Okuwaha Kuswina Kwakwihi Nawamanakwetu niAhela!

1-2. Chumanyi chimu chalemeshayi nankashi Yehova, nawa wakeñaña nindi twileñadi?

HAKACHI kayuma yalemeshayi nankashi Yehova mwabombela nichitwelaña nawakwetu antu. Yesu wahosheli nindi twatela kukeña akwetu neyi chitwadikeña etu aweni. (Mat. 22:​37-39) Chumichi munabombeli nikumwekeshela luwi antu abula kukuhwelela yuma yitwakuhwelela. Neyi tumwekeshaña luwi lwamuchidiwu, tukumwimbujolaña Yehova Nzambi, “watuntwishaña itena dindi hadi atama niamawahi nawa wanokeshaña nvula hadi aloña niabula kuloña.”—Mat. 5:45.

² Hela chakwila Yehova wakeña antu ejima, ilaña wasweja kukeña antu elaña yuma yaloña. (Yow. 14:21) Wakeñaña nindi tumwimbujoleña. Watukonkomwenaña nindi ‘tudikeñeña chikupu’ nawamanakwetu niahela. (1 Pet. 4:8; Rom. 12:10) Neyi tumumwekeshela muntu kukeña kwamuchidiwu, dikwila nawu tunakumumwekeshela kukeña neyi kutwamwekeshelaña ntaña yetu hela ibwambu detu itwakeña nankashi.

3. Yumanyi yitwatela kwanukaña kutalisha hakukeña?

³ Neyi chichakeñekaña kwakamena chiwahi mbutu mwitempa hakwili jikuli chiwahi, twatela kuzata nañovu kwila yuma yayiwahi yikuletesha kukeña kwetu kusweji. Kapostolu Pawulu wayifumbili akaKristu nindi: “Kukeña kumwakeña anakwenu kutwalekihu.” (Heb. 13:1) Yehova wakeñaña nindi tutwalekihu kukeña akwetu. Achinu chibaaba chikushimuna muloña waweni wutwatela kuswinina kwakwihi nankashi nawakwetu akakudifukula nichitwatela kutwalekahu kwila mwenimu.

MULOÑA WAWENI WUTWATELA KUSWININA KWAKWIHI NANKASHI NAWAKWETU AKAKUDIFUKULA

4. Neyi chinashimuniwu haIsamu 133:​1, tunateli kutwalekahu ñahi kulemesha kunuñañana kutwadiluñishaña nawamanakwetu niahela? (Talenu cheñi nyevulu.)

⁴ Tañenu Isamu 133:1. Tuneteji nanochu chasonekeliyi ñimbi yaMasamu nindi kwikala nawamabwambu alala amukeña Yehova ‘kwakuwahi’ nawa ‘kwazañaleshaña.’ Ilaña neyi muntu chinateli kukañanyayi kulemesha lubanji lwamutondu wamonañayi mafuku ejima, ninetu tunateli kukañanya kumona kulema kwakunuñañana kutwadiluñishaña nawamanakwetu niahela. Twadimonaña nawamanakwetu niahela kakavulu, hadaha mapampa amavulu mumulungu. Tunateli kutwalekahu ñahi kuyimona netu alema? Kukeña kutwayikeña amanakwetu niahela kukuswejelañaku neyi twikalaña nampinji yakutoñojoka hadi muntu-himuntu chalemayi muchipompelu nikudi etu.

5. Kukeña kutwadimwekeshelaña nawamanakwetu niahela kunateli kukwasha ñahi antu amakwawu?

⁵ Antu amakwawu neyi anenzi nakupompa katachi, atiyaña kuwaha nankashi hakumona kukeña kutwadimwekeshelaña wumu namukwawu. Muloña hohu wachumichi, anateli kukunkulula nawu anawani chalala. Yesu wahosheli nindi: “Neyi mukeñañana, dihu hakuyilukilawu kudi antu ejima nawu mudi atumbanji twami.” (Yow. 13:35) Talenu chuma chamumwekeneni Chaithra, kadizi wahayunivesiti wadizileña Bayibolu nawaYinsahu jaYehova. Iwu mumbanda wetejeli mutambi wakuya kukupompa kweluña. Hanyima kukupompa kwefuku datachi, walejeli muntu wamudizishileña Bayibolu nindi: “Kanda ankumbateñahu dehi kudi anvwali jami. Ilaña haniku kupompa kwenu, anakumbati kudi antu 52 mwifuku dimu hohu! Namoni kukeña kwaYehova kuhitila mudi ichi chisaka chakuspiritu. Ninami inakukeña kwikala munichi chisaka.” Chaithra watwalekelihu kupaminaku nawa wapapatisheweli mu 2024. Mwamweni, neyi amaha amona nyidimu yetu yayiwahi, kushilahu nikukeña kutwadimwekeshelaña wumu namukwawu, chumichi chavula kuyisañumuna kutachika kumukalakela Yehova.—Mat. 5:16.

