CHIBAABA CHAKUDIZA 15
KAMINA 30 Tata, Nzambi Yami, Ibwambu Dami
“Chachiwahi Kuswina Kwakwihi naNzambi!”
“Ami kwami, chachiwahi kuswina kwakwihi naNzambi.”—MAS. 73:28.
TUKUDIZA
Chitunateli kuswina kwakwihi naYehova niyuma yayiwahi yafumañamu neyi twila mwenimu.
1-2. (a) Yumanyi yakeñekaña hakwila nawu twiikali nawubwambu wakola namuntu? (b) Yumanyi yitukuhanjekahu muchinu chibaaba?
MWEKALAHU nebwambu denu imwadikunda nindi chikupu? Wubwambu wenu watachikili ñahi? Chakadi nikujina, mwawanikileña nindi mpinji yeneni, mwelukili kukala kwamweneñayi nawa mwelukili yuma yakeñayi niyahelayi. Mwelukili nenu wukweti yilwilu yayiwahi yimwatela kwimbujola. Yumiyi yaletesheli mumukeñi nankashi ibwambu denu.
2 Hakwila wubwambu wenu namukwenu wukoli, chakeñekaña mpinji nikuzata nañovu. Dichuma chimwatela kwila neyi munakukeña kwikala nawubwambu wakola naYehova Nzambi. Muchinu chibaaba, tukuhanjeka chitunateli kuswina kwakwihi naNzambi yetu niyuma yayiwahi yinateli kufumamu neyi twila mwenimu. Chatachi, tuhanjekenu chichawahila kuswina kwakwihi Nebwambu detu, Yehova.
3. Muloñadi chitwatela kutoñojokela chikupu hayuma yayiwahi yafumaña mukuswina kwakwihi naYehova? Shimunenu chakutalilahu.
3 Chakadi nikujina, mukwiteja nenu kuswina kwakwihi naYehova hichuma chachiwahi. Ilaña kutoñojoka chikupu chichawahila kwila mwenimu kukutukwasha kutwalekahu kuswina kwakwihi nayena. (Mas. 63:6-8) Chakutalilahu, tweluka netu kuda yakuda yayiwahi, kwolojola mujimba, kwikala nampinji yeneni yakunooka nikunwa menji amavulu kwatukwashaña kwikala akola kumujimba. Hela chochu, antu amavulu ashañaku maana wanyi kwila yumiyi, dichi mwafumaña yuma yomisha mbaña. Ilaña, neyi tutoñojokañahu mpinji yejima kwila yumiyi chikwatukwashaña kumujimba, tukuzataña nañovu kutwalekahu kwila yumiyi. Munjila yoyimu, tunateli kwiluka netu kuswina kwakwihi naYehova hichuma chachiwahi kudi etu, ilaña neyi tutoñojokaña chikupu hayuma yayiwahi yafumaña mukwila mwenimu, tukutwalekahu kuswina kwakwihi nankashi Nebwambu detu.—Mas. 119:27-30.
4. Neyi chinamwekeshiwu haIsamu 73:28, ñimbi yaMasamu wahosheli nindidi?
4 Tañenu Isamu 73:28. Nsoneki yaIsamu 73 wadiña kaLevi atondeliwu kulonda embeña tumina hatembeli yaYehova. Chakadi nikujina, wadifukwili kudi Yehova nakashinshi hadi yaaka yayivulu. Hela chochu, wachimweni nindi chidi hohu chiwahi kudanukisha yomweni niantu amakwawu nindi “chachiwahi kuswina kwakwihi naNzambi.” Yumanyi yayiwahi yafumaña mukwila mwenimu?
“KUSWINA KWAKWIHI NANZAMBI” KWALETAÑA MUZAÑALU
5. (a) Muloñadi kuswina kwakwihi nankashi naYehova chikwatuletelaña muzañalu? b) Kwesekeja naYishimu 2:6-16, shimunenu yuma yinakumwekesha maana aYehova chayikwashañawu enu nikuyikiña.
5 Chitwasweja kuswina kwakwihi naYehova, tukwikalaña namuzañalu. (Mas. 65:4) Mukwila mwenimu, mwafumaña yuma yayiwahi yayivulu. Chakutalilahu, neyi tutañaña nikwovwahila yuma yatulejañayi Mwizu dindi, Bayibolu, tukwikala namaana. Awa maana atukiñaña kuyuma yatama yaluwañeshaña nikutondolwela kukoña yiluwa yamaneni. (Tañenu Yishimu 2:6-16.) Dimuloña waweni Bayibolu chiyahoshela nawu: “Wudi namuzañalu yowu muntu wawanaña maana nimuntu wahetaña kashinshi.”—Yish. 3:13.
