Chakumanisha Kujinoka

1-2. (a) Yumanyi yinateli kujinokawu ambuña aYehova? (b) Yumanyi yitukuhanjekahu muchinu chibaaba?

ANTU ejima, akulumpi niatwansi ajinokañaa mpinji jikwawu. Chakutalilahu, toñojokenu hadi kansi Chinsahu wunakujinoka neyi chakwila mwamweni Yehova wamwakamenaña. Nateli kujinoka neyi chakwila watela kupapatishewa. Hela toñojokenu hadi manakwetu wafuukwilihu hadiñayi kansi kutwamijaku nyidimu yaWanta chatela atwamijiku mudimu wakumujimba. Chineli nakuli dehi nawa wukweti hohu mali antesha akukwasha nachu chisaka chindi, dichi nakujinoka neyi chakwila wafuukwili chiwahi hachidiñayi kansi hela nehi. Toñojokenu hadi muhela wunashinakaji dehi wudana ñovu niwuswa. Nateli kutiya kutama muloña hanakuzata neyi chazatileñayiku. Mwadihulahu dehi malwihu adi neyi: ‘Komana mwamweni Yehova wammonaña? Komana nelili chiwahi chinadihanini kulonda nimukalakeleña Yehova? Komana Yehova wuchidi kunzatisha?’

² Neyi malwihu amuchidawa tubula kuyakula, anateli kutuletesha kutachika kujinoka kudifukula kwetu. Muchinu chibaaba, tukuhanjeka kushinshika hayishina yamuBayibolu chikunateli kutukwasha neyi tunakujinoka (1) netu kwiji Yehova watwakamenaña, (2) netu twafuukwili chiwahi wanyi kunyima, hela (3) netu Yehova kwiji wuchidi kutuzatisha.

CHITUNATELI KULEKA KUJINOKA

3. Njilanyi yimu yinateli kutukwasha kuleka kujinoka?

³ Njila yimu yinateli kutukwasha kuleka kujinoka hikutaña Izu daNzambi kulonda tuwani ñakwilu yamalwihu etu. Neyi twila mwenimu, tukukoleshewa, tukupama kuspiritu nawa chikutukwasha “[kwimana] akola mbe-e muchikuhwelelu.”—1 Kor. 16:13.

4. ‘Twesekaña ñahi yuma yejima’? (1 ATesalonika 5:21)

⁴ Tañenu 1 ATesalonika 5:21. Talenu Bayibolu chiyatukonkomwenaña nawu “[twesekeña] yuma yejima.” Tunateli kwila ñahi mwenimu? Tunateli kwiluka neyi yuma yitwakuhwelela yalala neyi tuyesekeja nachahosha Bayibolu. Chakutalilahu, toñojokenu hadi iwu kansi wajinokaña neyi chakwila walema kumesu aNzambi. Komana watela hohu kwiteja nindi iyi yitoñojoka yidi hohu chiwahi? Inehi, watela “[kweseka] yuma yejima” kuhitila mukumona yuma neyi chayimonañayi Yehova.

5. Tunateli ‘kumutiya’ ñahi Yehova chinakwakulayi malwihu etu?

⁵ Hampinji yitunakutaña Izu daNzambi, “tukutiya” Yehova nakuhosha nanetu. Ilaña hakwila twiluki yitoñojoka yindi kutalisha hamalwihu etu, twatela kuzata nañovu. Twatela kutaña nsañu muBayibolu yinesekani nakukala kutukweti. Tunateli kusandujola hanowu mutu, kuzatisha yitwa yamukuloñesha kwaYehova. (Yish. 2:3-6) Tunateli kulomba kudi Yehova kulonda atulomboli hampinji yitunakusandujola nawa atukwashi kwiluka chidi yitoñojoka yindi hanolu lwihu. Kuhiñahu, tunateli kukeñakeña yishina yamuBayibolu ninsañu yikwawu yinateli kutukwasha kwesekeja nakukala kutukweti. Tunateli cheñi kudizila kunsañu yamuBayibolu yahosha hadi antu amweni kukala kwokumu.