6. Kuswina kwakwihi nawamanakwetu niahela kunateli kutukiña ñahi?

⁶ Kuswina kwakwihi nawamanakwetu niahela kunateli kutukiña. Pawulu wayikonkomweneni akwawu akaKristu nindi: “Twalekenuhu nakudikolesha wumu namukwawu hefuku-hefuku . . . kulonda hakachi kenu habuli kwikala muntu wukuchinchika muchima muloña wanshidi yekala nañovu yakudimbana.” (Heb. 3:13) Neyi tuneña nankashi chakwila nyendu yetu hikutachika kusenuka munjila yakuloña, Yehova nateli kuzatisha mukwetu mukakwitiya wunamoni kukala kutunakuhitamu kulonda atukwashi. (Mas. 73:​2, 17, 23) Kukolesha kwamuchidiwu kunateli kutukwasha nankashi.

7. Kukeña kwendelaña ñahi hamu nakunuñañana? (AKolosi 3:​13, 14)

⁷ Twekala mwizanvu dawantu azataña nañovu kudimwekeshela kukeña wumu namukwawu, dichi twadiluñishaña yuma yayiwahi yayivulu. (1 Yow. 4:11) Chakutalilahu, kukeña kwatuleteshaña “[tuditiyilileña] wumu namukwawu,” nawa chumichi chatukwashaña kwikala anuñañana nawamanakwetu niahela. (Tañenu AKolosi 3:​13, 14; Efwe. 4:​2-6) Dichi, hakupompa kwetu, twekalaña namuzañalu waweni wabula kwikalahu nezanvu dawantu amakwawu hanu hamaseki.

DILEMESHENUÑA WUMU NAMUKWAWU

8. Yehova watukwashaña ñahi hakwila twiikali anuñañana?

⁸ Kunuñañana kutwekala naku nawamanakwetu mukaayi kejima, hichuma chakuhayamisha. Yehova diyi waleteshaña twiikali anuñañana hela chakwila twawanina wanyi. (1 Kor. 12:25) Bayibolu yahosha nawu ‘atudizishaña kudi Nzambi chakudikeña wumu namukwawu.’ (1 Tes. 4:9) Munjila yikwawu, kuhitila muNsona, Yehova watulejaña jiika yuma yitwatela kwila hakwila tuswineña kwakwihi nawamanakwetu niahela. Anateli ‘kutudizisha kudi Nzambi’ neyi tudizaña nakanañachima ntañishilu yindi nikuyizatisha. (Heb. 4:12; Yak. 1:25) Nawa aYinsahu jaYehova azataña nañovu kwila chumichi.

9. Yumanyi yitunakudizila kunsona ya ARoma 12:​9-13 kutalisha hakudimwekeshela kalemesha wumu namukwawu?

⁹ Izu daNzambi datukwashaña ñahi kuswina kwakwihi nawakwetu akakudifukula? Talenu Pawulu chahosheliyi haniyi nsañu, neyi chashimunawu haARoma 12:​9-13. (Tañenu.) Mazu amu alema ahosheliyi adi akwila nawu “mukumwekesha kalemesha kudi wumu namukwawu, tachikilenuñahu.” Chumichi chatalisha mudihi? Twatela kutachikilañahu kuyimwekeshela akwetu ‘kukeña chikupu,’ kuhitila mukuyanakena, kuyitambwila kumatala etu nikuyimwekeshela chisambu, kushilahu niyuma yikwawu. (Efwe. 4:32) Bayi muhembelela nenu manakwetu hela muhela aswini kwakwihi nanenuku. Munateli ‘kutachikilahu’ kwila mwenimu. Yesu wakolesheli ichi chikuma nindi: “Mukuhana mwekala muzañalu chikupu kubadika wekala mukutambwila.”—Yilw. 20:35.

