Dikeheshenu Nakwiteja Nenu Kudi Yuma Yimwabula Kwiluka

1. Wuswanyi watwinkayi Yehova, nawa muloñadi?

YEHOVA watuleña nawuswa wakutoñojoka, kwiluka yuma, kwikala nakashinshi kakutiyishisha yuma, nikwikala namaana. Muloñadi chatuleñeleliyi muniyi njila? Wakeñaña ‘tumwiluki Nzambi’ nawa tumukalakeleña nawuswa wetu wakutoñojoka.—Yish. 2:​1-5; Rom. 12:1.

2. (a) Chumanyi chitwatela kwiluka? (Yoba 37:​23, 24) (Talenu cheñi mwevulu.) (b) Yumanyi yayiwahi yafumañamu neyi tudikehesha nakwiteja netu hitunateli kwiluka yuma yejimaku?

² Hela chakwila atuleña nawuswa wakwiluka yuma, hitunateli kwiluka yuma yejimaku. (Tañenu Yoba 37:​23, 24.) Talenu chuma chamumwekeneni Yoba. Amwihwili malwihu amavulu nankashi amwekesheli nawu kudi yuma yayivulu yabuliliyi kwilukayi. Ichi chuma chamumwekeneni chamuletesheli yadizozi nawa chamukwashili kwolola yitoñojoka yindi. (Yoba 42:​3-6) Mwafumaña yuma yayiwahi neyi ninetu tudikehesha nakwiluka netu hitweluka yuma yejimaku. Neyi tudikehesha muniyi njila, chinateli kutukwasha kukuhwelela netu Yehova wukutuleja yuma yitwatela kwiluka kulonda tufuukuli chiwahi.—Yish. 2:6.

3. Yumanyi yitukuhanjekahu muchinu chibaaba?

³ Muchinu chibaaba, tukuhanjeka yuma yimu yitwabula kwiluka nikukala kunateli kufumamu muloña wachumichi. Tukuhanjeka cheñi muloña waweni chichawahila kubula kwilukahu yuma yikwawu. Kuhanjeka haniyi yikuma kukutukwasha kukuhwelela chikupu netu Yehova “weluka yuma yejima,” diyi watulejaña yuma yitunateli kwiluka.—Yoba 37:16.

TWELUKA WANYI MPINJI YAKENZA KUKUMA

4. Kwesekeja naMatewu 24:​36, chikumanyi chimu chitwabula kwiluka?

⁴ Tañenu Matewu 24:36. Tweluka wanyi mpinji yakenza kukuma kwanshakaminu yamakonu. Yesu niyena hadiñayi hanu hamaseki welukili wanyi “ifuku niora.”a Mukuhita kwampinji, wayilejeli apostolu nindi Yehova, Mukakuhemba Mpinji Wabadika, welukaña mpinji yamwekenañahu yuma yikwawu muloña “wañovu yindi,” hela wuswa wukwetiyi. (Yilw. 1:​6, 7) Yehova watoñola dehi mpinji yakakuma nshakaminu yamakonu, ilaña etu hitukweti wuswa wakwiluka jiika mpinji yakamwekana chumichiku.

5. Chineli tweluka wanyi mpinji yakenza kukuma, yumanyi yinateli kufumamu?

⁵ Neyi chahosheliyi Yesu, tweluka wanyi kuleha kwampinji yinashaliku hakwila kukuma kwakenzi. Chikufumamu, tukukañanya kudiwunjika indi kwiji tukuzeya, sweje-e neyi tunahembeleli ifuku daYehova hadi mpinji yayilehi. Hadaha chinateli kutukalila kuumika neyi anakutuseha kudi antaña jetu hela kudi antu amakwawu. (2 Pet. 3:​3, 4) Tunateli kutoñojoka netu neyi twelukili jiika ifuku dakenza kukuma, twadi kudiwunjikaña chikupu nawa chadi kutupelelaña kuumika neyi anakutuseha.

6. Yumanyi yayiwahi yafumañamu chineli tweluka wanyi ifuku dakenza kukuma?

⁶ Kafwampi, hamuloña wakubula kutuleja ifuku dakenza kukuma, Yehova watwinka kukooleka kwakumwekesha netu twamukalakelaña muloña twamukeña nawa twamukuhwelela. Tunakukeña kumukalakela Yehova haya nyaaka, bayi neyi kushika hohu hampinji yakenza kukumaku. Chatela tusheña nankashi muchima hampinji yakwinza “kwefuku daYehova,” tukwila chiwahi neyi tushaña muchima hayuma yakela idi ifuku. Neyi twilaña mwenimu, tukutwalekahu kumukuhwelela chikupu Yehova nikuzata hanakumina ñovu jetu kwila yuma yikumutiyishaña kuwaha.—2 Pet. 3:​11, 12.

