izilenu kuMazu Akukumishaku Ahosheli Amayala Ashinshika

1. Muloñadi chitwatela kudizila kudi akula dehi?

WEJIMA wetu twakeñekaña wunlomboli hakwila tufuukuli yuma yalema muchihandilu. Tunateli kuwana iwu wunlomboli kudi akulumpi nikudi akaKristu amakwawu apama. Neyi hiyakulumpi kutubadika, bayi tushikena kudiwula kufumba kwawu nakutoñojoka netu jinakutulejawu jazatikileña hohu kunyimaku. Yehova wakeñaña nindi tudizileña kudi akula dehi. Anashakami yaaka yayivulu kutubadika, anamoni nikwiluka yuma yayivulu nawa akweti maana.​—Yoba 12:⁠12.

2. Yumanyi yitukuhanjekahu muchinu chibaaba?

² Mumpinji yakunyima, Yehova wazatishileña antu ashinshika akula dehi kulonda akoleshi nikulombola antu jindi. Chakutalilahu, toñojokenu hadi Mosi, Davidi nikapostolu Yowanu. Adiñaku mpinji yashiyashana, nawa yuma yahitilimu yambukili chikupu. Chadiñawu kwakwihi nakufwa, alejeleña atwansi kufumba kwakuwahi. Awa amayala ejima akula dehi ashinshika, akonkomweneneña hachichalemena kumwovwahila Nzambi. Yehova wahembeli mazu awu amaana kulonda atukwasheña makonu. Chili tudi atwansi hela akulumpi, neyi tuhitulukaña mukufumba kwawu, kunateli kutukwasha. (Rom. 15:4; 2 Tim. 3:​16) Muchinu chibaaba, tukuhanjeka hamazu akukumishaku ahosheliwu awa amayala asatu akula dehi niyuma yitunateli kudizila kuyuma yahosheliwu.

“MWAKASHAKAMA YAAKA YAYIVULU”

3. Nyidimwinyi yazatiliyi Mosi?

³ Mosi wadihanini kudi Yehova namuchima wejima. Wadiña kaprofwetu, nsompeshi, mukulumpi wamashidika nawa nsoneki. Mosi welukili yuma yayivulu nankashi muchihandilu chindi! Walombweli muza waIsarela kufuma muwuduñu muEjipitu nawa wamweni namesu kapu yihayamisha yaYehova yayivulu. Yehova wamuzatishili kusoneka nyikanda yakutachikilahu yitanu yamuBayibolu, Isamu 90, nawa hadaha niIsamu 91. Watela diyi wasonekeli cheñi nimukanda waYoba.

4. Anyi akolesheliyi Mosi, nawa muloñadi?

⁴ Henohu kunashali mpinji yanti nakufwa, hadiñayi nayaaka 120, Mosi wapompesheli hamu aIsarela ejima nakuyanukisha hayuma yamweniwu niyahitilimu. Hachidiñawu atwansi, antu amakwawu amutiyilileña haniyi mpinji amweni yinjikijilu niyihayamisha yayivulu kunyima yakoñeliyi Yehova, kushilahu niwunsompeshi windi wasompesheliyi aEjipitu. (Kwid. 7:​3, 4) Endeli haKaluñalwiji Kachinana haambukili menji nawa amweni chajilumukili mashidika aFwaru. (Kwid. 14:​29-​31) Hampinji yadiñawu mwisaña, amweni Yehova chayikiñiliyi nikuyakamena. (Kuhit. 8:​3, 4) Dichi muza chiwadiña kwakwihi nakwiñila Mwituña daChikaninu, Mosi wekalili nakukooleka haniyi mpinji kwakukolesha antu.a

5. Mazu aMosi akukumishaku ekala haKuhituluka 30:​19, 20, ayikwashili aIsarela kukuhwelela chumanyi?

⁵ Mosi wahosheli nindidi? (Tañenu Kuhituluka 30:​19, 20.) Muza waIsarela wachiñejeleña kudiluñisha yuma yayiwahi kumbidi. Kuhitila mukuyikiswila kudi Yehova, aIsarela adi kushakama mpinji yayilehi mwituña dayikaniniyi. Nawa idi ituña dadiña dalubanji nawa dikweti wushi! Mosi wayilumbulwilili chidadiña idi ituña nindi: “Nyisumba yamaneni nawa yayiwahi yiwabulili kutuña, matala enzala yuma yejima yayiwahi yashiyashana yiwabulili kukalakela, mashima akupokola mumalola iwabulili kupokola, matempa anyivinyu ninyitondu yanyiolivi jiwabulili kudima.”​—Kuhit. 6:​10, 11.

