Muloñadi Nzambi Chekalilayi naKuloñesha Kwindi?

1. Muloñadi Nzambi chapompesheleliyi aIsarela akushankulu?

Nzambi wapompesheli anyana kankakulula Abarahama nakuyilisha muza nawa wayinkeli nshimbi. Iwu muza wawuteneneña nindi “Isarela” nawa diwu wekalili muza wawakwakudifukula alala nawa ezu dindi. (Masamu 147:19, 20) Dichi antu amunyuza ateleli kuhetela mudi aIsarela.​—Tañenu Kutachika 22:18.

Nzambi watondeli aIsarela kwikala ayinsahu jindi. Nshakaminu yawu yakunyima yamwekeshaña nkisu yatambwilañawu antu neyi ovwahila nshimbi jaNzambi. (Kuhituluka 4:6) Dichi, nyuza yikwawu yadi kumwiluka Nzambi walala kuhitila mudi aIsarela.​—Tañenu Isaya 43:10, 12.

2. Muloñadi akwaKristu alala chanuñañenawu?

Mukuhita kwampinji, aIsarela alekeli kutambwila nkisu jaNzambi, mwiluña dawu, Yehova wasinsishilimu chipompelu chawakwaKristu. (Matewu 21:43; 23:37, 38) Chayinu mpinji, akwaKristu alala ekala aYinsahu jaYehova, diwu asinsa hadi aIsarela.​—Tañenu Yililu 15:14, 17.

Yesu wapompesheli atumbanji twindi kulonda azati mudimu wakushimwina nikwilisha atumbanji munyuza yejima. (Matewu 10:7, 11; 24:14; 28:19, 20) Chineli tudi dehi kunsa yadinu ituña, wunu mudimu keña wumani. Yehova nakunuñañesha yihita yawantu akunyuza yejima nawa aka dikatachi. (Chimwekeshu 7:9, 10) AkwaKristu alala anakuyipompesha kulonda adikolesheña nikudikwasha wumu namukwawu. Akweti ntanjikilu yimu yakudizilamu Bayibolu hakupompa kwawu mukaayi kejima.​—Tañenu Aheberu 10:24, 25.

3. Indi kuloñesha kwamunanu mafuku kwawaYinsahu jaYehova kwatachikili ñahi?

Muma 1870, kadizanvu kanyanya kawatudizi aBayibolu katachikili kuvumbula chalala chamuBayibolu chajiyamini hadi yaaka yayivulu. Elukili nawu Yesu watambikili antu kwinza muchipompelu chawakwaKristu kulonda ashimwineña, dichi atachikili mudimu wakushimwina nsañu yaWanta mumatuña ejima. Mu 1931 atachikili kuzatisha ijina dakwila nawu aYinsahu jaYehova.​—Tañenu Yililu 1:8; 2:1, 4; 5:42.

4. Indi aYinsahu jaYehova anakuyipompesha ñahi?

Munkulakaji yayaaka yakusambila, yipompelu yawakwaKristu mumatuña amavulu ayikwashileña kudi izaza dalombolaña damwilukili Yesu nawu diyi Mutu wachipompelu. (Yililu 16:4, 5) Nikulelu, aYinsahu jaYehova atambwilaña wukwashu kudi Izaza Dalombolaña dawaeluda apama. Idi izaza datalaña tusanji twanyitayi twawaYinsahu jaYehova twabalumunaña, kupulinta nikutandisha nyikanda yakudizamu Bayibolu yidi mumadimi akubadika ha 600. Eña, Izaza Dalombolaña dakoleshaña antu kuhitila muNsona nikulombola yipompelu yakubadika ha 100,000 mukaayi kejima. Muchipompelu hichipompelu, mwekala amayala apama azataña neyi aeluda hela akulumpi. Awa amayala ahembaña nyikoku yaNzambi namuchima wakukeña.​—Tañenu 1 Petulu 5:2, 3.

A Yinsahu jaYehova adiloñesha kushimwina nikwilisha atumbanji. Kufwana apostolu, twashimwinaña kwitala nikwitala. (Yililu 20:20) Nawa twadizaña Bayibolu nawantu akweti mpwila yakudiza chalala. Hela chochu, aYinsahu jaYehova hizanvu hohuku. Twekala muchisaka chimu nawa tukweti Tata yetu watukeña. Tudi anyana evumu dimu adakamenaña. (2 Atesalonika 1:3) Chineli antu jaYehova anuñañana kulonda amuzañalesheña Nzambi nikukwasha antu, atuña chisaka chamuzañalu nankashi hamaseki.​—Tañenu Masamu 33:12; Yililu 20:35.