Chikasa chaYehova Chachihi Wanyi

1. Mosi wamwekesheli ñahi nindi wamukuhweleleli Yehova hampinji yayilombweleñayi aIsarela kufuma muEjipitu?

HAKACHI kawantu ashimunawu mumukanda waAHeberu amwekesheli chikuhwelelu, Mosi diyi wamwekesheli chikuhwelelu chabadika. (Heb. 3:​2-5; 11:​23-25) Wamwekesheli chikuhwelelu hampinji yayilombweliyi aIsarela kufuma muEjipitu. Wakaanini kumutiyisha woma kudi Fwaru niamashidika indi. Muloña wakumukuhwelela Yehova, walombweli antu nakuhita haKaluñalwiji Kachinana nawa mukuhita kwampinji wayilombweli mwisaña. (Heb. 11:​27-29) AIsarela amavulu alekeli kumukuhwelela Yehova nawu wukuyakamenaña, ilaña Mosi watwalekelihu kumukuhwelela Nzambi yindi. Mosi watwalekelihu kwikala nachikuhwelelu, muloña Nzambi wahanineña yakuda nimenji muchihayamisha kulonda antu atwalekihu kuhanda mwisaña mwominina.a—Kwid. 15:​22-25; Mas. 78:​23-25.

2. Muloñadi Nzambi chamwihwililiyi Mosi nindi: “Komana chikasa chanami Yehova chachihi”? (Kuchinda 11:​21-23)

² Hela chakwila Mosi wadiña nachikuhwelelu chakola, chimwahitili chaaka chimu kufuma hayamwininiwu aIsarela muchihayamisha, watachikili kujinoka wuswa waYehova wakuyinka antu Jindi mbiji. Mosi welukili wanyi Yehova chadi kuloñeshayi mbiji yadi kudiishayi antu amavulu nankashi ateekeleleña mwisaña mwominina. Yehova wamwakwili Mosi nindi: “Komana chikasa chanami Yehova chachihi?” (Tañenu Kuchinda 11:​21-23.) Muniyi nsona, mazu akwila nawu “chikasa chanami Yehova” atalisha kuspiritu yajila yaNzambi, hela ñovu yindi yazatikaña. Chidi neyi Yehova wamwihwileña Mosi nindi, ‘Wunakutoñojoka neyi nukukañanya kwila yuma yinnahoshi nami nukwila?’

3. Muloñadi chuma chamumwekeneni Mosi niaIsarela chichinalemeni kudi etu?

³ Komana mwajinokahu dehi neyi chakwila Yehova wukuyinka yuma yakumujimba yimunakukeña hakwila mutwalekihu kuhanda? Neyi mwajinokahu dehi hela nehi, tuhanjekenu hachuma chamumwekeneni Mosi niaIsarela alekeli kumukuhwelela Nzambi nawu wukuyinkaña yuma yinakukeñawu. Yishina yamuNsona yitukuhanjekahu yikutukwasha kukuhwelela chikupu netu chikasa chaYehova chachihi wanyi.

DIZILENU KUDI MOSI NIAISARELA

4. Chumanyi chatela chaletesheli antu amavulu atachiki kujinoka nawu Yehova hakuyinkaña yuma yakumujimbaku?

⁴ Talenu yuma yamwekeni. Muza waIsarela kushilahu “antu amavulu ashiyashana” abulili kwikala aIsarela, adiña mwisaña deneni hadi mpinji yayilehi hampinji yafumineñawu muEjipitu nakuya Mwituña daChikaninu. (Kwid. 12:38; Kuhit. 8:15) Antu abulili kwikala aIsarela azeyeli nakuda manina nawa aIsarela amavulu atiyileña chochimu, niwena atachikili kutooba. (Kuch. 11:​4-6) Antu atachikili kwanuka yakuda yadiileñawu muEjipitu. Antu chatachikiliwu kumudilila Mosi, watoñojokeleña nindi yena diyi watela kuyinka yuma yakeñeleñawu.—Kuch. 11:​13, 14.

5-6. Yumanyi yitunakudizila kuchayiluwañesheliwu aIsarela amavulu kudi izaza dawantu adibombeli nawena?