7. Yumanyi yitweluka?

⁷ Twelaña chiwahi kusha muchima hayuma yitweluka, tweluka netu mafuku akukuminina atachikili mu 1914. Yehova washimuna wuprofwetu wamuBayibolu bayi neyi wahosha hohu hanichi chaakaku, ilaña walumbulula cheñi chakekalaña yuma hanyima yanichi chaaka. Muloña wachumichi, twakuhwelela chikupu netu “ifuku deneni daYehova didi kwakwihi.” (Zef. 1:14) Tweluka cheñi mudimu wunakukeñayi Yehova nindi tuzati, dikwila nawu kuleja antu amavulu “nsañu yayiwahi yaWanta.” (Mat. 24:14) Iyi nsañu anakuyishimwina mumatuña akushika ku 240 nikunyichidi yakubadika 1,000. Hitunakukeñeka kwiluka “ifuku niora” hakwila dinu twikaleña neyena dakuzata iwu mudimu walemaku.

TUNELUKI WANYI YEHOVA CHAKELAYI

8. “Nyidimu yaNzambi walala” yatalisha mudihi? (Mukwakutañisha 11:5)

⁸ Hitwelukaña “nyidimu yaNzambi walala” mpinji yejimaku. (Tañenu Mukwakutañisha 11:5.) Awa mazu atalisha kuyuma yakojejañayi Yehova kumwekana hela yetejañayi nindi yimwekani kulonda eli munakukeñayi. Tunateli kwiluka wanyi chuma chinaleteshi Yehova yeteji yuma yimu kumwekana hela chuma chikwilayi kulonda atukwashi. (Mas. 37:5) Chakala nankashi kwiluka nyidimu yaNzambi walala neyi chichakalaña kwiluka chakulaña mwana wudi mwivumu damama yawantu wunemiti, chuma chinakañanyi asayantisiti kutiyishisha kushika niyinu mpinji.

9. Chineli tuneluki wanyi yuma yinateli kwilayi Yehova kulonda atukwashi, kukalanyi kunateli kutumwekena?

⁹ Chineli tuneluki wanyi yuma yinateli kwilayi Yehova kulonda atukwashi, chinateli kutuletesha kushintajala hakufuukula. Tunateli kushintajala kuleka kwilahu yuma yimu kulonda tutandumuniku mudimu wetu wakushimwina, chidi neyi kupeleshaku chihandilu chetu hela kuya nakuzatila kudi kukankila kweneni kwawakakushimwina aWanta. Indi kwiji tunateli kutoñojoka netu Nzambi nakututiya kuwaha wanyi neyi nyidimu yitunakufwila mukuloñesha yinakushikijewa wanyi, neyi tunakumona wanyi yuma yayiwahi yinakufuma mumudimu wetu wakushimwina, hela neyi tunakumona kukala kunakutukañesha kuzata chiwahi mudimu wamukuloñesha.

10. Yilwilwinyi yalema yitwatela kwikala nayu chineli tuneluki wanyi jiika yuma yakelayi Yehova?

¹⁰ Chineli tuneluki wanyi jiika yuma yakelayi Yehova, chatukwashaña kwikala adizoza nawa adikehesha. Chumichi chatukwashaña kwiluka netu yitoñojoka yaYehova ninjila jindi jabadika jetu. (Isa. 55:​8, 9) Chatwikwashaña cheñi kumukuhwelela chikupu Yehova nakumushindamena netu wukutukwasha. Neyi mumudimu wakushimwina hela mudimu wamukuloñesha wutunakuzata mufuma yuma yayiwahi, twamushimekaña Yehova. (Mas. 127:1; 1 Kor. 3:7) Neyi yuma yibula kwenda chiwahi kwesekeja nachitwakuhwelela, twatela kwanuka netu Yehova wamonaña yuma yejima. (Isa. 26:12) Twelaña yuma yitukutwesha kwila nawa twakuhwelelaña netu Yehova wukwila jinashali. Tunakuhweleli netu wukutwinkaña wunlomboli wutukukeñaña hela chakwila hakwilaña mwenimu muchihayamisha neyi chelileñayi kunyimaku.—Yilw. 16:​6-10.

