Malwihu Ehulañawu Antañi . . .
Indi Paradisa Yatenawu muBayibolu Yekala Kudihi?
▪ Yesu wakanini muntu wadiña kwakwihi nakufwa wamukuhweleleli nindi: ‘Wakekala nanami muparadisa.’ (Luka 23:43) Indi ona muntu wakekala kudihi? Komana Paradisa yikekala mwiwulu tahindi heseki, indi kwiji kwiluña dikwawu kwahembelelañawu antu kusompesha?
Ankakulula jetu ashakamineña muParadisa. Bayibolu yatulejaña nawu: “Yehova Nzambi watumbili itempa kumusela, muEdeni; mwomwashiliyi muntu wawumbiliyi. . . . Yehova Nzambi watweli muntu, yomusha nimwitempa daEdeni, nindi, kadidimi, kadihembi chachiwahi.” (Kutachika 2:8, 15) Awa mazu chayibalumwinuwu muchiGriki izu dakwila nawu “itempa” aditeneneña nawu pa·raʹdei·sos kwafumishawu izu daLunda dakwila nawu “paradisa.”
Neyi chochatoheshaña eyala namumbanda itala neyi amona nawu anyana anavuli dehi, anvwali jetu atachi niwena ateleleli kutohesha paradisa kubadika jiñinza jetempa daEdeni chadi kuvulawu antu. Nzambi wayilejeli nindi: “Muwanini heseki, mudovwahishi.”—Kutachika 1:28.
Dichi Nleñi yetu wakeñeleña nindi antu ashakami hanu heseki muParadisa nakuvwala anyana. Adi kushakama heseki mwitempa haya nyaka chakubula majamu. Iseki dadi kwikala mukala wawantu ejima haya nyaka. Dichaletesha tudiluñisheña yuma yaleñawu yekala hamaseki. Atuleñeli nawu tukashakameña heseki dalubanji.
Komana kufuukula kwaNzambi kwahimpika? Inehi. Muloña Yehova yomweni watuleja nindi: “Dichi chakekala izu dami dakafuma mukanwa kami, hidakafunta kudami makasakasaku, dakela munakeña.” (Isaya 55:11) Kufuma hampinji yaleñeluwu antu, mwahitili yaaka kubadika 3,000, Bayibolu yahosheli hadi Nzambi nawu, “Wawumbili iseki, wadituñili, wadishimatishili, wadileñeli dibuli kwikala damukunkulwayi, wadiwumbili mushakami antu, nindi, Yami Yehova hikudi wacheñuku.” (Isaya 45:18) Kufuukula kwaNzambi hikwahimpikaku. Iseki damba kekala paradisa.
Kafwampi, nsañu yamuBayibolu yayivulu yahosha haParadisa yalumbulula hohu chakekala chihandilu heseki. Chakutalilahu wuprofwetu waIsaya wahosha nawu: “Akatuña matala, akashakamamu. Akadima matempa anyivinyu, akadya nyikabu yayu.” (Isaya 65:21) Indi matala ayituñilaña kudihi nawa matempa anyivinyu ayidiminaña kudihi? Indi nyikabu ayidiilaña kudihi? Hohanu heseki. Yishimu 2:21 yahosha hatooka to-o nawu: “Akwakwoloka diwu akashakama mwituña.”
Yesu niyena wahosheli haparadisa yaheseki. Wakanini cheñi haparadisa yamwiwulu, ilaña mwakashakama hohu izanvu danyanya datondawu. (Luka 12:32) Chafwawu, ayisañwilaña muParadisa yamwiwulu kulonda akayuuli hamu naKristu antu akekala muParadisa yaheseki. (Chimwekeshu 5:10; 14:1-3) Awa akwakuyuula hamu naKristu mwiwulu akayuula Paradisa yaheseki nikuyihemba chiwahi kwesekeja nanshimbi jaNzambi.
Yesu welukili nindi Nzambi wafuukwili nindi iseki dakekala paradisa. Muloña wadiña mwiwulu naTata yindi hampinji yaleñeluwu itempa daEdeni. Antu ejima akuhwelela akweti kukooleka kwakushakama muparadisa heseki kumbidi. (Yowanu 3:16) Yesu wayikana antu akuhwelela nindi: ‘Mwakekala nanami muParadisa.’—Luka 23:43.
[Mazu aKusakilila eniMwevulu wudi hefu 15]
© FORGET Patrick/SAGAPHOTO.COM/Alamy