⁵ Chakadi nikujina, aIsarela ayiluwañesheli kudi izaza dawantu adibombeli nawena abulili kwikala namuchima wakusakilila. Ninetu anateli kutuluwañesha kudi antu amakwawu akweti muchima wakubula kusakilila, nakutukojeja kubula kulemesha yuma yinakutwinkayi Yehova. Chumichi chinateli kutumwekena neyi twanukaña nakufwila cheñi yuma yitwadiña nayu kunyima hela tutiyilaña akwetu ichima nayuma yikwetiwu. Tukwikalaña namuzañalu nankashi neyi tuzañalalaña nayuma yitukweti, hichikweti muloña nayuma yitudi nayuku.

⁶ AIsarela ateleli kwanukaña nawu Nzambi wayilejeli nindi neyi anashiki dehi mumukala wawu wawuha, akadiluñishaña yuma yakumujimba yayivulu. Ichi chikaninu chateleleli hohu kushikijewa neyi anashiki dehi Mwituña daChikaninu, bayi hachidiñawu halwendu lwawu mwisañaku. Munjila yoyimu, chatela tusheña nankashi muchima hayuma yitwatela kubula kwikala nayu muyinu nshakaminu yamakonu, tukwila chiwahi neyi tukutoñojokaña hayuma yatukanayi Yehova kutwinka mukaayi kakaha. Tunateli cheñi kutoñojokaña chikupu hansona jinateli kutukwasha kumukuhwelela nankashi Yehova.

7. Muloñadi chitwatela kukuhwelela netu chikasa chaYehova chachihi wanyi?

⁷ Hela chochu, munateli kudihula chuma chaletesheli Nzambi amwihuli Mosi nindi: “Komana chikasa chanami Yehova chachihi?” Yehova watela wamukwashileña Mosi kutoñojoka hañovu yikweti chikasa chindi nihayuma yichinateli kwila. Yehova wayinkeleña aIsarela mbiji yayivulu hela chakwila adiña mwisaña mwamweni. Nzambi wamwekesheli chekala ñovu jindi “nachikasa chañovu nawa chakwolola.” (Mas. 136:​11, 12) Dichi neyi tunakumona kukala bayi tujinokaña netu chikasa chaYehova chikukañanya kutukwasha hamuntu-hamuntuku.—Mas. 138:​6, 7.

8. Tunateli kutondolwela ñahi kukoña chiluwa chochimu neyi chakoñeliwu antu amavulu mwisaña? (Talenu cheñi mwevulu.)

⁸ Hashimbwili wanyi Yehova wahanini mbiji, wayinkeli antu tuleñami twatuvulu nankashi. Hela chochu, aIsarela hiyamusakililili Nzambi hanichi chihayamishaku. Ilaña amavulu hakachi kawu adiña nalwisu. Antu akaamini wanyi, apompesheli tuleñami twatuvulu chikupu. Yehova wayihililili nankashi “antu afwilileña yakuda” nawa wayibabesheli. (Kuch. 11:​31-34) Kudi yuma yitunateli kudizila kuniyi yuma yamwekeni. Twatela kwikala asoñama kulonda tubuli kwikala nalwisu. Chili twaheta hela tudi atuzweñi, twatela kufwilaña ‘kudilumbikila maheta mwiwulu’ kuhitila mukukolesha wubwambu wetu naYehova niYesu. (Mat. 6:​19, 20; Luka 16:9) Neyi twilaña mwenimu, tukukuhwelelaña chikupu netu Yehova wukutwinkaña yuma yitunakukeña.

9. Yumanyi yitwatela kukuhwelela chikupu?

⁹ Yehova wololaña chikasa chindi nakukwasha antu jindi makonu. Hela chochu, ichi hichinayi mukwila nawu hitwakabula kukaankilahu mali hela yakudaku.b Ilaña Yehova hakatushiya chisayikilaku. Wukutukwashaña hampinji yitunakumona kukala kwashiyashana. Tukutiyishisha ichi chalala hitukuhanjekaña hayuma yiyedi mutunateli kumwekeshela netu twamukuhwelela Yehova netu wakwolola chikasa chindi kulonda akatwinki yuma yakumujimba yitunakaankili: (1) neyi tunakumona kukala kwamali nawa (2) neyi tunakufuukula yuma yakumujimba yakatukwasha kumbidi.

NEYI TUNAKUMONA KUKALA KWAMALI

10. Kukala kwamuchidinyi kwamali kutunateli kumona?

¹⁰ Chitunakuswina kwakwihi nakukuma kwanshakaminu yamakonu, twatela kukuhwelela netu yuma yikutaminañaku hohu-u. Mapumba muloña wansañu jamapolitiki, majita, wubanji wadimwekenaña hela yipupu yinakwinza jinateli kuletesha wuseya wayuma kukandama, nyidimu yetu yakumujimba kumana, kujimbesha maheta etu hela matala etu. Hadaha tukutachika kukeña mudimu wacheñi kwiluña kutwashakamaña, indi kwiji tukufuukulahu kubuuka nachisaka chetu nakuya kwiluña dacheñi kulonda tuyikeñeleña yuma yakumujimba. Yumanyi yinateli kutukwasha kufuukula munjila yikumwekesha nawu twakuhwelela muwukwashu waYehova?

