Rebeka Wakeñeleña Kumuzañalesha Yehova

Rebeka wadiña mumbanda wamukeñeli Yehova. Nfumwindi wadiña Isaka. Niyena wamukeñeli Yehova. Indi Rebeka wadimweni ñahi naIsaka? Wamwekesheli ñahi nindi wakeñeleña kumuzañalesha Yehova? Tudizenu kulonda tumwiluki.

Anvwali jaIsaka adiña aAbarahama naSara. Ashakamineña mwituña daKenani mwadiña antu abulileña kudifukula kudi Yehova. Ilaña Abarahama wakeñeleña mwanindi kusumbula mumbanda wadifukwileña kudi Yehova. Watemesheli ñamba yindi, hadaha wadiña Eliyeza, nakumukeñela Isaka mumbanda kwiluña datenañawu nawu Harana, kwashakamineña antaña jaAbarahama amakwawu.

Eliyeza wayili nawañamba Abarahama amakwawu. Ilu lwendu lwadiña lwalulehi nankashi. Ayili nawangameli ikumi hiyasendeleluwu yakudya niyawaana. Indi Eliyeza welukili ñahi mumbanda watela kusumbulayi Isaka? Eliyeza nawañamba amakwawu chiyashikili kuHarana, ashakamini heshima muloña Eliyeza welukili nindi antu akwinza nakutaha menji. Walombeli kudi Yehova nindi: ‘Yowu kansi wamumbanda inukwila nami nyikuku menji ninwi, hakunyika, hakunwisha niangameli jami, nukwiluka nami yenowu diyi mumbanda iwunatondi.’

Neyi mukulabula kwadisu, Rebeka wenjili heshima. Bayibolu yahosha nawu wadiña walubanji nankashi. Eliyeza wamulombeli menji akunwa nawa yena wamwakwili nindi: ‘Eña mwani. Nikuyinka nawa nikunwisha niangameli jenu.’ Neyi chiwuneluki, angameli anwaña menji amavulu neyi anatiyi mpwila, dichi Rebeka wayili nakutaha menji mwishima mapampa kakavulu. Wunamoni hamwevulu chinakuzatayi Rebeka nañovu?— Eliyeza wahayamini chakwiliyi Yehova kulomba kwindi.

Eliyeza wamwinkeli Rebeka yawaana yayivulu yayiwahi. Rebeka wamusendeli Eliyeza niañamba amakwawu kwitala. Eliyeza walumbulwili nsañu yamutuminuwu kudi Abarahama nichakwiliyi Yehova kulomba kwindi. Antaña jaRebeka atiyili kuwaha hakumusumbwisha kudi Isaka.

Wunatoñojoki neyi Rebeka wakeñeleña kusumbuka naIsaka?— Rebeka welukili nindi Yehova diyi wamutemesheli Eliyeza. Antaña jaRebeka chamwihwiluwu neyi wukwiteja kuya kuKenani kulonda yakasumbuki naIsaka, yena nindi: ‘Eña mwani nukuya.’ Hohenohu Rebeka wayili naEliyeza. Chashikiliyi muKenani, wasumbukili naIsaka.

Chineli Rebeka welili yuma yakeñeleñayi Yehova, Yehova wamukiswilili. Chimwahitili yaaka yayivulu, Yesu wavwalikilili muchisaka chindi. Neyi wudi neyi Rebeka nawa wamuzañaleshaña Yehova, aneyi wakakukiswila.