6. Yumanyi yamuletesheli ñimbi yaMasamu aleki kwikala namuzañalu?
6 Hela chochu, amabwambu jaYehova niwena kudi yuma yayineñeshaña mpinji jikwawu. Nsoneki yaIsamu 73 walekeli kwikala namuzañalu chatachikiliyi kwiteja yitoñojoka yatama. Wahilili nawa wekalili nechima, muloña watoñojokeleña nindi antu atama nawa abulileña kumukalakela Nzambi hela abulileña kwovwahila nshimbi Jindi, yuma yayiwahilileña. Watoñojokeleña mwaluwa nindi antu akamadombu nawa adivwimba ekalileña namaheta mpinji yejima, akola kumujimba nawa hiyakabakeneñaku. (Mas. 73:3-7, 12) Ñimbi yaMasamu waneñeli chakwila mpinji yimu wajinokeleña neyi mwamweni kudikita kwadikitileñayi mumudimu waYehova kwadiña kwalema hela nehi. Iku naneñi, wahosheli nindi: “Chalala natwalekihu kutookesha muchima wami chamukunkulwayi nikwisuka kumakasa ami nakumwekesha nami hinikweti muloñaku.”—Mas. 73:13.
7. Neyi tunaneñi, yumanyi yitwatela kwila hakwila twiikali cheñi namuzañalu? (Talenu cheñi mwevulu .)
7 Ñimbi yaMasamu hetejeli chineñi chimuzeyeshiku. Welilihu chuma. Weñilili “mwiluña deneni dajila daNzambi,” mwamukwashiliwu kudi Yehova kutachika kutoñojoka cheñi chachiwahi. (Mas. 73:17-19) Neyi tunaneñi, Yehova, Ibwambu detu wabadika, welukaña. Neyi tumulomba netu atulomboli nawa twiteja wukwashu wunakutwinkayi kuhitila Mwizu dindi nimuchipompelu, tukwikala nañovu yikutukwasha kuumika neyi tunaneñi. Hela chakwila kudi yuma yayivulu yinakutwakamisha, Yehova wukutukundejaña nikutuwundisha.—Mas. 94:19.a
KaLevi wasonekeli Isamu 73 nemani “mwiluña deneni dajila daNzambi” (Talenu paragilafu 7)
“KUSWINA KWAKWIHI NANZAMBI” KWATUKWASHAÑA KUHANDA CHACHIWAHI NIKWIKALA NAKUCHIÑEJA
8. Muyumanyi yikwawu yalema mwatukwashilaña kuswina kwakwihi naNzambi?
8 Kuswina kwakwihi naNzambi kwatukwashaña muyuma yikwawu yiyedi yalema. Chatachi, kwatukwashaña kuhanda chihandilu chachiwahi. Chamuchiyedi, kwatukwashaña kukuhwelela netu yuma yitwachiñejaña mwamweni yakashikijewa. (Yere. 29:11) Tushinshikenu chikupu haniyi yuma.
9. Kuswina kwakwihi naYehova kwatukwashaña ñahi kwikala namuzañalu muchihandilu?
9 Kuswina kwakwihi naYehova kwatukwashaña kwikala nachihandilu chachiwahi. Antu amavulu makonu akaanaña nawu Nzambi wekalaku wanyi, atoñojokaña nawu antu akatwalekahu wanyi kuhanda nawa nkumininaku, akaleka kwikalaku. Ilaña, muloña wakudiza Izu daNzambi, tunakuhweleli netu Nzambi “diyi mukakufweta antu amukeñakeñaña chikupu.” (Heb. 11:6) Nimakonu, twahandaña chihandilu chamuzañalu muloña twelaña chuma chatuleñeleliwu, dikwila nawu, kumukalakela Tata yetu wamwiwulu, Yehova.—Kuhit. 10:12, 13.
10. Yumanyi yashimunawu haIsamu 37:29 yakadiluñishawu kumbidi antu amuchiñejaña Yehova?
10 Antu amavulu, hiyachiñejaña nawu kumbidi kwakekala kushakama haya nyaakaku. Atoñojokaña hohu hanyidimu, kwikala nanyana nikuhembahu mali akayikwasha neyi analeki dehi kuzata. Hiyamutoñojokañahu niNzambiku. Kwaambukaku, ambuña aYehova akuhwelelaña mudi yena. (Mas. 25:3-5; 1 Tim. 6:17) Twamukuhwelela Nzambi nawa Ibwambu detu. Nawa twakuhwelela netu yuma yejima yatushiikayi yakashikijewa. Yuma yitwachiñejaña kumbidi mwabombela kudifukula kudi yena muParadisa haya nyaaka.—Tañenu Isamu 37:29.
