kudifukula kweyi kudi Nzambi, watela kwiladi?

³ Neyi ichi chikumwekena, wunateli kwila ñahi? Antu amavulu eluka nawu nzhila yawu yiyadifukwilañamu yaheña, ilaña azhinokaña kufumamu. Atoñozhokaña nawu hikumwekesha kadiwu kuchisaka chawu neyi akwila mwenimu. Mwenimu dimu? Neyi welukili neyi akwachisaka cheyi azatishileña yitumbu yashetana, komana hiwunateli kuyilezhaku neyi iyi yitumbu yinatweshi kuyikisañanaku? Hiwunatweshi kudibomba nawu hakuzatisha yitumbu yeniyiku, tahindi?

4. Yoshuwa wahosheli nindidi kudi aIsarela kutalisha hakudifukula mumafuku indi?

⁴ Yoshuwa wayilezheli aIsarela kuleka yililu yatama yamukwitiya niyaaku yawankakulula zhawu. Wahosheli nindi: “Dichi dinu mwakamenu Yehova, mukalakelenu chakadi kudimbana nakashinshi; fumishenu mukachi kenu akishi apesheleñawu ankakulula zhenu kwishinadi daKaloña nimuEjipitu; mukalakelenu Yehova.” (Yoshuwa 24:14) Yoshuwa wadiña wovwahila kudi Nzambi, nawa Yehova wamukiswilili. Neyi tukumovwahila Yehova, wakatwikiswila ninetu nawa.—2 Samweli 22:26.

Ntañishilu Yakwitiya—Walala niKutwamba

A Nzambi Asatu: Kwitiya kwakuvulu kwatañishaña nawu Nzambi wekala Musatu. Ahoshaña nawu: “Tata hiNzambi, Mwana [Yesu] hiNzambi niSpiritu Yazhila niyena hiNzambi. Henohu kwekala Nzambi wumu hohu, bayi asatuku.”

Bayibolu hiyashimunahu nihadi “A Nzambi Asatuku” hela hiyatañishaña nawu Yehova wekala musatu mumuntu wumuku. Yehova kakawidi diyi Nzambi. Akorinda wamuchimu 8:6 yashimuna nawu: “Hakwinza etu twamonaña netu kudi Nzambi wumu hohu, diyi Tata.” Yehova diyi Wabadikamu. Yesu hiNzambiku, ilaña “hiMwana kaNzambi.” (1 Yowanu 4:15) Chochimu, nispiritu yazhila hiNzambiku. Cheñi nawa, spiritu yazhila himuntuku. Hiñovu yaNzambi yazatikaña.—Yililu 1:8; Aefwesesa 5:18.
Wumi: Kwitiya kwakuvulu kwatañishaña nawu wumi hichuma chekala mukachi kamuntu nawa hiwafwañaku. Bayibolu yatañishaña nawu wumi diyi muntu, mwamweni muntu wafwaña.—Kutachika 2:7; Ezekeli 18:4.
Kesi Kahelu: Kwitiya kwakutwamba kwatañishaña nawu wumi wawantu atama awikabishaña haya nyaka muhelu. Bayibolu yashimuna nawu afu “hiyeluka chumaku.” (Mukwakutaŋisha 9:5) Bayibolu yatañishaña cheñi nawu “Nzambi diyi kukeña.” (1 Yowanu 4:8) Yehova, Nzambi wakukeña hanatweshi kukabisha antu mukesiku.

Chikasha: Bayibolu yatañishaña nawudi kutalisha hadi aNzambi Asatu, hawumi ni hakesi kahelu?

Lekenu Kwila Yuma Yazatishañawu Mukudifukula kwaKutwamba

5. Muloñadi chitunateleli kuleka yuma yezhima yawaña?

⁵ Kufuma mukwitiya kwakutwamba chalumbululaña nawu kuleka kuzatisha yuma yezhima yawaña neyi tukweti, yidi neyi yitumbu yanyitokela, tuzeya twakwotesha, yikomu yakwotesha niyuma yekwawu yadifwanaku nayeniyi. Ichi chikwikala chalema muloña chikumwekesha nawu twenka chikuhwelelu chetu mudi Yehova.

