Kudiza 5

Chumanyi Chafuukulayi Nzambi kwi Seki?

Mulon̂adi Yehova chalen̂eleliyi iseki? (1, 2)

Mulon̂adi iseki chidabulila kwikala paradisa? (3)

Chumanyi chakamwekana kudi antu atama? (4)

Mu mpinji yakumbidi, Yesu wakeladi kudi ayeji? atushinakaji? afu? (5, 6)

Hakuwaninamu munoyu nkisu yakumbidi, chumanyi watela kwila? (7)

1. Yehova walen̂eli dinu iseki kulonda antu ashakamimu namuzan̂alu hayanyaka. Waken̂eli dinu iseki mushakami antu alon̂a, amuzan̂alu mpinji yejima. (Masamu 115:16; Isaya 45:18) Iseki hiyamba kadijilumunaku, dikekala haya nyaka na nyaka.—Masamu 104:5; Mukwakutaŋisha 1:4.

2. Henohu Nzambi kanda alen̂i muntu, Wasakwili kadilun̂a kantesha hanu heseki nakukawahisha kwikala paradisa yayiwahi. Waditeneni nindi itempa da Edeni. Mwitempa idi dimumwashiliyi iyala watachi ni mumbanda, Adama na Evu. Nzambi wayifuukwilili nindi akasemi anyana nakwinzesha iseki dejima. Kumininaku akawahishi iseki dejima dikekali paradisa.—Kutachika 1:28; 2:8, 15.

3. Adama na Evu avulumwini hakumotoka nshimbi ya Nzambi iku aneluki. Dichi Yehova wayifumishili mwitempa da Edeni. Paradisa yajimbeli. (Kutachika 3:1-6, 23) Ilan̂a Yehova hajimbala kufuukula kwindi kudinu isekiku. Walaya kubalumuna dinu iseki kwikala paradisa, omu mwakashakama antu hayanyaka. Munjilanyi mwakelilayi ichi?—Masamu 37:29.

4. Henohu dinu iseki kanda dikali paradisa, antu enjima atama atela kuyifumishamu. (Masamu 37:38) Ichi chikamwekana ha Amagedoni, diyi yekala njita ya Nzambi yakumanisha yuma yatama. Kulondelahu, Satana akamukasa mukaleya hadi nyaka 1,000. Dikwila nawu kosi watama niwumu wakashiyawu nakukisan̂ana dinu iseki. Antu jaNzambi hohu diwu akahanda.—Chimwekeshu 16:14, 16; 20:1-3.

5. Nkumininaku Yesu Kristu wakayula neyi Mwanta hadinu iseki dejima hadi nyaka 1,000. (Chimwekeshu 20:6) Wakafumishan̂a chovuchovu nshidi hanyijimba, ni muyiton̂ojoka yetu. Tukekala antu awanina neyi chochadin̂awu Adama na Evu henohu kanda avulumuni. Hikwakekala nawa chen̂i kukata, kukota, hela kufwaku. Antu akata akayuka, atushinakaji akafunta kuwukwenzi chen̂i.—Yoba 33:25; Isaya 33:24; Chimwekeshu 21:3, 4.

6. Hampinji Yakuyula kwa Yesu Kwekombokaji Danyaka, antu akashinshi akazata mudimu wakubalumuna iseki dejima dikali paradisa. (Luka 23:43) Nawa, yihita yawantu afwa akasan̂ukila kuwumi hanu heseki. (Yililu 24:15) Neyi akela ochu chaken̂ayi Nzambi kudi wena, akatwaleka na wumi hayanyaka hamaseki. Neyi nehi, akayijilumuna hayanyaka.—Yowanu 5:28, 29; Chimwekeshu 20:11-15.

7. Kufuukula kwa Nzambi kwatachi kudinu iseki dihudinu kwakashikijewa. Wunakuken̂a kuwanikewaku muniyi nkisu yakumbidi? Neyi dimu, wunakuken̂ewa kutwaleka nakudiza kumwiluka Yehova nikovwahila nshimbi njindi. Kuwanika kukupompa Hetala daWanta dawaYinsahu ja Yehova didi kwakwihi chikukukwashaku kwila mwenomu.—Isaya 11:9; Aheberu 10:24, 25.

[Mwevulu wudi hefu 10]

Paradisa yajimbala

[Nyevulu yidi hefu 11]

Hanyima ya Amagedoni, iseki akadibalumuna kwikala paradisa