11. Yumanyi yitweluka yinateli kutukwasha?

¹¹ Tweluka netu Yehova mpinji yejima wamwekeshaña kukeña, wuñanji nawa wukweti maana. Tweluka netu walemesha nankashi yuma yitwamwililaña niyitwelilaña akwetu akakudifukula. Nawa tweluka netu Yehova mpinji yejima wakiswilaña antu atwalekañahu kwikala ashinshika kudi yena.—Heb. 11:6.

TUNELUKI WANYI YUMA YAKAMWEKANA KUMADIKI

12. Kwesekeja naYakoba 4:​13, 14, chumanyi chitwabula kwiluka?

¹² Tañenu Yakoba 4:​13, 14. Chalala chitwatela kubula kuvulamena chindi chakwila nawu twelukaña wanyi chakekala wumi wetu kumadiki. Muyinu nshakaminu yamakonu, wejima wetu atumwekenaña kudi yuma “yamwekanaña chakubula kukuhwelela.” (Mukwa. 9:11) Muloña wachumichi, tunateli kwiluka wanyi neyi chakwila yuma yitunakufwila kwila yakenda chiwahi hela neyi twakekala amomi kulonda twakamanishi yuma yitunakufwila kwila.

13. Tunateli kutiya ñahi muloña wakubula kwiluka yuma yikatumwekena kumbidi?

¹³ Chinateli kutukalila kuumika muloña tuneluki wanyi jiika kukala kukatumwekena kumbidi. Munjilanyi? Tunateli kutachika kwakama hayuma yikamwekana nawa chumichi chinateli kutuletesha kubula kwikala namuzañalu. Kukala kunateli kutumwekena mukukasumwisha niyuma yatama yitunabuli kukuhwelela, yinateli kutuletesha kuneña nankashi nikutiya kutama. Neyi yuma yitunakuchiñeja kushikijewa nehi, chatukataña kumuchima nawa twaneñaña.—Yish. 13:12.

14. Yumanyi yitwatela kwila hakwila twiikali namuzañalu walala? (Talenu cheñi nyevulu.)

¹⁴ Neyi tuumikaña kukala kutunakumona muchihandilu chetu, tukumwekeshaña netu twamukalakelaña Yehova muloña twamukeña bayi muloña wakuditiyisha etu aweni kuwahaku. Nsañu yekala muBayibolu yamwekeshaña nawu twatela kukuhwelela wanyi netu Yehova wukutukiñaña mukukala kwejima kutukumonaña, nawa yamwekeshaña nawu wafuukwilaña chadimu wanyi yuma yikatumwekena kumbidi. Weluka nindi muzañalu wetu hiwashindamena hakwiluka yuma yikamwekana kumbidiku. Ilaña washindamena hakumulomba netu yatulomboleña nikumwovwahila. (Yere. 10:23) Neyi tulombaña kudi yena hampinji yitunakufuukula, chidi hohu neyi tunakuhosha netu: “Neyi Yehova neteji, twakahanda nawa twakela ichi hela china.”—Yak. 4:15.

15. Yumanyi yitweluka kutalisha hayuma yikamwekana kumbidi?

¹⁵ Hela chakwila tweluka wanyi yuma yikamwekana ifuku dakumadiki, ilaña tweluka netu Yehova watukana wumi wahaya nyaaka chili mwiwulu hela hanu hamaseki. Tweluka netu hatwambañaku nawa kwosi chuma chinateli kumukañesha kwila yuma yejima yakanayi. (Tit. 1:2) Yena hohu diyi wunateli “[kushimuna] yuma yikamwekana kumbidi, nawa kufuma kumashiita [washimunaña] yuma yichidi kanda ayili.” Dichelileñayi kunyima nawa dichakelayi nikumbidi. (Isa. 46:10) Tweluka chikupu netu kwosi chuma chinateli kumukañesha Yehova kutumwekeshela kukeñaku. (Rom. 8:​35-39) Wukutwinkaña maana, wukutukundejaña nawa wukutwinkaña ñovu yakumika kukala kudi kwejima kutukumona. Twatela kukuhwelela netu Yehova wukutukwashaña nikutukiswila.—Yere. 17:​7, 8.