6. Muloñadi Nzambi chetejeleliyi nyuza yikwawu kushinda aIsarela?

⁶ Mosi wayisoñamishili cheñi aIsarela. Hakwila atwalekihu kushakama mwituña dawu dalubanji nawa dawushi, ateleleli kwovwahila nshimbi jaYehova. Mosi wayikonkomweneni “kutonda wumi” kuhitila mukumutiyilila Yehova “nikukakela kudi yena.” Hela chochu, aIsarela amukaanini Yehova. Dichi haniyi mpinji Yehova wayitejeli aAsiriya nawa mukuhita kwampinji aBabiloni kulonda ayishindi aIsarela nikuyitwala muwunkoli.​—2 Anya. 17:​6-8, 13, 14; 2 Kushi. 36:​15-​17, 20.

7. Yumanyi yitunateli kudizila kumazu ahosheliyi Mosi? (Talenu cheñi mwevulu.)

⁷ Yumanyi yitunakudizilaku? Kwovwahila kwatwalaña kuwumi. Neyi chadiñawu aIsarela kwakwihi nakwiñila Mwituña daChikaninu, ninetu tudi kwakwihi nakwiñila mukaayi kakaha katukanayi Nzambi, mutwakamona iseki chakadibalumunawu nakwikala paradisa. (Isa. 35:1; Luka 23:43) Diyabolu niandemoni jindi akekalaku wanyi. (Chim. 20:​2, 3) Kudifukula kwakutwamba hikwakafumishahu cheñi antu kudi Yehovaku. (Chim. 17:16) Nfulumendi jawantu hijakakabishahu cheñi antu anakuyuulawuku. (Chim. 19:​19, 20) Muparadisa himwakekalahu ambanjiku. (Mas. 37:​10, 11) Antu kwejima kwakashakamañawu akwovwahilaña nshimbi jaYehova jaloña, jaletaña kunuñañana nikuwunda. Dichi, akadikeña wumu namukwawu nikudikuhwelela. (Isa. 11:⁠9) Yenoyu yuma kuwaha yitwachiñejaña! Chasweja kubadika, neyi tumwovwahilaña Yehova, twakatwalekahu kushakama muparadisa hamaseki, bayi neyi hadi yaaka nkulakaji hohuku, ilaña haya nyaaka nanyaaka.​—Mas. 37:29; Yow. 3:​16.

8. Chikaninu chakushakama haya nyaaka chakwashili ñahi mishonali wumu wunazati yaaka yayivulu? (Yuda 20, 21)

⁸ Neyi tutwalekahu kutoñojoka hachikaninu chaNzambi chawumi wahaya nyaaka, tukukakela kudi yena hela chakwila tukumona kukala kwamuchidinyi. (Tañenu Yuda 20, 21.) Ichi chikaninu chinateli kutukwasha cheñi kushinda kuzeyazeya kutukweti. Mishonali wumu wunazati yaaka yayivulu muAfrica walwishileña nakuzeyazeya kwakumujimba hadi mpinji yayilehi, wahosheli nindi: “Chinelukili nami iku kukala kwadi kukañesha kuchiñeja kwami kwakushakama haya nyaaka, kwanletesheli kuzata nañovu kulonda nitweshi kushinda iku kukala nikutwalekahu kulomba nakulemba kudi Yehova. Nawukwashu windi, natwesheli kwimika iku kukala mushindu.”