6. Kupompa kwatukwashaña ñahi kuleka kujinoka?

⁶ ‘Twamutiyaña’ cheñi Yehova nakuhosha nanetu hakupompa kwetu. Neyi tuyaña nakupompa mpinji yejima, tukutiya chuma mumpanji hela muñakwilu yinakuli muntu wudi mwizaza chiyinateli kutukwasha kuleka kujinooka. (Yish. 27:17) Ichi dinu tuhanjekenu kulonda tumoni chitunateli kuwana ñakwilu yamalwihu amakwawu itwadihulaña.

NEYI MUNAKUJINOKA NENU YEHOVA WAYAKAMENAÑA

7. Lwihu lwamuchidinyi lunateli kudihulawu antu amakwawu?

⁷ Mwadihulahu dehi nenu, ‘Mwamweni Yehova wammonaña?’ Neyi munakudimona kwikala amukunkulwayi, munateli kutoñojoka nenu chikutwesheka wanyi kwikala ibwambu daNleñi wayuma yejima. Hadaha dichatiyiliyi niMwanta Davidi. Wahayamini hakwiluka nindi Yehova wamonaña niantu hohu, nawa wehwili nindi: “Eyi Yehova, indi muntu diyinyi mwaka wumwakameni, mwana kamuntu wafwaña mwaka wumushi maana?” (Mas. 144:3) Kudihi kumwatela kuwana ñakwilu yanilu lwihu?

8. Kwesekeja na 1 Samweli 16:6, 7, 10-12, chumanyi chamonañayi Yehova mudi antu?

⁸ Bayibolu yatudizishaña nawu Yehova wamonaña ana antu amonañawu kudi akwawu nawu alema wanyi. Chakutalilahu, Yehova wamutemesheli Samweli kuya kwitala daYesi nakuwayisha mwanindi wumu hakachi kawanyanindi awamayala kulonda akekali mwanta waIsarela kumbidi. Yesi watambikili anyanindi awamayala 7 hakachi kawanyanindi 8 kufumishaku kabinda, Davidi.b Ilaña, Yehova watondeli Davidi. (Tañenu 1 Samweli 16:6, 7, 10-12.) Yehova wamumweni Davidi chadiñayi mumuchima, kansi weyala walemesheli yuma yakuspiritu.

9. Muloñadi chimwatela kukuhwelela nenu Yehova wayakamenaña? (Talenu cheñi mwevulu.)

⁹ Toñojokenu Yehova chinamwekeshiyi dehi hatooka nindi wayimonaña. Wadihana kuyinka maana akuyikwasha kwesekeja nachidi yuma muchihandilu chenu. (Mas. 32:8) Nateli kwila mwenimu muloña wayiluka chiwahi. (Mas. 139:1) Neyi muzatishaña kufumba kwaYehova nawa mumona chikunakuyikwasha, mukukuhwelela chikupu nenu Yehova wayakamenaña. (1 Kushi. 28:9; Yilw. 17:26, 27) Yehova wamonaña chimwazataña nañovu. Wamonaña cheñi yilwilu yenu yayiwahi nawa wakeñaña kwikala ibwambu denu. (Yere. 17:10) Nakukeña mumwiteji kwikala Ibwambu denu.—1 Yow. 4:19.

