Yehova “Wokaña Abaluka Nyichima”

1. Yehova watiyaña ñahi nawambuñindi?

YUMANYI yamonañayi Yehova neyi atala ambuñindi hamaseki? Wamonaña neyi tudi namuzañalu nawa neyi tunaneñi. (Mas. 37:18) Neyi amona nindi tunakumukalakela hakumina ñovu jetu hela chakwila tunakumona kukala kwayeña, wazañalalaña! Nawa chasweja kubadika, wafwilaña kutukwasha nikutukundeja.

2. Yumanyi yayililañayi Yehova antu abaluka nyichima, nawa yumanyi yitwatela kwila hakwila twiluki netu nakutwakamena?

² Isamu 147:3 dahosha nawu Yehova ‘wakasaña hayilonda yawantu’ abaluka nyichima. Ahanu Yehova anamulumbululi nawu nakwakamena antu anakukabakana nayitoñojoka. Yumanyi yitwatela kwila hakwila tutiyi netu Yehova nakutwakamena? Talenu ichi chakutalilahu. Ndotolu wakulukila nateli kwila yuma yayivulu hakwila akwashi muntu wunadikatishi kulonda akoli. Hela chochu, hakwila nawu akoli, muntu wunadikatishi watela kulondela chikupu yuma yinamulejiwu kudi ndotolu. Muchinu chibaaba, tukudiza Yehova chahoshayi Mwizu dindi nakuleja antu anakukabakana nayitoñojoka nawa tukuhanjeka hachitunateli kuzatisha kufumba kwindi kwakuwahi.

YEHOVA WATWANUKISHAÑA NINDI TWALEMA KUDI YENA

3. Muloñadi antu amakwawu chadimwenañawu nawu amukunkulwayi?

³ Twashakamaña mukaayi mwabula kukeña, nawa chawushona, antu amavulu ayiletesha kutiya nawu amukunkulwayi. Muhela wejina daHelena wahosheli nindi: “Nakulilili muchisaka mwabula kukeña. Atata adiña akamadombu nawa mpinji yejima atulejeleña nawu twadiña amukunkulwayi.” Kufwana Helen, hadaha ninenu ayikabishileña, kuyihosha chatama mpinji yejima, hela kuyiletesha kutiya nenu kwosi wayikeña. Neyi mwahitahu dehi mukukala kwamuchidiwu, chinateli kuyikalila kukuhwelela nenu kudi muntu wayakamenaña chikupu.

4. Kwesekeja naIsamu 34:18, Yehova watushiika nindidi?

⁴ Hela chakwila kudi antu ayikabishaña, ilukenu chikupu nenu Yehova wayikeña nawa wayilemesha. Wekala “kwakwihi nawantu abaluka nyichima.” (Tañenu Isamu 34:18.) Neyi mutiya nenu ‘munachikiki muspiritu,’ anukenu nenu Yehova wamweni yuma yayiwahi mumuchima wenu nawa wayikokeleli kudi yena. (Yow. 6:44) Wadiloñesha kuyikwasha mpinji yejima muloña mwalema kudi yena.

5. Yumanyi yitukudizila kudi Yesu chelileñayi nanana adiwileñawu kudi antu amakwawu?

⁵ Tunateli kwiluka chatiyañayi Yehova neyi tutoñojoka hayuma yelileñayi Yesu. Hampinji yazatileñayi mudimu windi wahamaseki, Yesu wamweneña antu adiwileñawu kudi antu amakwawu nawa yena wayitiyilileña wushona. (Mat. 9:9-12) Hampinji yelili mumbanda wakuhweleleli nindi akumuuka kuchikatu chafwana akwati kuyakuvwala yindi, Yesu wamukundejeli nawa wamuhamekeli hachikuhwelelu chindi. (Maku 5:25-34) Yesu wamwekeshaña chikupu yilwilu yekala naTata yindi. (Yow. 14:9) Dichi mwatela kukuhwelela nenu Yehova wayilemesha nawa wamonaña yilwilu yenu yayiwahi, kushilahu chimwamukuhwelela nichimwamukeña.