“YUMA YEJIMA YAKAKUWAHILAÑA”

9. Kukalanyi kwamweniyi Davidi muchihandilu chindi?

⁹ Davidi wadiña mwanta wabadika. Wadiña cheñi ñimbi, mukakusoneka nkumbu, mushidika, kaprofwetu, nawa wamweni kukala kwakuvulu. Hadi yaaka yayivulu, washakamineña neyi itunduka, nakumutemuka Mwanta Sawulu wadiña nechima. Chekaliliyi mwanta, Davidi cheñi watemukili kulonda abuli kumujaha hampinji yafwilileñayi mwanindi Abisalomi kuhukula itanda dindi. Hela chakwila Davidi wamweni kukala kwamuchidiwu nikuzeyazeya kwadiñayi naku, watwalekelihu kwikala washinshika kudi Nzambi kushika nimpinji yafwiliyi. Yehova wamulumbulwili nindi ‘iyala anatiyiyi kuwaha mumuchima Windi.’ Mwamweni, twatela kutiyilila kukufumba kwaDavidi kwalema!​—Yilw. 13:22; 1 Anya. 15:⁠5.

10. Muloñadi Davidi chamufumbililiyi mwanindi Solomoni, wamusinsili?

¹⁰ Chakutalilahu, toñojokenu hakufumba kwamufumbiliyi Davidi mwanindi Solomoni, wamusinsili. Iwu kansi weyala amutondeli kudi Yehova kutwalekahu kutiyakesha kudifukula kwalala nikutuña tembeli yakumulemeshelamu Nzambi. (1 Kushi. 22:⁠5) Kwadiña kukala kwakuvulu kwadi kumonayi Solomoni. Davidi wamulejeli nindidi? Tutalenu.

11. Kwesekeja na 1 Anyanta 2:​2, 3, Davidi wamufumbili Solomoni nindidi, nawa awa mazu ashikijeweli ñahi? (Talenu cheñi mwevulu.)

¹¹ Davidi wahosheli nindidi? (Tañenu 1 Anyanta 2:​2, 3.) Davidi wamulejeli mwanindi nindi neyi amwovwahila Yehova, yuma yakamuwahilaña muchihandilu chindi. Nawa hadi yaaka yayivulu, yuma yamuwahilileña nankashi Solomoni. (1 Kushi. 29:​23-​25) Watuñili tembeli yayiwahi, wasonekeli nyikanda yikwawu yamuBayibolu nawa mazu indi ekala munyikanda yikwawu yamuBayibolu. Wayili mpuhu muloña wamaana indi nimaheta. (1 Anya. 4:​34) Ilaña neyi chalumbulwiliyi Davidi, yuma yadi kumuwahilaña hohu Solomoni neyi amwovwahilaña Yehova Nzambi. Chawushona, mukuhita kwampinji Solomoni watachikili kudifukula kudi anzambi acheñi. Yehova walekeli kumutiya kuwaha Solomoni nikumwinka maana akuyuula antu mukuloña nawa munjila yayiwahi.​—1 Anya. 11:​9, 10; 12:⁠4.

12. Yumanyi yitunateli kudizila kumazu ahosheliyi Davidi?

¹² Yumanyi yitunakudizilaku? Mukwovwahila mwafumaña yuma yayiwahi. (Mas. 1:​1-3) Hela chochu, Yehova watukana wanyi kutwinka maheta nikulema neyi kwadiña naSolomoni. Ilaña neyi tumwovwahilaña Nzambi yetu, wukutwinkaña maana akutukwashaña kufuukula chiwahi. (Yish. 2:​6, 7; Yak. 1:⁠5) Yishina yindi yinateli kutulombola hakufuukula yuma yalema yindi neyi mudimu, shikola, yisela nimali. Kuzatisha maana aNzambi kukutukiña kuyuma yinateli kutukatisha haya nyaaka. (Yish. 2:​10, 11) Tukwikala nawamabwambu amawahi. Nawa iwu wunlomboli wukukwasha chisaka chetu kwikala namuzañalu.