6. Eni Kristu akusambila elili ñahi nanyikanda yawu mwadiña tufuta?

⁶ Talenu chuma chiyeliliwu eniKristu akusambila hakusakulahu kwikala mukwitiya kwalala. Bayibolu yashimuna nawu: “Amakwawu amavulu, elilaña tufuta twacheñi nitwacheñi, hiyakupompesha nyikanda yawu nakuyocha hatooka.”—Yililu 19:19.

7. Tunatweshi kwiladi neyi ademoni akutwikabisha?

⁷ Antu amakwawu akutachika kukalakela Yehova, nawa adibombeli muyililu yawulozhi, yakupanda hela kwikala nawaña, hekwawu anatweshi kuyikabisha kudi ademoni. Neyi ichi chikumwekena, tambikaku Yehova mukulomba nakuzatisha izhina dindi. Yena nawa wukukwasha.—Yishimu 18:10; Yakoba 4:7.

8. EniKristu ayimonaña ñahi akishi, yifwikizha ninyevulu yazatishañawu mukwitiya kwakutwamba?

⁸ Owu akufwila kukalakela Yehova hiyatela kuhemba hela kuzatisha akishi, yifwikizha hela nyevulu yemenañaku kudifukula kwakutwambaku. EniKristu alala “[endaña] kwanakukuhwelela hohu, hichakumona namesuku.” (2 Akorinda 5:7) Alemesha lushimbi lwaNzambi lwazhilika kuzatisha chifwikizha chidi chezhima hakudifukula.—Kwidika 20:4, 5.

Dikundi NaWantu zhaYehova

A mother and her little girl prepare food together

9. Kulezhanyi oku Bayibolu kuyahanaña kutalisha hakwikala namaana?

⁹ Bayibolu yashimunaña nawu: “Endaku nawakwamaana nineyi wakekala mukwamaana.” (Yishimu 13:20) Neyi tunakukeña kwikala akwamaana, chiña twendaña hela kudibombaña nawaYinsahu zhaYehova. Diwu antu anakwenda munzhila yalombolaña kuwumi.—Matewu 7:14.

10. Ayinsahu zhaYehova anatweshi kukwasha ñahi kumukalakela Nzambi?

¹⁰ Ayinsahu mwalala akamenaña antu. Mudimu wawu wakukwasha antu azeya munyichima kutiyishisha walala wamuBayibolu owu walombolaña kuwumi wahaya nyaka. Anateli kukwashaku kuhitila mukudiza Bayibolu chawaana. Akwakula malwihu eyi nakulezha chakuzatisha kwiluka kwawanewaña muBayibolu muwumi weyi.—Yowanu 17:3.

11. Kupompa kwaweni Kristu kukukwasha ñahi?

¹¹ Kukupompa kwawu kuyahumañenañawu kakavulu Hetala daWanta, wukudizilaku zhazhivulu hazhinzhila zhaYehova. Kufwila kweyi kwakukeña kwikala mukwitiya kwalala kukukoleshewa. Nineyi nawa akudizisha ochu watela kukwashaku antu kudiza walala wamuBayibolu.—Aheberu 10:24, 25.

A congregation meeting at a Kingdom Hall

12. Kulomba kunatweshi kukukwasha ñahi kukalakela Nzambi?

¹² Chiwukudizilaku zhazhivulu hankeñelu yaYehova, wukutiyishisha nakuhameka nzhila zhindi zhazhiwahi. Nineyi nawa watela kutwalekahu kufwila kwila yuma yamuzañaleshaña nakutondolwela yuma yamutiyishaña kutama. Anukaku neyi wunateli kwinza kudi Yehova mukulomba nakumulezhamu neyi yakukwashiku kwila yuma yayiwahi nakutondolwela yuma yaheña.—1 Akorinda 6:9, 10; Afwilipi 4:6.

