Tudi naMuzañalu Hakwiluka Kajindilu

Akulejahu dehi nsañu yakujinda?—a Bayibolu yahoshaña hakajindilu kadimena katenañawu nawu ‘kajindilu kajila.’ Aka kajindilu kajila muloña hikajindilu kaNzambi. Nawa akitenaña nawu kajindilu muloña antu hiyakilukiluku. Niañelu akeñeleña kwiluka yuma yayivulu kutalisha hanaka kajindilu. Wunakukeña wukiluki aka kajindilu?—

Kushankulu, Nzambi waleñeli iyala nimumbanda watachi. Majinawu adiña Adama naEvu. Nzambi wayinkeli iluña dadiwahi dateneneñawu nawu itempa daEdeni. Neyi Adama naEvu amwovwahilili Nzambi, wena nianyanawu adi kwilisha iseki dejima kwikala paradisa neyi dina itempa. Nawa adi kushakama muParadisa haya nyaka. Wunakwanuka chuma cheliluwu aAdama naEvu?—

Adama naEvu adikañili naNzambi, dichikwabulila paradisa makonu. Ilaña Nzambi wahosheli nindi wakawahisha iseki dejima, dichi antu akashakama haya nyaka nawa amuzañalu. Wakadiwahisha ñahi? Hadi yaaka yayivulu, antu elukili wanyi. Kadiña hikajindilu.

Chenjiliyi Yesu hamaseki, walejeleña antu yuma yayivulu kutalisha hanaka kajindilu. Wahosheli nindi hikajindilu kahosha haWanta waNzambi. Yesu walejeleña antu nindi alombeña nawu iwu Wanta winzi. Wakabalumuna iseki kwikala paradisa yayiwahi.

Wunazañalali hakwiluka aka kajindilu?— Watela kwanuka neyi antu amwovwahilaña Yehova diwu hohu akashakama muParadisa. Bayibolu yatulejeña nsañu yayivulu yawamayala nawambanda amwovwahilili Yehova. Wunakukeña kuyiluka?— Tuhanjekenu hadi antu antesha kulonda twiluki chitwatela kuyimbujola.