NEYI MUNAKUJINOKA NENU YUMA YIMWAFUUKWILI KUNYIMA YADIÑA CHIWAHI WANYI

10. Neyi tutoñojoka hayuma yitwafuukwili kunyima, malwihwinyi itunateli kudihula?

¹⁰ Mukuya kwayaaka, amakwawu anateli kutoñojoka hayuma yafuukwiliwu kunyima neyi chakwila yadiña chiwahi hela nehi. Hadaha alekeli mudimu hela bizinisi yayileteleleña mali amavulu kulonda amukalakeli Yehova chikupu. Nawa hanahiti dehi mpinji yayilehi, hadaha yaaka yinakotoki. Hekwawu anakumona akwawu eñilili mudimu wakumujimba nawa anakumwekana neyi akweti mali amavulu nichihandilu chamuzañalu. Chikufumamu, anateli kudihula nawu: ‘Komana mwamweni nelili chiwahi kudihana kulonda nimukalakeli Yehova? Tahindi chuma chinafuukwili chaletesha nishalihu yuma yayiwahi yayivulu?’   

11. Yitoñojokanyi yaheña yalwishileña nansoneki yaIsamu 73?

¹¹ Neyi mwadihulahu dehi malwihu amuchidawa, toñojokenu chatiyiliyi nsoneki yaIsamu 73. Wamweneña antu abulileña kumukalakela Yehova anakumwekana neyi akola kumujimba, aheta nawa hiyanakumona kukala kudi kwejimaku. (Mas. 73:3-5, 12) Hayishinshikileñayi nikumona chihandilu chahandileñawu, wamweni nindi welili chatama kufuukulahu kumukalakela Yehova. Wadiña “nakwakama mpinji yejima” muloña waniyi yitoñojoka yaheña. (Mas. 73:13, 14) Wemikili ñahi mushindu iyi yitoñojoka yaheña?

12. Kwesekeja naIsamu 73:16-18, ñimbi yaMasamu walekeli ñahi kwakama yuma yakameneneñayi?

¹² Tañenu Isamu 73:16-18. Ñimbi yaMasamu wayili kwiluña dajila daYehova dawunda. Kwenakuna, watoñojokeleña chiwahi. Hela chakwila welukili nindi yihandilu yawantu amakwawu yamwekeneña neyi yidi chiwahi, ilaña yikatwalekahu wanyi. Kutoñojoka muniyi njila, kwamukwashili kwikala nakuwunda kwamuyitoñojoka, welukili nindi kufwila yuma yakuspiritu dichuma chachiwahi chateleleli kwilayi. Chafuminimu, wekalili cheñi neyena dakutwalekahu kumukalakela Yehova.—Mas. 73:23-28.

13. Munateli kwikala ñahi nakuwunda kwamuyitoñojoka neyi munakujinoka hayuma yimwafuukwili kunyima? (Talenu cheñi mwevulu.)

¹³ Ninenu munateli kwikala nakuwunda kwamuyitoñojoka nawukwashu Wezu daNzambi. Munjilanyi? Toñojokenu hakulema kwayuma yimukweti, kushilahu nimaheta enu amwiwulu, nawa yesekejenu nayuma yafumañamu hayuma yinateli kutambwilawu antu afwilaña maheta amukaayi. Anateli kushindamena hohu hayuma yinateli kwikalawu nayu muchihandilu chamakonu muloña kwosi yuma yikwawu yatalilañawu kumbidi. Hela chochu, enu Yehova nayishiiki nkisu [yuma yayiwahi nankashi] yinabadiki yuma yejima yimunakutoñojoka. (Mas. 145:16) Toñojokenu cheñi hachumichi: Komana mwamweni twadi kwiluka chadi kwikala chihandilu chetu neyi chakwila twafuukwili chaambukaku? Chalala chidi chakwila nawu: Ana afuukulañahu kushindamena hakukeña kwamukeñawu Nzambi niakwawu antu hiyashalañahu yuma yasweja kuwahaku.

NEYI MUNAKUJINOKA NENU HIYANATELI KUYIZATISHA KUDI YEHOVAKU

14. Yumanyi yaleteshaña antu amakwawu kudijinoka, nawa lwihwinyi lunateli kudihulawu?

¹⁴ Ambuña aYehova amakwawu anakukabakana muloña wawushinakaji, yikatu hela wufwayi. Chumichi chinateli kuletesha atachiki kujinoka neyi chakwila alema kumesu aYehova. Anateli kudihula nawu, ‘Komana Yehova wuchidi kunzatisha?’

