Hitwekala Nkawetuku

1-2. (a) Muloñadi chitukuhoshela netu hitwekalaña nkawetu hampinji yitunakumona kukalaku? (b) Yumanyi yitukuhanjekahu muchinu chibaaba?

NEYI tunamoni kukala kweneni, tunateli kutiya neyi tudi nkawetu mukawatu kanyanya hakaloña hampinji yikudi nvula yampepela. Hela chochu, hitwekalaña nkawetu hampinji yitunakuhita mukukalaku. Tata yetu wukweti kukeña wekala mwiwulu hamonaña hohu kukala kutunakulwisha nakuku, ilaña watukana cheñi nindi wukutukwashaña kuumika. Yehova washiika ambuñindi ashinshika nindi: “Nakakukwasha.”—Isa. 41:10.

² Muchinu chibaaba tukuhanjeka Yehova chatukwashañayi (1) kuhitila mukutulombola, (2) kuhitila mukutwinka yuma yitwakeñaña, (3) kuhitila mukutukiña, nawa (4) kuhitila mukutukundeja. Yehova watushiika nindi hela chakwila twakamona kukala kwamuchidinyi muchihandilu, hamba katuvulamenaku. Hamba katushiya chisayikilaku. Dichi hitwekala nkawetuku.

YEHOVA WATULOMBOLAÑA

3-4. Yehova watulombolaña ñahi? (Isamu 48:14)

³ Tañenu Isamu 48:14. Yehova weluka nindi kwila tudilombola etu aweni nehi. Wayilombolaña ñahi makonu akakudifukula indi ashinshika? Njila yimu mwayilombwelañayi hikuzatisha Bayibolu. (Mas. 119:105) Kuzatisha Izu dindi donenewa, Yehova watukwashaña kufuukula yuma yayiwahi nikwikala nayilwilu yatukwashaña kwikala namuzañalu waweni chayinu mpinji niwumi wahaya nyaaka kumbidi.a Chakutalilahu, watudizishaña kuleka ndulu, kwikala ashinshika muyuma yejima yitwelaña, nikukeña chikupu akwetu chakufuma hamuchima. (Mas. 37:8; Heb. 13:18; 1 Pet. 1:22) Neyi tumwekeshaña iyi yilwilu yakumwakama Nzambi, tukwikala anvwali amawahi, iyala hela mumbanda wamuwahi kudi mwinikwetu, nawa tukwikala amabwambu amawahi.

⁴ Kubombelahu, Yehova washili Mwizu dindi nsañu yahosha hadi antu alala amweneña kukala nikutiya neyi chitwatiyaña. (1 Kor. 10:13; Yak. 5:17) Neyi tutaña iyi nsañu yamwekeni nawa tuzatisha yuma yitunadiziliku, yikutukwasha munjila jiyedi. Yatachi, tukwiluka netu yetu hohu tunakumona iku kukala nkawetu wanyi, amakwawu niwena ahitahu dehi mukukala kwokumu nawa omikili. (1 Pet. 5:9) Nawa njila yamuchiyedi, tukwiluka chakuumika kukala kutunakuhitamu.—Rom. 15:4.

5. Anyi azatishañayi Yehova hakutulombola hampinji yitunakwenda munjila yaya kuwumi?

⁵ Yehova wazatishaña cheñi akwetu akakwitiya hakutulombola.b Chakutalilahu, ankoñi añinza endelaña yipompelu yetu mpinji yejima nakutukolesha. Mpanji jahanañawu jakoleshaña chikuhwelelu chetu nawa jatukwashaña kutwalekahu kwikala anuñañana. (Yilw. 15:40–16:5) Akulumpi muchipompelu niwena azataña nañovu kukwasha mukakushimwina wejima kwikala nawubwambu wakola naYehova. (1 Pet. 5:​2, 3) Anvwali alombolaña anyanawu muyuma yakuspiritu, kuyikwasha kwikala nawuswa wakutoñojoka chachiwahi nikwikala nayilwilu yayiwahi. (Yish. 22:6) Nawa ambanda akaKristu apama akwashaña ahela atwansi kuhitila muyuma yayiwahi yelañawu, kuyifumba munjila yayiwahi nikuyikolesha chikupu.—Tit. 2:​3-5.

6. Yumanyi yitwatela kwila hakwila wunlomboli waYehova wutukwashi?

⁶ Yehova watwinka wunlomboli wutwakeñaña hakwila tufuukuleña chachiwahi nikwikala namuzañalu muchihandilu. Tunateli kumwekesha ñahi netu tunakusakilila hayuma yinatwililiyi? Yishimu 3:​5, 6 yahosha nawu: “Mukuhweleli Yehova namuchima weyi wejima, nawa bayi wushindamena hamaana eyiku.” Neyi twilaña mwenimu, ‘wakatwolwela njila jetu,’ dikwila nawu, wakatukwashaña kutondolwela kukala kwakuvulu nikwikala namuzañalu muchihandilu chetu. Twamusakililaña nankashi Yehova muloña watwinkaña hamuntu-hamuntu kufumba kwakuwahi!—Mas. 32:8.