11. Yumanyi yinateli kuyikwasha kwiluka chimwatela kwila nakukala kwamali kumunakumona? (Luka 12:​29-31)

¹¹ Chuma chabadika nawa chachiwahi chimwatela kwila hikumulejamu Yehova kwakama kwenu kwejima. (Yish. 16:3) Mulombenu Yehova ayinki maana akuyikwasha kufuukula chachiwahi nikwikala namuchima wawunda, kulonda mutondolweli “kusweja kwakama” hayuma yimunakuhitamu. (Tañenu Luka 12:​29-31.) Mulombenuña kulonda ayikwashi kwikala namuchima wakuzañalala nayuma yimukweti muchihandilu. (1 Tim. 6:​7, 8) Sandujolenu munyikanda yetu kulonda muwani yuma yikuyikwasha chimwatela kwila nakukala kwamali kumunakumona. Nsañu yekela ha jw.org yinakwashi antu amavulu nakukala kwamali kunakumonawu muchihandilu.

12. Malwihwinyi anateli kumukwasha mukaKristu kufuukula yuma yayiwahi yinateli kukwasha chisaka chindi?

¹² Amakwawu anaholokeli mukweseka kwakwiteja mudimu wakuya nakuzatila kwakulehi nakushiya chisaka chawu, ilaña kufuukula muniyi njila kakavulu mwafumaña yuma yatama. Henohu kanda mwiteji mudimu wawuha, bayi mutoñojoka hohu hayuma yimukwikala nayu muloña wamali imukutambulañaku, ilaña toñojokenu nihawubwambu wenu naYehova chiwukwikala. (Luka 14:28) Dihulenu nenu: ‘Wulu wetu wukwikala ñahi neyi nimushiya mwinikwami nakuya nakuzatila kwakulehi? Komana nukutweshaña kuya kukupompa kwejima, kushimwina nikudikunda nawamanakwetu niahela?’ Neyi mukweti anyana, dihulenu cheñi ilu lwihu lwalema nenu: ‘Nukukulishaña ñahi anyanami “nakufumba nikukonkomwena kwaYehova” neyi niyishiya nakuya nakuzatila kwakulehi?’ (Efwe. 6:4) Itejenu yitoñojoka yaNzambi yiyilomboleña bayi antu amuchisaka chenu hela amabwambu jenu abula kulemesha yishina yamuNsonaku.c Tony washakamaña kukabeta kamujika waAsia, amulejeli nawu kudi nyidimu yakutambula mali amavulu yatela kwiñilayi mwituña dacheñi. Ilaña, hanyima yakulombelahu haniyi nsañu nikuhanjekahu nañodindi, wafuukwilihu kubula kwiñila mudimu wudi wejima haniyi nyidimu, nawa akehesheliku yuma yatela kulandañawu muchisaka chawu. Neyi anuka yuma yamwekeni, Tony wahoshaña nindi: “Nakwashi antu amavulu kumwiluka Yehova nawa anyanetu akeña chalala chikupu. Chisaka chetu cheluka nawu chakala hohu twovwahilaña mazu ekala haMatewu 6:​33, Yehova wukutwakamenaña.”

NEYI TUNAKUFUUKULA YUMA YAKUMUJIMBA YAKATUKWASHA KUMBIDI

13. Yumanyi yalema yitwatela kwila chayinu mpinji yakatukwasha kwikala nayuma yakumujimba yakakeñekaña neyi tunakuli dehi?

¹³ Tunateli cheñi kumwekesha chitwamukuhwelela Yehova hampinji yitunakufuukula yuma yitwatela kwila yakatukwasha neyi tunakuli dehi. Bayibolu yatukoleshaña nawu tuzateña nañovu hakwila twakatweshi kwikala nayuma yakumujimba yitwakadikwashañamu nachu kumbidi. (Yish. 6:​6-11) Neyi tukutwesha, chidi hohu chiwahi kuhembahu mali akatukwasha kumbidi. Mali atukiñaña muyuma yikwawu. (Mukwa. 7:12) Hela chochu, twatela kutondolwela kutwamijaku yuma yakumujimba muchihandilu chetu.