6. Yumanyi yinateli kwilayi muntu neyi nakudimona nindi wamukunkulwayi?

⁶ Yumanyi yimwatela kwila neyi mutachika cheñi kutoñojoka nenu mwashikilamu wanyi? Tañenu mavasi amuBayibolu anateli kuyikwasha kumona nenu mwalema kudi Yehova nawa toñojokenuñahu chikupu.b (Mas. 94:19) Neyi mukañanya kwila chuma chimunakufwila kwila hela neyi munaneñi muloña himunakuzata neyi chinakuzatawu akwenuku, bayi mudinka nyiloñaku. Yehova weluka yuma yimukutwesha kwila. (Mas. 103:13, 14) Neyi kudihu chuma chatama chayimwekeneni kunyima, bayi mudinkamu nyiloña enu aweni hachuma chayikoñeliyi owu muntuku. Himwateleleli kuhita mukukala kwamuchidowuku! Anukenu nenu Yehova wakasompesha antu akoñaña yuma yatama, bayi akoñañawu yuma yatamaku. (1 Pet. 3:12) Sandra, akoñeliwu yuma yatama kuwansi wahosheli nindi, “Namulombaña Yehova mpinji yejima nami ankwashi nidimoneña munjila yayiwahi neyi chammonañayi.”

7. Yuma yatumwekeneni kunyima muchihandilu yinateli kutukwasha ñahi mumudimu waYehova?

⁷ Bayi mujinoka nenu Yehova nateli kuyizatisha kulonda mukwashi antu amakwawuku. Wayinka kukooleka kwakwikala akakukalakala hamu nindi mumudimu wakushimwina wawakaKristu. (1 Kor. 3:9) Hamuloña wayuma yatama yimwahitamu dehi, hadaha chinateli kuyipelela kutiya neyi chinakutiyawu owu antu anakukabakana. Munateli kuzata nañovu kuyikwasha. Helen, itwashimuna hakusambila, amukwashili nawa ichi niyena nakukwasha amakwawu. Wahosheli nindi: “Nadimweneña kwikala wamukunkulwayi, ilaña Yehova nankwashi kuditiya nami ankeña nawa wanzatishaña kukwasha amakwawu.” Helen ichi nakukalakala wupayiniya wampinji yejima namuzañalu.

YEHOVA NAKUKEÑA NINDI TWITEJI NETU WATWANAKENAÑA

8. Chumanyi chatushiikawu haIsaya 1:18?

⁸ Ankoñi aYehova amakwawu aditoñeshaña hayuma yeliliwu kunyima, henohu kanda hela hanyima yakupapatishewa. Ilaña tukwila chiwahi neyi twanuka netu Yehova watwinka ifutu danyiloña muloña watukeña nankashi. Mwamweni, wakeñaña nindi twiteji chawaana chatwinkayi. Yehova watulejaña nindi neyi ‘twolola nsañu’c nayena, hatwanukilaña oyu nshidi yitwakoñeliku. (Tañenu Isaya 1:18.) Yehova watukeña chikupu nanochu chabulaña kutwanukilayi nshidi jetu jakunyima! Hampinji yoyimu havulamenaña yuma yayiwahi yitwakoñañaku.—Mas. 103:9, 12; Heb. 6:10.

9. Muloñadi chitwatela kushila maana hayuma yakatataka niyakumbidi bayi yakunyimaku?

⁹ Neyi munakuditoñesha hayuma yimwakoñeli kunyima, zatenu nañovu kulonda musheña maana hayuma yakatataka niyakumbidi bayi yakunyimaku. Talenu yuma yamumwekeneni kapostolu Pawulu. Waditoñesheli nindi mpinji yimu wakabishili chikupu akaKristu, ilaña welukili nindi Yehova namwanakeni. (1 Tim. 1:12-15) Komana watwalekelihu kutoñojoka hanshidi jakoñeliyi kunyima? Chakadi nikujina, dimweliliyi wanyi, neyi chochabulili kutoñojokayi hayuma yeliliyi hampinji yadiñayi kaFwarisi alemeshawu. (Fwili. 3:4-8, 13-15) Ilaña, Pawulu wadikitili chikupu mumudimu wakushimwina nawa washili muchima hayuma yakumbidi. Kufwana Pawulu, himunateli kuhimpa yuma yakunyimaku. Ilaña munateli kumushimeka Yehova kwesekeja nayuma chiyidi muchihandilu chenu nikusha maana hayuma yayiwahi yayishiikayi kumbidi.

10. Chumanyi chitwatela kwila neyi yuma yitwakoñeli kunyima yaneñesha antu amakwawu?

¹⁰ Hadaha munakutiya kutama nayuma yatama yimwakoñeli kunyima yaneñesha antu amakwawu. Chumanyi chinateli kuyikwasha? Zatenu nañovu kulonda mwololi yuma yimwaluwañesheli, kushilahu nikudanakena chakufuma hamuchima. (2 Kor. 7:11) Mulombenu Yehova kulonda ayikwashi ana antu imwaneñesheli nayilwilu yenu. Nateli kuyikwasha enu niantu imwaneñesheli kulonda muumiki nikwikala cheñi nakuwunda.

