KUDIZA 13
Timotewu Wakeñeleña Kukwasha Antu
Timotewu wadiña mukwenzi wakeñeleña kukwasha antu. Wayili kumaluña amavulu nakukwasha antu. Muloña wakukeña kukwasha antu, Timotewu wadiña namuzañalu nankashi. Wunakukeña kwiluka yuma yakoñeliyi?—
Mama yaTimotewu niankaka yindi amudizishili kulonda yamwiluki Yehova
Timotewu wakulili mumusumba watenañawu nawu Lisitira. Henohu wuchidi kansi, nkaka yindi wamumbanda Lowisi nimama yindi Yunisi atachikili kumudizisha kulonda yamwiluki Yehova. Chakuliliyi, Timotewu wakeñeleña kukwasha antu kulonda amwiluki Yehova.
Henohu Timotewu wuchidi kansi, Pawulu wamwilili nindi ayi hamu nindi nakushimwina kumaluña amakwawu. Timotewu wahosheli nindi: ‘Eña mwani.’ Wadiloñesheli kuya nakukwasha antu.
Timotewu wayili hamu naPawulu kumusumba waTesalonika muMasidoniya. Hakwila ashiki endeli lwendu lwalulehi hama nawa akandamini niwatu. Chiyashikiluwu, akwashili antu amavulu kumwiluka Yehova. Ilaña antu amakwawu ayiheleli nawa akeñeleña kuyijaha. Dichi Pawulu niTimotewu afumini muniwu musumba nakuya nakushimwina kwiluña dacheñi.
Timotewu wadiña nachihandilu chamuzañalu
Chimwahitili tukweji, Pawulu wamulejeli Timotewu nindi yafunti kuTesalonika nakumona chazatileñawu amana kwindi. Wateleli kwikala wahamuka hakwila yafunti kuwuna musumba mwadiña antu atama. Ilaña Timotewu wayili muloña welukili wanyi chahandileñawu amana kwetu. Waleteli nsañu yayiwahi kudi Pawulu. Amana kwetu muTesalonika azatileña chiwahi kuspiritu.
Timotewu wazatili yaaka yayivulu naPawulu. Pawulu wasonekeli nindi Timotewu diyi wateleleli kutemeshayi kulonda yayi nakukwasha yipompelu. Timotewu wamukeñeli Yehova nawa wakeñeli antu.
Wayikeña antu nawa wunakukeña kuyikwasha kulonda amwiluki Yehova?— Neyi wayikeña, wukwikala namuzañalu nankashi muchihandilu cheyi neyi chadiñayi Timotewu.