15. Nsoneki yaIsamu 71 wakuhweleleli nindidi?

¹⁵ Dichatiyiliyi ninsoneki yaIsamu 71. Walombeli nindi: “Bayi wunshiya neyi ñovu jami jinamaniku.” (Mas. 71:9, 18) Hela chochu, ñimbi yaMasamu watwalekelihu kukuhwelela nindi neyi amukalakelaña Nzambi yindi nakashinshi, Yehova wukumulombolaña nikumukwasha. Ñimbi yaMasamu welukili nindi, Yehova watiyaña kuwaha antu azataña hakumina ñovu jawu kumukalakela hela chakwila anakumona kukala.—Mas. 37:23-25.

16. Antu akula dehi alema ñahi kudi Yehova? (Isamu 92:12-15)

¹⁶ Enu munakuli dehi, monenuña kukala kumunakuhitamu neyi chakumonañayi Yehova. Nateli kuyikwasha kutwalekahu kumukalakela nakashinshi hela chakwila munakukabakana kumujimba. (Tañenu Isamu 92:12-15.) Chatela musheña maana hayuma yimunateli kubula kutwesha, shenuña muchima hayuma yimunateli kutwesha kwila. Chakutalilahu, munateli kukolesha amakwawu muyuma yimwelaña nichimwamwekeshaña nenu mwakeña antu. Munateli kuyileja Yehova chinayikwashi hadi yaaka yayivulu nichimwachiñejaña nenu yuma yashiikayi yikashikijewa. Nawa bayi mudiwula kulema kwakulomba kwenu kwakufuma hamuchima chikunateli kukwasha antu amakwawuku. (1 Pet. 3:12) Hichikweti muloña nayuma chiyidi muchihandilu chetuku, wejima wetu kudi yuma yitunateli kumwilila Yehova niantu amakwawu.

17. Muloñadi chitwatela kutondolwela chilwilu chakudesekeja nawakwetu?

¹⁷ Neyi munakutiya kutama nenu mukutwesha wanyi kumuzatila nankashi Yehova mumudimu windi, ilukenu nenu walemesha mudimu wejima wumukutwesha kuzata. Hadaha munateli kwesekeja nyidimu yimwazataña nayazataña akwenu. Tondolwelenu kwila chumichi! Muloñadi? Muloña Yehova hatwesekejaña nawakwetuku. (Ñal. 6:4) Chakutalilahu, Mariya wamwinkeli Yesu chawaana chamanji asweja kulema wuseya. (Yow. 12:3-5) Kwaambukaku, mumbanda ntuluwa wakaankila wahanini hatembeli tumawayawaya twanyanya tuyedi twapela wuseya nankashi. (Luka 21:1-4) Hela chochu, Yesu wamweni awa antu ejima ayedi nindi adiña nachikuhwelelu. Tata yindi, Yehova, walemesha chuma chidi chejima chimunateli kwila muloña wakudihana kudi yena nikumukeña, hela chakwila chanyanya chamuchidinyi kudi enu.

18. Chumanyi chinateli kutukwasha kuleka kujinoka? (Talenu cheñi chikasha chinakwila nawu “Izu daYehova Dinateli Kuyikwasha Kuleka Kujinoka.”)

¹⁸ Wejima wetu mpinji jikwawu twajinokaña. Hela chochu, neyi chitunamoni, Izu daNzambi dachalala dashindamenewa, Bayibolu, dinateli kutukwasha kuleka kujinoka. Dichi zatenu nañovu kulonda muleki kujinoka, nawa mukwikala nachikuhwelelu nikuleka kwakama. Chakadi nikujina, Yehova wayimonaña enu nkawenu. Wasakililaña hachimwadihanaña nawa wamba kayifweta. Ilukenu nenu Yehova wakeña nawa wayakamenaña ambuñindi ejima ashinshika.