Yehova Chatukwashañayi Kuumika

1. Muloñadi chitunakukeñekela kuumika, nawa hinyi wunateli kutukwasha? (1 Petulu 5:10)

MUNANU mafuku akukuminina akala, antu jaYehova anakukeñeka kuumika. Kudi anakuyekela nayikatu. Amakwawu anakukabakana nachineñi chakufwisha antaña niamabwambu jawu akeñawu. Amakwawu niwena anakumona ikañesha, hadaha dinakufumina kudi antu amuchisaka chawu hela kudi akawuswa amunfulumendi. (Mat. 10:​18, 36, 37) Ilukenu nenu kukala kwejima kumunakumona, Yehova nateli kuyikwasha kuumika.—Tañenu 1 Petulu 5:10.

2. Hinyi watwinkaña ñovu yatukwashaña etu akaKristu kuumika?

² Kuumika kwatalisha mukutwalekahu kwikala ashinshika nikuchiñeja yuma yakumbidi hela chakwila tunakumona kukala, anakutukabisha, tunakukabakana hela tunakumona kweseka. Etu akaKristu hitwomikaña nañovu jetu etu aweniku, ilaña Yehova diyi watukwashaña, watwinkaña “ñovu yabadika hañovu jawantu.” (2 Kor. 4:7) Muchinu chibaaba, tukuhanjeka hayuma yiwana yatwinkayi Yehova yinateli kutukwasha kuumika. Tukuhanjeka cheñi chitunateli kuzatisha iyi yuma.

KULOMBA

3. Muloñadi chitunateli kuhoshela netu kulomba hinjila yakuhayamisha yakuhanjekelamu naYehova?

³ Yehova washaku njila yakuhayamisha yinateli kutukwasha kuumika. Washaku iyi njla kulonda tuhanjekeña nindi hela chakwila tudi akanshidi. (Heb. 4:16) Toñojokenu hachumichi: Tunateli kulomba kudi Yehova mpinji yidi yejima nihansañu yidi yejima. Nateli kututiya mwidimi didi dejima ditunakuzatisha hakulomba nikwiluña kudi kwejima, hela chakwila tudi kwankawetu hela mukaleya. (Yona 2:​1, 2; Yilw. 16:​25, 26) Neyi tusweja kwakama chakwila tukañanya kwiluka nichitwatela kumuleja chitunakutiya, Yehova nateli kwiluka yuma yitunakukeña kuhosha. (Rom. 8:​26, 27) Mwamweni, kulomba hinjila yakuhayamisha yakuhanjekelamu naYehova!

4. Muloñadi chitukuhoshela netu kulomba netu atukwashi kuumika kunesekani nankeñelu yaYehova?

⁴ Yehova watuleja Mwizu dindi nindi “chuma chejima chitukulomba kwesekeja nankeñelu yindi, watutiyaña.” (1 Yow. 5:14) Komana tunateli kumulomba Yehova netu yatukwashi kuumika? Eña! Kwila mwenimu kunesekani nankeñelu yindi. Tunahoshelidi mwenimu? Neyi tuumika hampinji yitunakumona kukala, tukumukwashaku Yehova kumwakula muntu wamusupishaña, Satana Diyabolu. (Yish. 27:11) Kubombela hachumichi, Bayibolu yahosha nawu Yehova nakufwila ‘kuyimwekeshela ñovu jindi antu asha chikupu muchima hadi yena.’ (2 Kushi. 16:9) Dichi, twatela kukuhwelela netu Yehova wukweti ñovu nawa nakufwila kutukwasha kuumika.—Isa. 30:18; 41:10; Luka 11:13.

5. Kulomba kunateli kutukwasha ñahi kwikala nakuwunda kwamuyitoñojoka? (Isaya 26:3)

⁵ Bayibolu yahoshaña nawu neyi tutwalekahu kulomba hayuma yinakutwakamisha, “kuwunda kwaNzambi kwabadika kwiluka kwejima kwakahemba nyichima [yetu] niyitoñojoka [yetu].” (Fwili. 4:7) Talenu mwatalisha awa mazu. Antu abulaña kumukalakela Yehova amonaña kukala nawa afwilaña kuzatisha njila jashiyashana hakwila ekali nakuwunda kwamuyitoñojoka. Chakutalilahu, amakwawu azatishaña njila yaambukaku yakutoñojoka hayuma nakanañachima hakwila afumishi muyitoñojoka yawu yuma yinakuyikabisha nikuyakamisha. Neyi ela mwenimu, akwiteja andemoni kuluwañesha yitoñojoka yawu. (Esekejenu Matewu 12:​43-45.) Kwaambukaku, kuwunda kwahanañayi Yehova neyi tumulomba kwabadika chikupu kuwunda kwejima kunateli kwikalayi naku muntu kuzatisha iyi njila yakutoñojokelamu yinashimuniwu. Neyi tumulomba Yehova, twamwekeshaña netu twamushindamena chikupu nawa watwinkaña “kuwunda kwabulaña kumana.” (Tañenu Isaya 26:3.) Njila yimu mwatukwashilañayi Yehova kwikala naniku kuwunda hikutukwasha kwanuka chalala chalema chitwadizaña Mwizu dindi. Ichi chalala chatukwashaña kwikala nakuwunda kwamuyitoñojoka nimumuchima, muloña tweluka netu Yehova watwakamenaña nawa wakeñaña nindi yuma yituwahileña.—Mas. 62:​1, 2.