TUKUTWESHA KWILUKA CHIKUPU WANYI CHATWILUKAYI YEHOVA

16. Yumanyi yelukayi Yehova hadi etu, nawa chumichi chayileteshaña kutiya ñahi? (Isamu 139:​1-6)

¹⁶ Tañenu Isamu 139:​1-6. Nleñi yetu weluka chitwatuñewa nawa weluka yuma yatukatishaña kumujimba niyatukabishaña muyitoñojoka. Watwakamenaña mpinji yejima. Weluka yuma yitwahoshaña niyuma yidi mumuchima wetu, nawa weluka yuma yejima yitwelaña nichaleteshaña tuyileña. Mwanta Davidi wahosheli nindi, Yehova mpinji yejima watuhembaña nikutukwasha. Wenowu muzañalu wutwatiyaña hakwiluka netu Mwanta Wambadika wakuleña kwejima, Nleñi wañovu jejima waleñeli iwulu niiseki, watwakamenaña muniyi njila! Davidi wahosheli nindi: “Kwiluka kwamuchidiwu kunankumishi maana. Kudi hahalehi chikupu, kunasweji, kwila nishikahu nehi.”—Mas. 139:​6, tth.

17. Muloñadi mpinji jikwawu chichinateli kutukalila kwiteja netu Yehova watwiluka chiwahi?

¹⁷ Hadaha muloña wayuma yamwekeni muchisaka chetu, muchisemwa chetu, indi kwiji yuma yitwakuhweleleli kunyima henohu kanda tudizi chalala, chinateli kutukalila kumumona Yehova netu hiTata yetu wukweti kukeña, watwakamenaña. Indi kwiji tunateli kutoñojoka netu yiluwa yitwakoñeli kunyima yadiña yamaneni nankashi chakwila Yehova kwila yakeña nikutwiluka nehi nawa netu wudi kwakulehi nanetu. Davidi niyena mpinji yimu dichatiyiliyi. (Mas. 38:​18, 21) Hadaha muntu wunakuzata nañovu kulonda yahimpi yilwilu yindi nawa yatachiki kulondela nshimbi jaNzambi jaloña, nateli kudihula nindi, ‘Neyi Nzambi wañiluka chiwahi, muloñadi chinakukeñelayi nindi nileki kwila yuma yantiyishaña kuwaha nankashi muchihandilu?’

18. Muloñadi chichalemena kwiteja netu Yehova watwiluka chiwahi kubadika chitwadiluka etu aweni? (Talenu cheñi nyevulu.)

¹⁸ Twatela kwiteja netu Yehova watwiluka chiwahi kubadika chitwadiluka etu aweni nawa wamonaña yuma yayiwahi mudi etu yitunateli kukañanya kumona etu aweni. Ilaña hela chakwila wamonaña yiluwa yitwakoñaña nawa welukaña chaleteshaña tutiyeña nikwila muniyi njila, watukeña. (Rom. 7:15) Neyi twiteja netu Yehova watumonaña nindi tunateli kwila yuma yayiwahi, chumichi chikutukwasha kutwalekahu kumukalakela nakashinshi ninamuzañalu.

19. Yumanyi yitweluka chikupu hadi Yehova?

¹⁹ Tweluka netu Yehova hikukeña. Hitwajinokaña hachumichi hela hantiku. (1 Yow. 4:8) Tweluka netu nshimbi jindi jaloña jamwekeshaña chatukeñayi, nawa wakeñaña mpinji yejima twikaleña nachihandilu chamuzañalu. Tweluka netu Yehova wakeñaña nindi twakekali nawumi wahaya nyaaka. Wahanini ifutu danyiloña kulonda chumichi chikatwesheki. Chawaana chefutu danyiloña chatukwashaña kwiluka netu tunateli kumukalakela Yehova hela chakwila twakoñaña yiluwa. (Rom. 7:​24, 25) Nawa tweluka netu “Nzambi wabadika nyichima yetu nawa weluka yuma yejima.” (1 Yow. 3:​19, 20) Yehova wamonaña yuma yejima hadi etu nawa watukuhwelela tunateli kuzata chiwahi hakwila keñelu yindi.

20. Yumanyi yikutukwasha kutondolwela kusweja kwakama?

²⁰ Yehova hatujindahu nsañu yidi yejima yitwatela kwilukaku. Neyi tudikehesha nakwiteja ichi chuma, tukutondolwela kusweja kwakama hayuma yitwabula kwiluka nawa tukushaña muchima hayuma yalema. Neyi twilaña mwenimu, tukumwekesha netu twamukuhwelela chikupu Yehova, “Weluka yuma yejima.” (Yoba 36:4) Hela chakwila tweluka wanyi yuma yikwawu chayinu mpinji, tunakutalila mpinji yakatudizishañayi Nzambi Wabadika yuma yayiha haya nyaaka nawa yitwakatwalekahu kudiza yuma yayiha hadi yena.—Mukwa. 3:11.