11. Yumanyi yitukudizila kuyuma yeliliyi Yona? (Talenu cheñi mwevulu wudi .)

¹¹ Dizilenu kuyiluwa yimwakoñeli kunyima, nawa itejenu Yehova ayizatishi munjila yidi yejima yinakeñiyi. Toñojokenu hachuma chamumwekeneni kaprofwetu Yona. Chatela ayi kuNiniva neyi chamulejeliwu kudi Nzambi, Yona watemukili nakuya kwacheñi. Yehova wamubabesheli Yona nawa wadizilili kuchiluwa chindi. (Yona 1:1-4, 15-17; 2:7-10) Yehova walekeli wanyi kumuzatisha Yona. Nzambi wamwinkeli kukooleka kukwawu kwakuya kuNiniva, nawa haniyi mpinji Yona washikeneni dakwovwahila. Wetejeli wanyi kuditoñesha hachiluwa chakoñeliyi kunyima kumukañeshi kwiteja mudimu wamwinkeliwu kudi Yehova.—Yona 3:1-3.

YEHOVA WATUKUNDEJAÑA NASPIRITU YAJILA

12. Yehova watwinkaña ñahi kuwunda neyi kudi yuma yatama yatumwekeneni yituchidi kwanuka hela neyi tunafwishi? (AFwilipi 4:6, 7)

¹² Kuzatisha spiritu yindi yajila, Yehova watukundejaña neyi kudi yuma yatama yatumwekeneni yituchidi kwanuka hela neyi tunafwishi. Talenu chuma chayimwekeneni aRon nawaCarol. Chawushona, mwanawu weyala wadijahili. Ahosheli nawu: “Twamonahu dehi kukala kukwawu, ilaña iku kwaswejeli. Kakavulu nawufuku neyi tunakañanyi kukaama, twalombeleña nawa twatiyileña kuwunda kwashimunawu haAFwilipi 4:6, 7.” (Tañenu.) Neyi munakumona kukala kweneni, munateli kumulomba Yehova chakufuma hamuchima mapampa ejima imunakeñi nawa mpinji yejima yimunakeñi. (Mas. 86:3; 88:1) Mulombenu Yehova kakavulu kulonda ayinki spiritu yindi yajila. Hakadiwula yuma yimunamulombiku.—Luka 11:9-13.

13. Spiritu yajila yinateli kutukwasha ñahi kutwalekahu kudifukula kudi Yehova nakashinshi? (AEfwesesa 3:16)

¹³ Kudihu chuma chatama chayimwekeneni chayizeyesha? Spiritu yajila yinateli kuyinka ñovu yakutwalekahu kudifukula kudi Yehova nakashinshi. (Tañenu AEfwesesa 3:16.) Talenu chuma chamumwekeneni muhela wejina daFlora. Yena nanfumwindi adiña amishonali helili nfumwindi abuli kwikala washinshika kudi yena, nawa adiseñi. Wahosheli nindi: “Chineñi chinatiyili hanochu chabuliliyi kwikala washinshika, chanzeyesheli muyitoñojoka. Namulombeli Yehova spiritu yindi yajila kulonda yinkwashi kutwalekahu kuumika. Yehova wankundejeli hela chakwila hakusambila chamwekeneña neyi chikutwesheka wanyi, nekalili nañovu nawa natwesheli kuumika nawukwashu windi.” Muhela Flora watiyaña nindi Nzambi wamukwashili kukuhwelela mudi yena, nawa nindi wukumukwashaña mukukala kwejima kunakumonayi. Wabombelelihu nindi: “Mazu ekala haIsamu 119:32 ankundama, akwila nawu: ‘Nukufwilaña kulondela njila yanshimbi jeyi muloña wajitejaña kushakama mumuchima wami.’”

14. Tunateli kwiteja ñahi spiritu yaNzambi kuzatika mudi etu?

¹⁴ Munateli kwila ñahi kwesekeja naspiritu yajila yimunalombi? Zatenuña nyidimu yinateli kukwasha spiritu yaNzambi yizatikeña mudi enu. Iyi nyidimu munabombeli kuya nakupompa nikushimwina antu. Tañenuña Izu daYehova mpinji yejima, nawa chumichi chikuyikwasha kutoñojokaña chikupu Hezu dindi. (Fwili. 4:8, 9) Chimukutañaña, talenu antu ashimunawu muBayibolu amweni kukala nawa toñojokenu Yehova chayikwashiliyi kuumika. Sandra, itwashimuna hakusambila, wamweni kukala kweneni kwakuvulu. Wahosheli nindi: “Nsañu yaYosefu yanshikaña chikupu hamuchima. Wetejeli wanyi kukala niyuma yatama yamwililiwu kuzeyeshi wubwambu windi naYehova.”—Kutach. 39:21-23.