YEHOVA WATWINKAÑA YUMA YITWAKEÑAÑA

7. Munjilanyi jikwawu mwatwinkelañayi Yehova yuma yitwakeñaña? (AFwilipi 4:19)

⁷ Tañenu AFwilipi 4:19. Kubombela hakutulombola kuspiritu, Yehova watukiswilaña chitwazataña nañovu kukeña yakuda, yakuvwala nimwakukaama. (Mat. 6:33; 2 Tes. 3:12) Hela chakwila chatama wanyi kwakama hayuma yakumujimba yitunakaankili, Yehova watukoleshaña kubula kusweja kwakama hayumiyi. (Mat. 6:25) Muloñadi? Muloña Tata yetu hamba kayishiya chisayikila akakudifukula indi ashinshika hampinji yinakaankiliwuku. (Mat. 6:8; Heb. 13:5) Tunateli kumukuhwelela chikupu neyi atuleja nindi wukutwinkaña yuma yitukukeñaña.

8. Yumanyi yamwilililiwu Davidi kudi Yehova?

⁸ Talenu Yehova chamukwashiliyi Davidi. Muyaaka yejima yatemokeleñayi Davidi neyi itunduka, Yehova wamwinkeleña yena niamayala adiñayi nawu yuma yakeñekeleña hakwila atwalekihu kuhanda. Chanukiliyi chamwakameneniwu kudi Yehova hanyima yakwila munahiti dehi yaaka yayivulu, Davidi wasonekeli nindi: “Nadiñi kansi nawa ichi nakuli, ilaña kanda nimoneñahu dehi muntu waloña anamushiyi chisayikila, hela anyanindi anakuya nakulombalomba dinkendiku.” (Mas. 37:25) Hadaha muchihandilu chenu chejima, ninenu munamoni Yehova chayinkañayi ambuñindi adihana yuma yakeñañawu.

9. Yehova wayinkaña ñahi antu jindi makonu yuma yakeñañawu mumpinji yawubanji? (Talenu cheñi nyevulu.)

⁹ Yehova wayakamenaña cheñi antu jindi neyi kunamwekani wubanji. Chakutalilahu, chikwaholokeli nzala yakapwelendendi mumafuku awakaKristu akusambila, akaKristu akumaluña ashiyashana atemesheleli amanakwawu niahela yuma yakaankililiwu. (Yilw. 11:​27-30; Rom. 15:​25, 26) Antu jaNzambi makonu amwekeshaña muchima wowumu wachisambu. Neyi kunamwekani wubanji, Yehova wasañumunaña antu jindi kuhana yuma yidi neyi yakuda, menji, yakuvwala niyitumbu kulonda akwashi antu adi kumaluña kunamwekani wubanji. Mazanvu awakakutuña amukuloñesha kwetu, awahishaña matala anakisiki niMatala aWanta. Nawa ambuña aYehova anyakalaña kuya nakukundeja nikukolesha kuzatisha Bayibolu antu anaholokeli naniku kukala.c

10-11. Yumanyi yimunadizili kuyuma yamumwekeneni Borys?

¹⁰ Yehova wenkaña yuma niantu abulaña kudifukula kudi yena. Munjila yoyimu, twawanañahu njila yakukwashilamu antu abula kukuhwelela yuma yitwakuhwelela. (Ñal. 6:10) Chitwela mwenimu, tukuyikwasha kwiluka yuma yayivulu hadi etu niYehova. Talenu chuma chamumwekeneni Borys, mukulumpi washikola, washakamaña kuUkraine. Hela chakwila Borys hiChinsahu wanyi, mpinji yejima aYinsahu atañilileña haniyi shikola wayikabishileña wanyi nawa walemesheli yuma yakuhwelelawu. Chafuukwiliyi Borys kutemuka njita mwiluña mwashakamineñayi nakuya kwiluña kwabulili njita mwituña dodimu, amanakwetu amukwashili. Chimwahitili mpinji, Borys wayili kuChanukishu chakufwa kwaKristu. Chatoñojokeliyi hayuma yamumwekeneni, Borys wahosheli nindi: “AYinsahu anshili muchima nankashi nikuñakamena. Inakuyisakilila chikupu aYinsahu jaYehova.”