6. Yumanyi yimwatela kutena mukulomba kwenu? (Talenu cheñi mwevulu.)

⁶ Yuma yimunateli kwila. Hampinji yimunakuumika yuma yinakweseka chikuhwelelu chenu, ‘umbilenu chiteli chenu hadi Yehova’ nawa mulombenu ayikwashi kwikala mukuwunda. (Mas. 55:22) Lombenu cheñi maana akuyikwasha kwiluka chimwatela kwila nakukala kumunakumona. (Yish. 2:​10, 11) Hampinji yimunakulomba kulomba kwakulemba nenu ayikwashi kuumika, bayi muvulamena kulomba kudi Nzambi kulomba kwakusakililaku. (Fwili. 4:6) Toñojokenu hayuma yinakumwekesha nawu Yehova nakuyikwasha hampinji yimunakumona kukala nawa musakililenu hanochu chinakuyikwashayi. Bayi mwiteja kukala kumunakumona kuyileteshi mukañanyi kumona yuma yayiwahi yinakuyililayi Yehovaku.—Mas. 16:​5, 6.

IZU DANZAMBI

7. Kudiza Bayibolu kunateli kutukwasha ñahi kuumika?

⁷ Yehova watwinka Izu dindi datukwashaña kuumika. MuBayibolu mwekala mavasi amavulu atukwashaña kukuhwelela netu Yehova watukwashaña. Tuhanjekenu havasi yimu hanawa mavasi. Matewu 6:8 yahosha nawu: “Tata yenu neluki yuma yimunakukeña henohu kanda mumulombi.” Yesu diyi wahosheli awa mazu, nawa wamwiluka Yehova chiwahi nankashi kubadika muntu wudi wejima. Dichi, hitunateli kujinoka hela hanti netu Yehova watwakamenaña hampinji yitunakumona kukalaku. MuBayibolu mwekala nsañu yayivulu yamuchidiwu yinateli kutukwasha kutwalekahu kuumika.—Mas. 94:19.

8. (a) Shimunenu chishina chimu chamuBayibolu chinateli kutukwasha kuumika. (b) Yumanyi yinateli kutukwasha kwanuka yishina yamuBayibolu hampinji yitudi mukukala?

⁸ Yishina yamuBayibolu yinateli kutukwasha kuumika. Kafwampi, iyi yishina yikutukwasha kwikala namaana anateli kutukwasha kufuukula chiwahi. (Yish. 2:​6, 7) Chakutalilahu, Bayibolu yatulejaña nawu bayi tuswejaña kwakama nayuma yefuku dakumadikiku, hadaha yikabula nikumwekana, ilaña tumushindameneña Yehova hefuku-hefuku. (Mat. 6:34) Neyi twikalaña nachaaku chakutañaña Nsona nikutoñojokahu chikupu hansañu yitunatañi, chikutupelelaña kwanuka yishina yinateli kutukwasha nakukala kutukweti hanoyu mpinji.

9. Neyi tutañaña muBayibolu chakwashiliyi Yehova ambuñindi ashinshika, chikutukwasha kukuhwelela netudi?

⁹ Bayibolu yashimuna cheñi yakutalilahu yawantu adi neyi etu amukuhweleleli Yehova nawa akwashiliyi. (Heb. 11:​32-34; Yak. 5:17) Neyi tutoñojokaña hayuma yayimwekeneni awa antu, twamukuhwelelaña chikupu Yehova netu “diyi chiswamu chetu nawa ñovu yetu, hiwukwashu waswayi kuwana mumpinji yayihuñu.” (Mas. 46:1) Chitukutoñojokaña hakashinshi kamwekesheliwu ambuña aYehova akunyima, tukwimbujola kashinshi kawu nichomikileñawu.—Yak. 5:​10, 11.