A family reads the Bible together — Munzhilanyi muwunateleli kwikala mukudifukula kwalala?

13. Wunateli ñahi kutiyisha muchima waYehova kuwaha?

¹³ Mukuhita kwampinji, chiwunakukula lwakuspiritu wakakeña kwikala wadihana nakwikala Chinsahu chapapatishewa chaYehova. Hakudibomba hamu namukanka wawantu zhaYehova, wukazañalesha muchima waYehova. (Yishimu 27:11) Wakekala hakachi kawantu amuzañalu owu Nzambi ashimunayi nindi: “Nukushakama mukachi kawu, nukwenda mukachi kawu, nukwikala Nzambi yawu, niwena akwikala antu ami.”—2 Akorinda 6:16.

Nalubukili Kufuma Kudi Ademoni

Ifuku dimu nampinji yawufuku, henohu nakami namwinikwami. Natiyili izu hidikuntambika hezhina dami mapampa kasatu. Hohenohu, hinukumona kapala hikakwenzunuka, himukufuma chuma chidi nakesi chafwana neyi ngunja, hichikuholokela hevumu. Ilaña mwinikwami hamwenihu chuma nichimuku. Hela chikali chochu, natiyili iyena daswezha dasendeli tukwezhi twatuvulu.

Hanyima yatukwezhi tutanu nakamu, natiyili izu dantambikili cheñi. Hohenohu, itala dezhima damwekeni kewili neyi didi mwizhiya damenzhi. Mboma weneni hakukanduka mumenzhi, hakumpota kuchikasa. Nesekeli kumuzuya nami yaholoki. Natiyili woma. Hohenohu menzhi nimboma azhimañana nikuzhimañana, anatila niheseki nañovu. Nalezumukili hadi mpinji yeneni. Izu hidikunlezha nawu niyi kwitala damukwakuka mumukala. Chinamwihwili spiritu izhina dindi, hakulezha izhina dindi dalumbuluka nawu “samaheta ilaña hekala namwanaku.” Wanshikili kuhetesha kuhitila muñovu yakuuka.

Ayezhi enzhileña kwami kufuma mukamwihi nikwakulehi. Henohu kanda ashiki kwitala dami, natwesheli kuyimona muchibanjilu chami. Henaha, chikwashika wumu nikumweta mbañala muchikasa chidi niyikatu yindi hela kukala kukwetiyi hamu nayihemba yakumwinka yikumwekana kudami. Spiritu yalezheleña cheñi wuseya watela antu kufweta.

Mali nimawana akuminineña dakututika nsañu yakukuluka yitembi mukuuka. Nekalili “samaheta,” ilaña nanukili cheñi chichatamina “kubula kwikala namwana.” Mpinji yezhima yinukuvwala mwana, ona wamutambika wukufwa. Ichi chaneñesheleña chikupu. Hayaaka 12 yinazatilili iwu demoni, anyanami 6 afwili.

Natachikili kulomba kudi Nzambi nami yankwashi. Nalombeleña chakadi kuleka. Ifuku dimu aYinsahu zhaYehova adondomweneni kwipitu. Hela chakwila nayihañileña mpinji yezhima, hanidifuku nafukwilihu kuyitiyilila. Muniku kuhanjika nadizili kwila nawu, nadiña nakukalakela ademoni! Nafutumukili muyitoñozhoka yami nakuleka kupesha.

Chinamulezhelimu yeniwu demoni, wanzuwilili haniku kufukula kwami. Hela chochu, Nahosheli nami: “Wubwambu naneyi wunamani.”

Nocheli yuma yezhima yinazatishileña hakuhoña. Nadizili Bayibolu nawaYinsahu nikala niñamba yaNzambi, nawa napapatisheweli mu 1973. Ichi nidi nanyana yitanu yalumbanji. Mwinikwami niyena wekalili Chinsahu chapapatishewa.—Yashimunewa naJosephine Ikezu.

Chikasha: Mumbanda wumu walubukili ñahi kudi ademoni?