¹¹ Ninetu twatela kumwimbujola Tata yetu wamwiwulu wukweti luwi kuhitila mukumwekeshela antu adi mukukaankila kukeña, hela chakwila akuhwelela yuma yitwakuhwelela hela nehi. (Luka 6:​31, 36) Tunakuhweleli netu neyi tuzataña nañovu kuyimwekeshela antu kukeña, chikayikwasha kwikala atumbanji twaKristu. (1 Pet. 2:12) Hela chochu, hichikweti muloña nayuma yakafumamuku, twakekala namuzañalu weneni wafumaña mukuhana.—Yilw. 20:35.

YEHOVA WATUKIÑAÑA

12. Kukiña kwamuchidinyi kwayikanayi Yehova antu jindi nindi wukuyikiñaña hamu neyi izanvu? (Isamu 91:​1, 2, 14)

¹² Tañenu Isamu 91:​1, 2, 14. Makonu, Yehova watukana nindi wukutukiñaña kuspiritu. Hakamwiteja Satana kutamisha kudifukula kwalalaku. (Yow. 17:15) Nawa neyi lukadi lwasweja lunenzi, tunateli kukuhwelela chikupu netu Yehova wakashikija chikaninu chindi chakukiña antu jindi bayi kuspritu hohuku, ilaña nikumujimba.—Chim. 7:​9, 14.

13. Yehova watukiñaña ñahi hamuntu-hamuntu?

¹³ Yehova watukiñaña ñahi hamuntu-hamuntu? Yehova watukwashaña kwiluka yuma yayiwahi niyatama kuhitila muNsona. (Heb. 5:14) Neyi tuzatishaña yishina yekala Mwizu daNzambi, twadikiñaña etu aweni kuspiritu nikumujimba. (Mas. 91:4) Kubombelahu, Yehova wazatishaña chipompelu hakutukiña. (Isa. 32:​1, 2) Neyi twikalaña hamu nawantu amukeña Yehova nawa alondelaña yishina yindi, akutukoleshaña nikutukwasha kutondolwela yuma yatama yaluwañeshaña.—Yish. 13:20.

14. (a) Muloñadi Nzambi chabulilañayi kutukiña mukukala kwejima kutwamonaña? (b) Isamu 9:10 datukwashaña kukuhwelela chumanyi? (Talenu cheñi tumazu twaheshina.)

¹⁴ Yehova mpinji jikwawu wakiñileña akakudifukula indi akunyima kulonda abuli kuyikatisha hela kuyijaha. Hela chochu, hayikiñileña muyuma yejimaku. Mpinji jikwawu yuma yamwekanaña “chakubula kukuhwelela” yatushikenaña. (Mukwa. 9:11) Cheñi, Yehova weteja ambuñindi kufuma tuhu kunyima kuyikabisha, nawa hadaha nikuyijaha kulonda amwekeshi hatooka nindi Satana hisakutwamba. (Yoba 2:​4-6; Mat. 23:34) Dichuma chatumwekenaña nimakonu. Hela chakwila Yehova wukufumishahu wanyi kukala kwejima kutunakumona, twatela kukuhwelela netu hakashiya chisayikila antu ejima akeñayuku.d—Mas. 9:10.

YEHOVA WATUKUNDEJAÑA

15. Kulomba, Izu daNzambi niakwetu akaKristu atukundejaña ñahi? (2 AKorinda 1:​3, 4)

¹⁵ Tañenu 2 AKorinda 1:​3, 4. Mpinji jikwawu twaneñaña muloña wakufwisha, kwakama, hela kumona kukala. Hadaha munakumona kukala kweneni kunakuyiletesha mutiyeña nenu mudi nkawenu. Kudihu wudi wejima weluka chimunakutiya? Yehova weluka. Helukaña hohu kuyeña kutunakutiyaku, ilaña cheñi ‘watukundejaña mukweseka kwejima kutwamonaña.’ Munjilanyi? Neyi tulomba nakulemba kudi Yehova, watwinkaña “kuwunda kwaNzambi kwabadika kwiluka kwejima.” (Fwili. 4:​6, 7) Twakundejewaña cheñi neyi tutaña muBayibolu mazu atulejañayi Yehova. Mazu onenewa ahoshaña hakukeña, maana nikuchiñeja ekala munichi chisweku, anateli kutukwasha kwikala namuzañalu. Twakundejewaña cheñi neyi tuya kukupompa kwetu kwawakaKristu kutwadizaña yuma yamuBayibolu yatukoleshaña nawa kutwadikundaña nawamanakwetu niahela atukeña.