10. Yumanyi yimwatela kwila hakwila Izu daNzambi diyikwashi?

¹⁰ Yuma yimunateli kwila. Tañenuña Bayibolu hefuku-hefuku nawa hembenuñahu mavasi imunamoni nenu akuyikwasha. Nawa amavulu anawani nawu kutalatala munsona hefuku-hefuku nantetemena, kwayikwasha nankashi kwikalahu nansañu yamuBayibolu yakutoñojokahu ifuku dejima. Muhela wejina daMariea dichuma chamukwashili hampinji yayiwaniniwu anvwali jindi ejima ayedi nachikatu chakansa. Chumanyi chamukwashili kuumika hampinji yayakameneneñayi chikwashalili tukweji twantesha anvwali jindi nakufwa? Wahosheli nindi: “Ifuku dejima nantetemena natañileña nsona mukamukanda Kakutalatala muNsona Hefuku-Hefuku nawa natoñojokeleña chikupu hansañu yinnatañi. Chumichi chankwashileña hefuku-hefuku kutoñojoka hadi Yehova niyuma yayiwahi yatudizishañayi chatela nisheña nankashi muchima hakukala kunamweneña.”—Mas. 61:2.

AKWETU AKAKWITIYA

11. Kwiluka netu hiyetu hohu anakuhita mukukalaku, kunateli kutukwasha kukuhwelela netudi?

¹¹ Yehova watwinka amanakwetu niahela mwahita kaayi kejima atukwashaña kuumika. Kwiluka hohu netu “makabi wowamu [itunakuhitamu], diwu anakuhitamu [nianakwetu] ejima mukaayi,” kwatukwashaña kukuhwelela netu hitudi nkawetuku. (1 Pet. 5:9) Mwamweni, twatela kukuhwelela chikupu netu kukala kwejima kutunakuhitamu, akwetu niwena anakuhita mukala kwokumu, nawa anakuumika. Dichi ninetu tunateli kuumika!—Yilw. 14:22.

12. Akwetu akakwitiya anateli kutukwasha ñahi, nawa ninetu tunateli kuyilila chumanyi? (2 AKorinda 1:​3, 4)

¹² Hampinji yitunakuumika kukala, akwetu akakwitiya anateli kutukwasha. Dichuma chamwekeni kudi kapostolu Pawulu. Wayisakilileña kakavulu ana amukwashileña hampinji yamukasiliwu mukaleya kamwitala nawa wayiteneneña hamajina-hamajina. Amukundejeleña Pawulu, kumukolesha nikumukwasha nayuma yakumujimba. (Fwili. 2:​25, 29, 30; Kol. 4:​10, 11) Dichuma chinateli kutumwekena ninetu makonu. Neyi tunakukeña wukwashu hakwila tutweshi kuumika, amanakwetu niahela diwu anateli kutukwasha, nawa neyi anakukeña wukwashu, yetu tunateli kuyikwasha.—Tañenu 2 AKorinda 1:​3, 4.

13. Chumanyi chamukwashili muhela Maya kuumika?

¹³ Amanakwetu niahela amukolesheli nankashi muhela wakuRussia wejina daMaya. Mu 2020 atupokola asandujoleli mwitala dindi, nawa mukuhita kwampinji amusompesheli kuchota chanyiloña muloña wakuleja antu yuma yakuhwelelayi. Muhela Maya wahosheli nindi: “Hampinji yinazeyeli nankashi muyitoñojoka, amanakwetu niahela antemesheleleña mafoni, kunsonekela mameseji ninyikanda nakunleja nawu ankeña. Mpinji yejima nelukili nami nikweti chisaka cheneni nawa chankeña. Ilaña kufuma hayuma yañilililiwu mu 2020, nelukishi chikupu chumichi.”

14. Yumanyi yitwatela kwila hakwila akwetu akakwitiya atukwashi hampinji yitunakuumika nakukala kutunakuhitamu? (Talenu cheñi mwevulu.)

¹⁴ Yuma yimunateli kwila. Hampinji yimunakuumika, dikundenuña nankashi nawamanakwenu niahela akaKristu. Bayi mushintajala kulomba wukwashu kudi akulumpiku. Anateli kwikala kudi enu “neyi iluña mwakuswama mpepela, iluña mwakwiyama nvula yeneni.” (Isa. 32:2) Hela chochu, anukenuña cheñi nenu akwenu akaKristu niwena anakuumika kukala. Dichi neyi mwilila chuma chachiwahi muntu wudi mukukaankila, mukwikala namuzañalu nawa mukutwesha kuumika kukala kumunakuhitamu.—Yilw. 20:35.