11. Kuswina kwakwihi naNzambi kwatukwashaña ñahi, nawa kwamuleteshaña kutiya ñahi?
11 Kuswina kwakwihi naNzambi kwatukwashaña muyuma yikwawu yayivulu. Chakutalilahu, Yehova wakana kwanakena nshidi jawantu abalumukaña munyichima nawa ekala kwakwihi nayena. (Isa. 1:18) Dichi, hitwatwalekañahu kudinkamu nyiloña hanshidi jitwakoñeli kunyimaku. (Mas. 32:1-5) Nawa tukweti kukooleka kwakumuzañalesha Yehova. (Yish. 23:15) Chakadi nikujina, munateli kutoñojoka hayuma yikwawu yayiwahi yafumaña mukwikala nawubwambu wakola naNzambi. Hanu dinu, munateli kutwalekahu ñahi kuswina kwakwihi naNzambi?
CHAKUTWALEKAHU “KUSWINA KWAKWIHI NANZAMBI”
12. Yumanyi yimuneli yinakuyikwasha kuswina kwakwihi nankashi naNzambi?
12 Neyi mudi mukaKristu wapapatishewa, dikwila nawu muneli yuma yayivulu yinayikwashi kuswina kwakwihi naYehova. Munadizi yuma yayivulu yalala yahosha hadi Yehova Nzambi niKristu Yesu, munabalumuki mumuchima nakuleka nshidi jimwakoñeli kunyima, munakwila yuma yinakumwekesha nawu mwamukuhwelela chikupu Nzambi, nawa munakufwila kwila yuma kwesekeja nankeñelu yindi. Hela chochu, hakwila tuswineña nankashi kudi Nzambi, twatela kutwalekahu kwila iyi yuma.—Kol. 2:6.
13. Yumanyi yisatu yinateli kutukwasha kutwalekahu kuswina kwakwihi naYehova?
13 Yumanyi yikutukwasha kutwalekahu kuswina kwakwihi naYehova? (1) Twatela kutwalekahu kutaña nikudiza Bayibolu. Chitukwilaña mwenimu, hitukufwilaña hohu kudiza yuma yakutachikilahu yahosha hadi Nzambiku. Ilaña, tufwileña kwiluka yuma yinakutulejayi Nzambi nindi twili nawa twitejeña yishina yekala Mwizu dindi kutukwasha. (Efwe. 5:15-17) (2) Twatela kukolesha chikuhwelelu chetu kuhitila mukutoñojoka chikupu hayuma yayivulu yamwekeshaña chatukeñayi. (3) Twatela kutwalekahu kuhela yuma yahelayi Yehova nikutondolwela kukwata wubwambu nawantu elaña iyi yuma.—Mas. 1:1; 101:3.
14. Kwesekeja nachashimuna 1 AKorinda 10:31, yumanyi yikwawu yitwatela kwila muchihandilu chetu hefuku-hefuku hakwila nawu tumuzañaleshi Yehova? (Talenu cheñi nyevulu.)
14 Tañenu 1 AKorinda 10:31. Chalema nankashi chitwafwilaña kwila yuma yamuzañaleshaña Yehova. Ilaña twatela kwila yuma yikwawu kubadika hohu kuya nakushimwina nikupompa. Yuma yayiwahi yitwelaña yamuzañaleshaña Yehova, mwabombela niyuma yitwelaña muchihandilu chetu hefuku-hefuku. Chakutalilahu, neyi twikalaña ashinshika muyuma yejima nawa twinkañahu amakwawu yuma yitukweti, tukumuzañaleshaña Yehova. (2 Kor. 8:21; 9:7) Wakeñaña cheñi nindi tulemesheña nankashi chawaana chawumi. Twaswinaña kwakwihi naMukakuhana wumi neyi tutondolwelaña kusweja kuda nikunwa, nawa neyi tuzataña nañovu kwila yuma yikwawu yikutukwashaña kwikala akola kumujimba. Yuma yejima yitwelaña hakwila nawu tumuzañaleshi Yehova, nimutuyuma twamwekanaña neyi twanyanya nankashi, yamuleteshaña asweji kutukeña.—Luka 16:10.
Kulondela nshimbi jahamukwakwa hakwendesha, kudakamena etu aweni kuhitila mukwolojola mujimba, kuda yakuda yayiwahi nikwikala nachisambu hiyuma yimu mutwamuzañaleshelaña Yehova (Talenu paragilafu 14)
15. Yehova wakeñaña nindi twileña ñahi nawakwetu antu?
15 Yehova welilaña yuma yayiwahi antu aloña niabula kuloña. (Mat. 5:45) Dichuma chakeñañayi nindi ninetu twilileña akwetu antu. Chakutalilahu, ‘hitwahoshaña kasawuntu namuntu hela wumu hela kubobola nawakwetuku, ilaña, . . . twamwekeshaña kwovwaha chikupu kudi antu ejima.’ (Tit. 3:2) Muloña wachumichi, hitwadiwulaña antu amakwawu hamuloña hohu wakwila hiyakuhwelela yuma yitwakuhwelelaku. (2 Tim. 2:23-25) Twaswinaña kwakwihi naYehova neyi mpinji yejima twililaña antu ejima yuma yayiwahi nikuyitoñojokelaku.