10. Tunateli kwikala ñahi adikita “[mukudimwekeshela] kalemesha kudi wumu namukwawu”? (Talenu cheñi mwevulu.)

¹⁰ Hanyima hohu yakutuleja nindi tutachikileñahu kudimwekeshela kalemesha wumu namukwawu, Pawulu watukonkomwena nindi “Ikalenu adikita, bayi ankopiku.” Muntu wadikita wekala neyena nawa wazataña nañovu. Neyi anamwinki mudimu, wawuzataña namuchima wumu. Yishimu 3:​27, 28 yatukonkomwenaña nawu: “Antu iwatela kwinka chuma chachiwahi, bayi wuyikiisha neyi wukweti ñovu yakuyikwashaku.” Kafwampi, neyi tumona netu kudi muntu wunakukeñeka wukwashu, twazataña hakumina ñovu jetu kumukwasha. Twashintajalaña wanyi; hela kutoñojoka netu muntu wacheñi wukwinza nakumukwasha.—1 Yow. 3:​17, 18.

11. Chumanyi chinateli kutukwasha kuswina kwakwihi nawamanakwetu niahela?

¹¹ Njila yikwawu mutunateli kuyimwekeshela akwetu kalemesha hikunyakala kuyanakena neyi anatwili chuma chatama. AEfwesesa 4:26 yahosha nawu: “Bayi muhumisha itena saña mwahililaku.” Muloñadi? Vasi 27 yahosha nawu kwila mwenimu ‘kukumushila Diyabolu hakwiñilila.’ Mwizu dindi, Yehova watuleja mapampa amavulu nindi tudanakeneña wumu namukwawu. AKolosi 3:13 yatukonkomwenaña nawu “[tudanakeneña] wumu namukwawu chakufuma hamuchima.” Chuma chimu chekala hayuma yinateli kutukwasha chikupu kuswina kwakwihi nawakwetu, hikudiwula yiluwa yawu niyuma yatama yinatwiliwu. Neyi twila mwenimu, ‘tukuhemba kunuñañana kwetu kutwekalaña naku naspiritu.’ (Efwe. 4:3) Muwihi, kudanakena kunateli kutukwasha kwikala anuñañana nikwikala mukuwunda.

12. Yehova watukwashaña ñahi kwikala namuchima wakwanakena?

¹² Hela chochu, mpinji jikwawu chinateli kutukalila kwanakena antu anatuneñeshi. Ilaña tunateli kutwesha naspiritu yaNzambi. Hanyima yakutukonkomwena nawu “[tudikeñeña] chikupu wumu namukwawu” nawa nawu twiikali “adikita,” Bayibolu yatuleja nawu: “Itejenu spiritu yajila yiyikojeji mwiikali neyena.” Muntu wekala “neyena” wadikitaña chikupu muloña wakumukwasha kudi spiritu yajila. (Rom. 12:11) Dichi spiritu yaNzambi yinateli kutukwasha kudikeña chikupu nikudanakena wumu namukwawu chakufuma hamuchima. Dihafuma tulombeña chakufuma hamuchima kudi Yehova netu atukwashi.—Luka 11:13.

“BAYI HEKALA CHAAMBU HAKACHI KENUKU”

13. Yumanyi yinateli kuleta chaambu hakachi ketu?

¹³ Chipompelu chatuñewa ‘nawantu ejima’ akweti nkulilu yashiyashana. (1 Tim. 2:​3, 4) Muloña waniku kushiyashana kwankulilu, muntu-himuntu nateli kufuukulahu kwila yuma munjila yaambukaku, chidi neyi yuma yatela kuvwalayi nimmwekenu, njila yatela kutondayi yakumuukilamu hela yisela yikutondayi. Neyi kubabala nehi, iku kwaambokelamu kwayuma yitwakeña kunateli kuleta chaambu hakachi ketu. (Rom. 14:4; 1 Kor. 1:10) Chineli Nzambi watudizisha chakudikeña wumu namukwawu, twatela kwikala asoñama kulonda tubuli kukanjikija akwetu amoneña yuma yitwafuukulaña nawu yabadika yafuukulañawu wena.—Fwili. 2:3.