YEHOVA WATUKUNDEJAÑA KUZATISHA AKWETU AKAKWITIYA

15. Anyi anateli kutukundeja, nawa anateli kutukwasha ñahi? (Talenu cheñi mwevulu.)

¹⁵ Neyi tunakukabakana, akwetu akakwitiya anateli ‘kutukundeja chikupu.’ (Kol. 4:11) Yuma yelañawu amanakwetu niahela yamwekeshaña chikupu nawu Yehova watukeña. Amanakwetu anateli kutukundeja kuhitila mukututiyilila nakanañachima, hela kutukwasha kuhitila mukwinza nakututala. Anateli kututañila vasi yamuBayibolu yinateli kutukwasha hela kulombela hamu nanetu.d (Rom. 15:4) Mpinji jikwawu, manakwetu hela muhela nateli kutwanukisha Yehova chatoñojokañayi hanoyu nsañu kulonda atukwashi kumona yuma munjila yayiwahi. Akwetu akaKristu anateli cheñi kutukwasha kumujimba, chidi neyi kutuloñeshelaku yakuda neyi tunaneñi.

16. Yumanyi yitwatela kwila hakwila atukwashi kudi akwetu?

¹⁶ Hakwila antu atukwashi, twatela kuyilejamu. Amanakwetu niahela atukeña nawa akeñaña kutukwasha. (Yish. 17:17) Ilaña kwila eluka chitunakutiya hela yuma yitunakukeña nehi. (Yish. 14:10) Neyi kudi yuma yinakuyikata kumuchima, lejenumu amabwambu jenu apama. Yilejenu kulonda eluki chinateli kuyikwashawu. Munateli kutonda mukulumpi wumu hela ayedi imunamoni nenu mukukasunuka kuhanjeka nawu. Ahela amakwawu chayipelelaña hohu kuhanjeka nawakwawu ahela apama dehi.

17. Kukalanyi kukwawu kunateli kutukañesha kutambwila wukwashu, nawa tunateli kukushinda ñahi?

¹⁷ Tondolwelenuña kwikala nkawenu. Hamuloña wakwila munaneñi, chinateli kuyikalila kuhanjeka nawantu amakwawu. Mpinji jikwawu, amanakwetu niahela anateli kukañanya kwiluka chitunakutiya hela anateli kuhosha mazu abula kutelela. (Yak. 3:2) Bayi mwiteja kukala kwamuchidiwu kuyikañeshi kutambwila wukwashuku. Mukulumpi wejina daGavin, wakabakanaña nachineñi, wahosheli nindi: “Kuhosha nawamabwambu dichuma chakukumishaku chinelaña.” Hela chochu, Gavin wazataña nañovu kwikala hamu nawakwawu, nawa watiyaña kuwaha kuhanjeka nawu. Muhela wejina daAmy wahosheli nindi: “Muloña wayuma yinahitilimu, chankalilaña kukuhwelela antu. Ilaña inakudiza chakukeña nikukuhwelela amanakwetu niahela neyi chelañayi Yehova. Neluki nami chumichi chamutiyishaña Yehova kuwaha, nawa ninami chanzañaleshaña.”

KUHWELELENU MUCHIKANINU CHAYEHOVA CHAKUTUKUNDEJA

18. Chumanyi chitwatela kutalila kumbidi, nawa chumanyi chitwatela kwila chayinu mpinji?

¹⁸ Tunakuhweleli netu kumbidi Yehova katataka afumishihu kuyeña kwejima kutwatiyaña kumujimba nimuyitoñojoka. (Chim. 21:3, 4) Hayina mpinji, yuma yatama yitunakumona “hiyakenzahu cheñi kumuchimaku.” (Isa. 65:17) Neyi chitunamoni, Yehova ‘wakasaña hayilonda yetu’ nichayinu mpinji. Zatishenuña njila jinakuzatishayi Yehova kuyikundeja nikuyikwasha. Mwatela wanyi kujinoka hela chanti nenu “wayakamenaña.”—1 Pet. 5:7.