16. Yumanyi yimunadizili kuchuma chayimwekeneni aNathan naPriscilla?

¹⁶ Hakwila tumoni Yehova chatukundejañayi nikutukolesha kuhitila Mwizu dindi, tutalenu chuma chayimwekeneni aNathan naPriscilla, ashakamaña kuUnited States. Hadi yaaka yantesha yinahitihu, afuukwili kuya nakuzatila kwiluña kwadiña kukaankila kwawakakushimwina aWanta. Nathan wahosheli nindi: “Twakuhweleleli netu Yehova wukukiswila mutunafuukuli.” Ilaña chashikiliwu kwayiliwu nakuzatila, atachikili kukatakata nikumona kukala kwamali. Nkumininaku, awa adisumbula afuntili kumukala wawu, nawa atwalekelihu kumona kukala kwamali. Nathan wanukili nindi: “Natachikili kudihula muloña waweni Nzambi chabulili kutukiswilayi neyi chitwatoñojokeleña. Nadihwileña cheñi neyi kwadiñahu yuma yatama yinakoñeli.” Hela chochu, mukuhita kwampinji aNathan naPriscilla anukili nawu Nzambi wayishiyili chisayikila wanyi hampinji yadiñawu mukukaankila. Nathan wahosheli nindi: “Muniyi mpinji yakala, Bayibolu yekalili neyi ibwambu detu wamuwahi watukolesheleña nikutulombola. Kusha muchima hachatukwashiliyi Yehova kuumika akuna kukala chatela tusheña maana hakukala kutwamweneña, kwatukwashili kudiloñeshela chadimu kuumika nachikuhwelelu kukala kutwakamonaña kumbidi.”

17. Muhela wejina daHelga amukundejeleña ñahi? (Talenu cheñi mwevulu.)

¹⁷ Amanakwetu niahela niwena anateli kutukundeja. Munjilanyi? Talenu chuma chamumwekeneni Helga, washakamaña kuHungary. Hadi yaaka yayivulu, wamweni kukala kwashiyashana kwamuletesheli kuneña chikupu nikudimona nindi wamukunkulwayi. Ilaña neyi yanuka yuma yahitileñamu, wamonaña nindi Yehova wazatishileña amanakwetu niahela muchipompelu kumukundeja. Wasonekeli nindi: “Yehova mpinji yejima wankwashileña neyi amona nindi ñovu jami hijikukeha muloña wanyidimu yakumujimba, kwakamena mwanami wakata nikukala kukwawu. Kanda kwikaleñahu dehi ifuku nidimu muyaaka 30 yinahitihu habulayi dehi kushikija chikaninu chindi chakunkundejaku. Kakavulu, wankoleshaña namazu amawahi nawa akusakilila ahoshañawu akwetu antu. Kakavulu natambwilileña mameseji, makaadi nimazu akunhameka hinakeñesheleña kunkolesha.”

18. Tunateli kukundeja ñahi amakwawu?

¹⁸ Tukweti kukooleka kwakumwimbujola Nzambi yetu kuhitila mukukundeja amakwawu. Tunateli kwila ñahi mwenimu? Tunateli kuyitiyilila nakudiwunjika, kuhosha nawu munjila yakukundeja nikuyikwasha kumujimba munjila jikwawu. (Yish. 3:27) Twazataña nañovu kukundeja ejima anakukabakana, kushilahu niantu achidi kanda atachiki kumukalakela Nzambi. Neyi antuñinetu anafwishi, akata hela anakwakama, twayaña nakuyihempula, twayitiyililaña nikuhanjeka nawu nsañu yakukundeja yamuBayibolu. Neyi tumwimbujolaña Yehova, “Nzambi wakukundeja kwejima,” bayi neyi tukukwashaña hohu akweti akakwitiya kulonda omiki kukalaku, ilaña tukwovwahisha ninyichima yawantu abula kwitiya kulonda eteji kudifukula kwalala.—Mat. 5:16.

YEHOVA WATUKWASHAÑA MPINJI YEJIMA

19. Yumanyi yatwililañayi Yehova, nawa tunateli kumwimbujola ñahi?

¹⁹ Yehova wakamenaña nankashi antu ejima amukeña. Watushiyaña chisayikila wanyi neyi tunakukabakana. Neyi chakamenañayi nvwali chachiwahi mwanindi, Yehova niyena wakamenaña akakudifukula indi ashinshika. Watulombolaña, watwinkaña yuma yitunakukeña, watukiñaña nawa watukundejaña. Twamwimbujolaña Tata yetu wamwiwulu wukweti kukeña neyi tukwashaña nikukolesha amakwawu anakumona kukala. Hela chakwila tukumona kukala niyihuñu, twatela kukuhwelela chikupu netu Yehova wudi nanetu. Kafwampi, watukana nindi: “Bayi wutiya womaku, muloña ami nidi naneyi.” (Isa. 41:10) Chumichi chatukwashaña kumukuhwelela nankashi! Mwamweni, hitwekala nkawetuku.