14. AHeberu 13:5 yinateli kutukwasha ñahi kubula kusweja kwakama kutalisha hachakekala chihandilu chetu kumbidi?

¹⁴ Yesu washimwini chakutalilahu chamuntu wasupa wadilumbikilaña mali “henohu hikazweñi kumesu aNzambi.” (Luka 12:​16-21) Kwosi weluka chuma chakamwekana kumadikiku. (Yish. 23:​4, 5; Yak. 4:​13-15) Chineli tudi akakumulondela Kristu, kudi chuma chalema chitwatela kwila. Yesu wahosheli nindi twatela “kuleka” yuma yejima yitukweti hakwila twiikali atumbanji twindi. (Luka 14:​33, tth.) AkaKristu akusambila muYudeya dicheliliwu, azañaleli chajimbesheliwu maheta awu ejima. (Heb. 10:34) Makonu, amanakwetu amavulu adihana nakushiya yuma yawu yakumujimba muloña akaanaña kukwasha pati yidi yejima yamapolitiki. (Chim. 13:​16, 17) Chumanyi chayikwashaña kwila mwenimu? Akuhwelela chikupu muchikaninu chaYehova chakwila nawu: “Hinamba kakushiya hela kukufutalelaku.” (Tañenu AHeberu 13:5.) Twazataña nañovu kufuukula yuma yitwatela kwila yakatukwasha kumbidi, nawa neyi yuma yamwekanaña chakubula kukuhwelela yituholokela, twamukuhwelelaña Yehova netu wukutukwasha.

15. Yitoñojokanyi yayiwahi yatela kwikala nawanvwali akaKristu kutalisha hadi anyanawu? (Talenu cheñi mwevulu.)

¹⁵ Muyisemwa yikwawu, adisumbula afuukulañahu kwikala nanyana kulonda awa anyana akakwasheña anvwali jawu munsañu jamali neyi anakuli dehi. Munjila yikwawu, awa adisumbula ashindamenaña hohu mudi anyana nawu diwu akayihembaña neyi anakuli. Bayibolu yahosha nawu anvwali diwu akweti mudimu wakuhemba anyanawu. (2 Kor. 12:14) Hela chochu, anvwali niwena akeñekaña kuyikwasha neyi anakuli dehi, nawa anyana amavulu ashañaku ntanjikilu yakuyikwashilamu. (1 Tim. 5:4) Ilaña anvwali akaKristu eluka nawu muzañalu waweni bayi neyi wafumaña mukukulisha anyana nayitoñojoka yakwila nawu akayikwasheña munsañu jamaliku, ilaña wafumaña mukukwasha anyanawu kwikala ambuña aYehova.—3 Yowanu 4.

16. Anvwali anateli kukwasha ñahi anyanawu kudiloñeshela chadimu chakuwana mali akudikwashamu nachu awenawu kumbidi? (AEfwesesa 4:28)

¹⁶ Kuhitila muyuma yimwelaña, yidizishenu anyanenu amukuhweleli Yehova hampinji yimunakuyikwasha kudiloñesha chakudihemba awenawu. Hampinji yichidiwu atwansi, yilejenu chalemena kuzata nañovu. (Yish. 29:21; tañenu AEfwesesa 4:28.) Hampinji yinakukulawu, yikwashenu asheñaku maana kushikola. Anvwali akaKristu azataña nañovu kusandujola yishina nikuyizatisha hakukwasha anyanawu chatela kuzatishawu chiwahi shikola yinadiziwu. Chumichi chikukwasha anyanawu kwikala namali akudikwashamu awenawu nikudikita chikupu mumudimu wakushimwina wawakaKristu.

17. Yumanyi yitwatela kukuhwelela?

¹⁷ Ambuña aYehova ashinshika atela kukuhwelela muwuswa windi nimuchima wukwetiyi wakuyinka yuma yakumujimba yakeñañawu. Hampinji yitunakuswina kwakwihi nakukuma kwanshakaminu yamakonu, tukukuhwelelaña kumona yuma yikwesekaña chikuhwelelu chetu mudi Yehova. Hela chakwila kukumwekana yuma yamuchidinyi, tutwalekenuhu kukuhwelela chikupu netu Yehova wukuzatishaña ñovu yindi kutwinka yuma yakumujimba. Twatela kukuhwelela netu chikasa chindi chañovu nawa chakwolola hichakehiha kulonda akakañanyi kutukwashaku.