TUNATELI KUSWINA “KWAKWIHI NANZAMBI” HELA NEYI TUNAHUKANI
16. Nsoneki yaIsamu 73 watachikili kutiya ñahi mukuhita kwampinji?
16 Indi neyi mukuhita kwampinji mutachika kutiya neyi munashikilimu wanyi kuyimwekeshela kukeña kudi Yehova? Neyi chitwahanjeka hakusambila, dichuma chamumwekeneni nsoneki yaIsamu 73. Wahosheli nindi: “Nyendu yami yadiña kwakwihi nakusenuka; nyendu yami yasheli hanti nakuselumuka.” (Mas. 73:2) Wetejeli yomweni nindi “waneñeli” nawa “[watoñojokeleña] chiwahi wanyi” kumesu aYehova, “neyi kanyama wabula maana.” (Mas. 73:21, 22) Komana wakunkulwili nindi muloña wachuma chakoñeliyi wadiña wamukunkulwayi, washikililimu wanyi kumumwekeshela kukeña kudi Yehova?
17. (a) Ñimbi yaMasamu welili chumanyi nihampinji yaneñeliyi nankashi? (b) Yumanyi yitunakudizila kunichi chuma cheliliyi? (Talenu cheñi nyevulu.)
17 Neyi ñimbi yaMasamu watachikili kutiya nindi anamushiyi kudi Yehova, dikwila nawu watiyili hohu mwenimu hakapinji kantesha. Chinamwekani neyi haniyi mpinji yaneñeliyi nankashi, wanukili nindi chalema hama kuswina kwakwihi naNzambi, neyi chitunamoni nanochu chahosheliyi nindi: “Ilaña ichi natwalekihu kwikala naneyi [Yehova]; wunankwati kuchikasa chami chachidiilu. Wanlombolaña nakufumba kweyi, nawa nkumininaku wakanlombola kukulema.” (Mas. 73:23, 24) Ninetu twatela kumulomba Yehova kulonda atukoleshi neyi tunaneñi hela tunazeyi. (Mas. 73:26; 94:18) Hela neyi nyendu yetu yinaselumuki chantesha, tunateli kufunta kudi Yehova nakukuhwelela netu ‘wukutwanakena swayi.’ (Mas. 86:5) Sweje-e hampinji yitunaneñi nankashi, twatela kuswina kwakwihi naNzambi yetu.—Mas. 103:13, 14.
Neyi tunakutiya netu hitukuzeya kuspiritu, twatela kuswina kwakwihi nankashi naYehova kuhitila mukuzataku nyidimu yikwawu yikutukwasha kutwalekahu kudifukula kudi yena (Talenu paragilafu 17)
“KUSWINA KWAKWIHI NANZAMBI” HAYA NYAAKA
18. Muloñadi chitukuhoshela netu twakatwalekahu kuswina kudi Yehova haya nyaaka?
18 Twakatwalekañahu kuswina kwakwihi naYehova haya nyaaka, nawa twakaleka wanyi kudiza hadi yena. Bayibolu yahosha nawu njila jaYehova, maanindi, niyuma yelukayi ‘jakala kujilondela.’—Rom. 11:33.
19. Mazu onenewa ekala muMasamu atukwashaña kukuhwelela yumanyi?
19 Isamu 79:13 dahosha nawu: “Etu, antu jeyi nawa mukanka wayimuna wakumunyenvu weyi, twakakusakililaña haya nyaaka; nawa twakakushimekaña kufuma kwikiñu dimu nakushika kwikiñu dikwawu.” Chimukutwalekahu kuswina kwakwihi naNzambi, ninenu munateli kukuhwelela nenu mwakatambwila nkisu jaya nyaaka nawa munateli kuhosha chakufuma hamuchima nenu: “Nzambi diyi ilola damuchima wami nawa iseka dami haya nyaaka.”—Mas. 73:26.
KAMINA 32 Ikalenu Kudi Yehova!
a Antu amakwawu atwalekañahu kwakama hela kuneña hadi mpinji yayilehi, atela kuya nakudimona nandotolu. Neyi munakukeña kwilukilahu nsañu jikwawu, talenu Kaposhi Kakutalila, Na. 1 2023.