13. Chumanyi cheliliyi Carmen hakwila ekali namuzañalu muchihandilu?

¹³ Carmen, washakamaña kuMozambique, watoñojokeli nindi kuya kushikola yahewulu dikunateli kumuletela muzañalu. Wayili kuyunivesiti nakudiza jakutuña matala amaneni. Wasonekeli nindi: “Nakeñeli nankashi mudimu wunadizileña. Ilaña wammanishilileña mpinji niñovu. Nayileña kushikola na 7:30 yantetemena nakushika 6:00 koloku yamelela. Chankalilileña kuya nakupompa nawa wubwambu wami naYehova watachikili kufunta hanyima. Mumuchima wami, nelukili nami nakalakeleleña anyanta ayedi.” (Mat. 6:​24) Walombeleli hakukala kwadiñayi naku nawa wasandujoleli munyikanda yetu. Wabombelelihu nindi: “Hanyima yakunfumba kudi amanakwetu apama nikudi amama, nafuukwilihu kufuma hayunivesiti nakuya nakumukalakela Yehova mumudimu wampinji yejima. Chumichi chankwashili kufuukula yuma yayiwahi muchihandilu chami nawa naditoñeshaña wanyi.”

14. Nsañwinyi yayeni yahosheli aMosi naDavidi?

¹⁴ Mosi niDavidi amukeñeli Yehova nawa elukili nawu chalema nankashi kumwovwahila. Mumazu akukumishaku ahosheliwu, akolesheli antiyilili jawu nawu embujoleña yuma yeliliwu wena kuhitila mukukakela kudi Yehova Nzambi yawu. Wejima wawu ayedi ahosheli cheñi mazu akusoñamisha nawu antu akumushiya Yehova, wakaleka kuyitiya kuwaha nawa hakayikiswila nkisu yayikaniniyiku. Kufumba kwahaniniwu kwalema nikudi etu makonu. Hela chochu, chimwahitili yaaka yayivulu, kambuña aYehova mukwawu wamwekesheli chichalemena kwikala washinshika kudi Nzambi.

“KWOSI CHUMA CHANZAÑALESHAÑA NANKASHI”

15. Yumanyi yahitilimu kapostolu Yowanu muchihandilu chindi?

¹⁵ Yowanu wadiña kapostolu akeñeliwu nankashi kudi Yesu Kristu. (Mat. 10:2; Yow. 19:26) Yowanu wayileña naYesu mumudimu windi wejima wakushimwina, kumona yihayamisha yakoñeleñayi, nawa watwalekelihu kwikala nindi hamu nihampinji yamweneñayi kukala kwamaneni. Wamweneña chamujahileñawu Yesu nawa wamumweni nihanyima yakumusañula. Wamweni cheñi chataandileña nyidimu yawakaKristu mumafuku awakaKristu akusambila kufuma mukadizanvu kanyanya kawantu ashinshika sampu ‘nsañu yayiwahi anayishimwini kuyuma yejima yekala mwishina dewulu.’​—Kol. 1:​23.

16. Anyi ahetelaña munyikanda yasonekeliyi Yowanu?

¹⁶ Chadiñayi kwakwihi nakufwa, Yowanu wadiña nakukooleka kwakusonekaku Izu daNzambi donenewa. Wasonekeli “chimwekeshu chaYesu Kristu” chakuhayamisha. (Chim. 1:⁠1) Yowanu wasonekeli mukanda waNsañu Yayiwahi wekala nejina dindi. Wasonekeli cheñi nyikanda yisatu yonenewa. Mukanda windi wamuchisatu wasonekeleli mukaKristu washinshika wejina daGayusi, amweneñawu kudi Yowanu neyi mwanindi wakuspiritu akeñayi. (3 Yow. 1) Hayina mpinji, kwatela kwadiña antu amavulu amweneñayi Yowanu neyi anyanindi akuspiritu. Yuma yasonekeli iwu muntu wakula dehi washinshika yakoleshaña akakumulondela Yesu ejima kushika nimakonu.