YUMA YITWACHIÑEJAÑA

15. Kuchiñeja kunayikwashi ñahi antu ashinshika, kushilahu niYesu? (AHeberu 12:2)

¹⁵ Yehova watwinkaña kuchiñeja kwalala kwatukwashaña kuumika. (Rom. 15:13) Anukenu kuchiñeja chikwamukwashili Yesu kuumika hefuku dakala chikupu muchihandilu chindi chahamaseki. (Tañenu AHeberu 12:2.) Yesu welukili nindi neyi atwalekahu kwikala washinshika, wukuhakwilaku ijina daYehova. Nawa Yesu watalilileña mpinji yakwikala cheñi hamu naTata yindi nimpinji yakatachikayi kuyuula hamu nawamanakwindi muWanta wamwiwulu. Munjila yoyimu, kuchiñeja kwetu kwakushakama haya nyaaka mukaayi kaNzambi kakaha, kwatukwashaña kuumika kukala kwejima kutunakumona mukanu kaayi kaSatana.

16. Kuchiñeja kwamukwashili ñahi muhela wumu kuumika, nawa yumanyi yitunakudizila kumazu ahosheliyi iwu muhela?

¹⁶ Talenu kuchiñeja yuma yakaleta Wanta chikwamukwashili muhela wakuRussia wejina daAlla. Nfumwindi amukasili nakumusha mukaleya nawa wahembeleleña ifuku dakumusompesha. Chamwekeni chumichi, Alla wahosheli nindi: “Kulomba hayuma yitwachiñejaña kumbidi nikutoñojokahu chikupu, kwankwashaña kubula kuneña nankashi. Neluka nami iku bayi neyi dikukuma kwayumaku. Yehova wakashinda, nawa ninetu twakashinda.”

17. Tunateli kumwekesha ñahi kusakilila hayuma yashimuna Bayibolu yitwachiñejaña? (Talenu cheñi mwevulu.)

¹⁷ Yuma yimunateli kwila. Ikalenuña nampinji yakutoñojoka hayuma yayiwahi yayikanayi Yehova. Difwikijenuña mudi mukaayi kaNzambi kakaha ninkisu yitwakatambwila. Dichi kukala kwejima kutunakumona chayinu mpinji, mukukumonaña neyi ‘kwakapinji kantesha nawa kwapepela.’ (2 Kor. 4:17) Nawa zatenuña hanakumini ñovu jenu kulejaku antu yuma yimwakuhwelela. Toñojokenu hohu chichinakuyikalila awa antu kuumika kukala mukaayi kaSatana muloña aneluki wanyi yuma yakelayi Nzambi kumbidi. Munateli kuyisañumuna kwikala namuchima wakutiyilila kuyuma yitwachiñejaña yakaleta Wanta hela neyi muhanjeka hohu nawu hadi kapinji kantesha.

18. Muloñadi chitwatela kukuhwelela muyikaninu yaYehova?

¹⁸ Hanyima yakuumika kukala kwakuvulu, Yoba wamulejeli Yehova nindi: “Ichi dinu neluki nami wunateli kwila yuma yejima nawa hiwunateli kukañanya kwila chuma chejima chiwunafuukuliku.” (Yoba 42:2) Neyi chadiziliyi Yoba, kwosi chuma chinateli kumukañesha Yehova kwila nkeñelu yindiku. Ichi chikuma chinateli kutukolesha hampinji yitunakuumika. Chakutalilahu, fwikijenu mumbanda wumu wakata nawa wunaneñi muloña andotolu amavulu anakañanyi kumuuka. Ilaña neyi ndotolu wakulukila nawa akuhwelelawu yeluka chikatu chakatayi nawa yamulumbulwila chikumuukayi, iwu mumbanda wukutiya kuwaha hela chakwila hakuhita mpinji hakwila akamuuki. Ichi dinu wukutwalekahu kuumika muloña neluki nindi ifuku dimu wakakola. Munjila yoyimu, yuma yayiwahi yitwachiñejaña yakekala muParadisa yatukwashaña kutwalekahu kuumika.

19. Yumanyi yinateli kutukwasha kuumika?

¹⁹ Neyi chitunamoni, Yehova watukwashaña kuumika kukala kutunakumona kuhitila mukulomba, Izu dindi, akwetu akakwitiya niyuma yitwachiñejaña. Neyi tuzatishaña nankashi iyi yuma yatwinkayi, Yehova wukutukwashaña kuumika kukala kwejima kutukumonaña kushika nikwifuku dakela makabi ejima aleta kaayi kaSatana anayifumishihu.—Fwili. 4:13.