Indi Bayibolu Mwayimonaña Ñahi?
Komana mwayimonaña nenu . . .
himukanda wamaana awantu?
himukanda watuheka hela wansañu yanyaaka?
hiIzu daNzambi?
BAYIBOLU YAHOSHAÑA NAWU
“Nsona yejima ayonena kudi Nzambi.”—2 Timotewu 3:16, New World Translation.
WULOKU WUMUNATELI KUTAMBWILA NEYI MUKUHWELELA CHAHOSHA BAYIBOLU
Mukuwana ñakwilu yayiwahi yamalwihu akala imwadihulaña.—Yishimu 2:1-5.
Yikuyilombolaña chiwahi muchihandilu chenu chejima.—Masamu 119:105.
Yikuyikwashaña kwikala namuchima wakuchiñeja yuma yakumbidi.—Aroma 15:4.
KOMANA TUNATELI KUKUHWELELA CHIKUPU YUMA YAHOSHAÑA BAYIBOLU?
Eña, hamuloña wayuma yisatu:
Nsañu yekalamu yanuñañana chikupu. Bayibolu ayisonekeli kudi amayala amboka-mboka 40 hadi yaaka yakubadika ha 1,600. Hakachi kawu amavulu hiyadilukiliku. Ilaña nsañu yejima yidimu yanuñañana nawa yikweti mutu wumu.
Kashinshi kawansoneki. Antu eluka nsañu yanyaaka avula kujinda chayishindiluwu antu jawu. Ilaña, ansoneki aBayibolu asonekeli yiluwa yawu yejima niyiluwa yakoñeli muza wawu.—2 Kushindulula 36:15, 16; Masamu 51:1-4.
Wuprofwetu walala. Bayibolu yashimwineñahu dehi kujilumuka kwaBabiloni henohu kunashali yaaka 200. (Isaya 13:17-22) Yashimwini chakamujilumunawu Babiloni niijina damuntu wakenza nakumujilumuna.—Isaya 45:1-3.
Wuprofwetu wukwawu wawuvulu niwena washikijeweli wejima. Chakadi nikujina, ichi dichatela kwikala Izu daNzambi.—2 Petulu 1:21.
LWIHU LUTWATELA KUTOÑOJOKAHU
Izu daNzambi dinateli kuwahisha ñahi chihandilu chenu?
Bayibolu yakula ilu lwihu haISAYA 48:17, 18 niha 2 TIMOTEWU 3:16, 17.