Muloñadi Chimukutwalekelahu Kudiza?

1. Nkiswinyi yimukutambwila neyi mutwalekahu kudiza Bayibolu?

Chakadi nikujina, nsañu yalema yatañishaña Bayibolu yimunadizi yinayinki iyena dakumukeña Yehova. Dichi, twatela kudishaku kulonda tutwalekihu kumukeña. (1 Petulu 2:2 ) Kuchiñeja kwakushakama nawumi haya nyaaka kunashindameni hadenu neyi mukutwalekahu kukundama kwakwihi naNzambi kuhitila mukudiza Izu dindi hela nehi.​—Tañenu Yowanu 17:3; Yuda 21.

Chimwasweja kumwiluka Nzambi, chikuhwelelu chenu chikukolelaku. Chikuhwelelu chikuyikwashaku kumuzañalesha Nzambi. (Aheberu 11:1, 6) Chikuyikwashaku kubalumuka mumuchima nikwikala nayililu yayiwahi mukuhanda kwenu.​—Tañenu Yililu 3:19.

2. Munateli kukwasha ñahi antu nansañu yimunadizi hadi Nzambi?

Chakadi nikujina, mukukeña kulejaku antu nsañu yimunadizi nawa wonsu wetu twazañalalaña kulejaku antu nsañu yayiwahi. Chimukutwalekahu kudiza Bayibolu, mukwiluka chakuzatisha Bayibolu nikuleja antu hayuma yimwakuhwelela hadi Yehova ninsañu yayiwahi.​—Tañenu Aroma 10:13-15.

Antu amavulu atachikaña kushimwina nsañu yayiwahi kudi amabwambu niantaña jawu. Mwatela kubabala. Chatela muyilejeña nenu nsakililu yawu yakutwamba, yilejenuña hayikaninu yaNzambi. Anukenu cheñi nenu antu atiyaña kuwaha neyi mudi nayililu yayiwahi bayi nsañu yimunakuhoshaku.​—Tañenu 2 Timotewu 2:24, 25.

3. Wubwambu wamuchidinyi wumunateli kudiluñisha naNzambi?

Mukupama kuspiritu neyi mukudizaña Izu daNzambi. Kumbidi, mwakekala nawubwambu wawuwahi nankashi naYehova. Munateli kukundama kudi Yehova nikwikala hakachi kawantu amuchisaka chindi.​—Tañenu 2 Akorinda 6:18.

4. Munateli kutwalekahu ñahi nakupaminaku?

Munateli kupaminaku kuspiritu neyi mukutwalekahu nakudiza Izu daNzambi. (Aheberu 5:13, 14) Hoshenu naChinsahu chaYehova kulonda yayidizisheña Bayibolu mumukanda waYumanyi Yinateli Kutudizisha Bayibolu? Chimwasweja kudiza Izu daNzambi, mukusweja kwikala namuzañalu muchihandilu chenu.​—Tañenu Masamu 1:1-3; 73:27, 28.

Nsañu yayiwahi yafumaña kudi Yehova, Nzambi wamuzañalu. Munateli kukundama kwakwihi naNzambi kuhitila mukudikunda nankashi nawantu jindi. (Aheberu 10:24, 25) Chimwatwalekahu nakufwila kumuzañalesha Yehova, dikwila nawu munakufwila wumi walala chikupu, wowumi wahaya nyaaka. Kukundama kwakwihi naNzambi dichuma cheneni chimwatela kwila.​—Tañenu 1 Timotewu 1:11; 6:19.