Hinyi Wayuulaña Kanu Kaayi?
Munakutoñojoka nenu . . .
Nzambi diyi wayuulaña?
tahindi muchidi wamuntu?
indi kwiji muntu wacheñi?
BAYIBOLU YAHOSHAÑA NAWU
“Watama diyi wayuulaña kaayi.”—1 Yowanu 5:19.
“Mwana kaNzambi wenjili . . . nakukisañana nyidimu yadiyabolu.”—1 Yowanu 3:8, New Century Version.
WULOKU WUMUNATELI KUTAMBWILA NEYI MWILUKA WAYUULAÑA KAAYI
Mukwiluka chikupu kwafumaña makabi anenzali mukaayi.—Chimwekeshu 12:12.
Mukwiluka yuma yikuyileñela mukuhweleli nenu yuma yikawaha mukaayi.—1 Yowanu 2:17.
KOMANA TUNATELI KUKUHWELELA CHIKUPU YUMA YAHOSHAÑA BAYIBOLU?
Eña, hamuloña wayuma yisatu:
Chiyuulu chaSatana akachikisañana. Yehova nakufwila kumanisha chiyuulu chaSatana chakuyuula antu. Watukana nindi ‘wakamukisañana . . . Diyabolu’ nakuwahisha yuma yejima yaluwañeshayi Satana.—Aheberu 2:14.
Nzambi watonda Yesu Kristu kuyuula kaayi. Yesu wambukaku chikupu nawanyuuli amakonu akweti wukatu nawa asweja ichima. Nzambi nakani kutalisha hawanta waYesu nindi: “Niwazeya niwabula yuma wakayitiyila wushona, . . . Wakayikuula mwayidimbilañawu nimwayikabishilañawu.”—Masamu 72:13, 14.
Nzambi hatwabañaku. Bayibolu yashimuna chiwahi nawu: ‘Nzambi hatweshaña kutwambaku.’ (Aheberu 6:18) Yehova chahoshayi nindi nakela chuma, dikwila nawu chidi neyi wachila dehi. (Isaya 55:10, 11) ‘Mwanta wayuulaña mpata yamunu mwishina wekala dehi chimwañaji.’—Yowanu 12:31.
LWIHU LUTWATELA KUTOÑOJOKAHU
Indi yuma mukaayi yakekala ñahi neyi Satana anamujilumuni dehi?
Bayibolu yakula ilu lwihu haMASAMU 37:10, 11 nihaCHIMWEKESHU 21:3, 4.