17. Kwesekeja na 3 Yowanu 4, chumanyi chaletaña muzañalu waweni?

¹⁷ Yumanyi yasonekeliyi Yowanu? (Tañenu 3 Yowanu 4.) Yowanu wasonekeli hamuzañalu wafumaña mukumwovwahila Nzambi. Hampinji yasonekeleñayi Yowanu mukanda windi wamuchisatu, antu amakwawu ataandishileña ntañishilu yakutwamba nakuleta chaambu. Hela chochu, amakwawu atwalekelihu “kwenda muchalala.” Amwovwahilileña Yehova nawa endeleña “kwesekeja nanshimbi jindi.” (2 Yow. 4, 6) Awa akaKristu ashinshika amuzañalesheli Yowanu niYehova.​—Yish. 27:⁠11.

18. Yumanyi yitunateli kudizila kumazu ahosheliyi Yowanu?

¹⁸ Yumanyi yitunakudizilaku? Kwikala washinshika kwaletaña muzañalu. (1 Yow. 5:⁠3) Chakutalilahu, twazañalalaña neyi twiluka netu tunakumutiyisha Yehova kuwaha. Wazañalalaña neyi amona tunakukaana kweseka kwamukaayi nakwiteja chalala. (Yish. 23:15) Amakwawu mwiwulu niwena azañalalaña. (Luka 15:10) Ninetu twazañalalaña neyi tumona amanakwetu niahela anatwalekihu kwikala ashinshika, sweje-e hampinji yinakumonawu kukala nikweseka. (2 Tes. 1:⁠4) Dichi neyi kanu kaayi kanahiti dehi, twakazañalala kwiluka netu twatwalekelihu kwikala ashinshika kudi Yehova nimukaayi kayuulileñawu kudi Satana.

19. Muhela wejina daRachel wahosheli nindidi kutalisha hakudizisha antu chalala? (Talenu cheñi mwevulu.)

¹⁹ Twazañalalaña nankashi neyi tudizisha antu kulonda amwiluki Yehova. Rachel, washakamaña kuDominican Republic, watiyaña nindi kudizisha muntu kulonda amwiluki Nzambi wamuwahi itwakalakelaña hikukooleka chikupu. Neyi atoñojoka hadi anyanindi akuspiritu, wahoshaña nindi: “Chankalilaña kulumbulula muzañalu wunatiyaña neyi nimona antu inadizishaña chinakuswejawu kumukeña Yehova, kumukuhwelela chikupu nikuhimpa yihandilu yawu kulonda amuzañalesheña. Iwu muzañalu wabadika ñovu yinazatishaña nikudihana kunadihanaña hakwila niyidizishi.”

YUMA YAYIWAHI YAFUMAÑA MUKWOVWAHILA MAZU AKUKUMISHAKU AWAMAYALA ASHINSHIKA

20. Yumanyi yitwelaña yelileña Mosi, Davidi niYowanu?

²⁰ Mosi, Davidi niYowanu ashakaminiku hampinji yashiyashana nawa amweni yuma yashiyashana yambukaku nayitwamonaña makonu. Ilaña kudi yuma yayivulu yitwelaña yadifwana nayelileñawu. Akalakeleleña Nzambi walala, ninetu dichitwelaña. Kufwana wena, twalombaña kudi Yehova, twamushindamenaña nawa twakeñaña wunlomboli windi. Kufwana ana amayala akunyima, tunakuhweleli netu Yehova wakakiswila chikupu antu amwovwahilaña.

21. Yumanyi yayiwahi yakatambwilawu antu atiyililaña kukufumba kwawamayala akula dehi ashinshika adi neyi Mosi, Davidi niYowanu?

²¹ Dichi, tutiyilileña kumazu akukumishaku ahosheli ana amayala akula dehi kuhitila mukwovwahila nshimbi jaYehova. Chitwela mwenimu, yuma yejima yitukwilaña yikutuwahilaña. Twakekala nawumi nawa “[twakashakama] yaaka yayivulu,” eña, haya nyaaka! (Kuhit. 30:20) Nawa twakekala namuzañalu wakumutiyisha kuwaha Tata yetu wamwiwulu wakukeña, owu washikijaña yikaninu yindi yejima munjila yitunabuli kukuhwelela hela kufwikija.​—Efwe. 3:​20.