14. Yumanyi yitwatela kufwilaña mpinji yejima kwila, nawa muloñadi?

¹⁴ Tunateli cheñi kukañesha chaambu muchipompelu neyi tufwilaña kudikolesha nikudituña wumu namukwawu mpinji yejima. (1 Tes. 5:11) Muyaaka yantesha yinahitihu, antu amavulu adiña azeya hela afumishiliwu muchipompelu, anafunti. Twayitambwilaña namuzañalu chikupu! (2 Kor. 2:8) Talenu chuma chimu chamwekeni kudi muhela wumu wafuntili Kwitala daWanta hanyima yakwikala wazeya hadi yaaka 10. Wahosheli nindi, “Ejima antumbilili chimwemweta nawa añimushili namuzañalu.” (Yilw. 3:19) Iyi yuma yanyanya hohu yamwilililiwu yamukwashili ñahi? Wahosheli nindi, “Yanletesheli kutiya nami Yehova wankwashileña kwikala namuzañalu cheñi.” Neyi tuzataña nañovu kudikolesha wejima wetu, Kristu nateli kutuzatisha kunookesha ‘ejima anakukabakana nawa anasendi yiteli yalema.’—Mat. 11:​28, 29.

15. Chumanyi cheñi chitwatela kwila hakwila tuleti kunuñañana muchipompelu? (Talenu cheñi mwevulu.)

¹⁵ Tunateli cheñi kuleta kunuñañana kuhitila muyuma yitwahoshaña. Yoba 12:11 yahosha nawu: “Komana itu hidatompaña mazu neyi idimi chidatompaña yakudaku?” Neyi chochelaña muntu weluka kuteleka, mpinji yejima wukusambila kutompa yakuda kulonda yatiyi neyi yidi chiwahi henohu kanda enki antu amakwawu, twatela ntahi kutoñojoka chikupu hayuma yitunakukeña kuhosha henohu kanda tuyihoshi. (Mas. 141:3) Chuma chitwatela kwanukaña mpinji yejima henohu kanda tuhoshi chidi chakwila nawu mazu itunakukeña kuhosha akwikala akukolesha, akuwundisha muchima nawa ‘akukwasha antiyilili.’—Efwe. 4:29.

16. Anyi sweje-e atela kuzata nañovu kuzatisha mazu akukolesha munhoshelu yawu?

¹⁶ Sweje-e amayala nianvwali atela kuzata nañovu kulonda nhoshelu yawu yiikaleña yakukolesha. (Kol. 3:​19, 21; Tit. 2:4) Akulumpi niwena chineli hiyatubiña amukanka wanyikoku yaYehova, atela kuhoshaña mazu akukolesha nikukundeja. (Isa. 32:​1, 2; Ñal. 6:1) Chishimu chimu chamuBayibolu chatwanukishaña nawu: “Izu dakuhoshela hampinji yayiwahi—ochidawaha!”—Yish. 15:23.

KEÑAÑANENU “MUNYIDIMU NIMUCHALALA”

17. Tunateli kumwekesha ñahi netu kukeña kutwayikeña amanakwetu niahela kwakufuma hamuchima?

¹⁷ Kapostolu Yowanu watukolesha nindi “hitwatela kukeña akwetu namazu hela hakanwaku, ilaña munyidimu nimuchalala.” (1 Yow. 3:18) Kukeña kutwayikeña amanakwetu niahela kwatela kufumaña hamuchima. Yumanyi yinateli kutukwasha kwila mwenimu? Neyi twikalaña nampinji yeneni yakwikalaña hamu nawamanakwetu niahela, tukuswinaña kwakwihi nankashi nawena nawa kukeña kwetu nawena kukuswejelañaku. Dichi wanenuñaku mpinji yakwikala hamu nawakwenu, chidi neyi hakupompa nimumudimu wakushimwina. Ikalenuña nampinji yakuya nakuyihempula. Neyi twilaña mwenimu, tukumwekesha netu ‘anakutudizisha kudi Nzambi chakudikeña wumu namukwawu.’ (1 Tes. 4:9) Nawa tukutwalekahu kudimwena etu aweni netu awa mazu alala akwila nawu, “Okuwaha nawa omuzañalu amana kwamuntu kushakama hamu mukunuñañana!”—Mas. 133:1.