KAPETULU 20

Mudimu Wakukwasha Adi muLukadi

NKEÑELU YAKANU KAPETULU

AkwaKristu amwekeshaña kukeña neyi kudi wubanji

1, 2. (a) Kukalanyi kwamweniwu akwaKristu ashakamineña muYudeya? (b) Kukeña kwamuchidinyi kwayimwekesheleliwu akwaKristu adiña muYudeya?

MWADIÑA muchaaka cha 46 C.E., muYudeya mwadiñi nzala yakapwelendendi. Atumbanji twaKristu aYudeya ashakamineña muniwu musumba hiyadiña namali kulanda yakuda, muloña yakuda yakeheli, wuseya wakandamini chikupu. Antu adiña munzala yayeni. Hela chochu, Yehova wayikwashili awa atumbanji twaKristu munjila yadimena. Chumanyi chikukeña kumwekana?

² Hamuloña wayihuñu yamweniwu akwaKristu aYudeya amuYerusalema nimuYudeya, akwaKristu aYudeya niaJentili amuAntiyoki nimuSiriya, apompesheli mali akukwasha nachu akwawu akwakwitiya. Atondeli cheñi amanakwawu ashikahu ayedi aBaranaba naSawulu atwalili yuma yapompesheliwu kudi aeluda amuYerusalema. (Tañenu Yililu 11:27-30; 12:25.) Toñojokenu chatiyiluwu amanakwawu amuYudeya adiña mukukaankila hakukeña kwayimwekesheleliwu amanakwawu akuAntiyoki!

3. (a) Indi antu jaNzambi makonu achidi kulondela ñahi chakutalilahu chemikiliwu akwaKristu akusambila amuAntiyoki? Shimunenu chakutalilahu. (Talenu cheñi chikasha chinakwila nawu “Mudimu Weneni Watachi Wakukwasha Adi Mukukaankila Wutunazati Makonu.”) (b) Tukuhanjeka hamalwihwinyi mukanu kapetulu?

³ Chuma chakoñeliwu mumafuku awapostolu diyi mpinji yatachi yakwashiliwu akwaKristu akwawu adiñi mukukaankila ashakamineña mwituña dikwawu. Nikulelu, twelaña mwililiwu amanakwetu adiña muAntiyoki. Chitwatiya nawu akwetu akwakwitiya kwituña dacheñi adi muwubanji hela mukweseka, twayikwashaña.a Hakwila twiluki mudimu wakukwasha adi mulukadi chiwesekana nanyidimu yikwawu yamukudifukula kwetu, tuhanjekenu hamalwihu asatu anakuhosha hamudimu wakukwasha adi mulukadi: Muloñadi chitukuhoshela netu kukwasha amanakwetu adi mulukadi himudimu wajila? Chumanyi chaleñelaña tukwashi adi mulukadi? Wulokwinyi wafumaña mumudimu wakukwasha adi mukukaankila?

Kukwasha Adi muLukadi ‘hiMudimu Wajila’

4. Pawulu wayilejeli aKorinda nindidi hamudimu wawakwaKristu?

⁴ Mumukanda wamuchiyedi wasonekeleliyi aKorinda, Pawulu walumbulwili nindi akwaKristu akweti nyidimu yiyedi. Hela chakwila mukanda wasonekeliyi Pawulu wadiña wawakwaKristu awayishewa, nikulelu mazwindi akwashaña ‘nianyikoku amakwawu’ aKristu. (Yow. 10:16) Mudimu watachi wutukweti ‘himudimu wakukundamisha cheñi antu,’ dikwila nawu kushimwina nikudizisha. (2 Kor. 5:18-20; 1 Tim. 2:3-6) Mudimu wamuchiyedi “wakukwasha” amanakwetu neyi chashimwiniyi Pawulu. (2 Kor. 8:4) Mazu akwila nawu “mudimu” ‘nikukwasha’ himazu abalumunawu kufuma kwizu dachiGriki dakwila nawu diakonia dalumbuluka. Kuwahanyi kudi mukwiluka yumiyi?

5. Muloñadi Pawulu chateneniyi mudimu wakukwasha adi mukukaankila nindi himudimu wajila?

⁵ Hakuzatisha izu dodimu dachiGriki nakutena nyidimu yejima yiyedi, Pawulu wesekejeli mudimu wakukwasha antu adi mulukadi hamu nanyidimu yikwawu yazatileña chipompelu chawakwaKristu. Wahosheli hakusambila nindi: “Kudi nyidimu yashiyashana, ilaña kwekala Mwanta yowumu; nawa kudi nyidimu yakuzata yashiyashana, . . . Ilaña ayikoñaña naspiritu yoyimu.” (1 Kor. 12:4-6, 11) Pawulu wahosheleña hanyidimu yambokamboka yamuchipompelu nindi ‘himudimu wajila.’b (Rom. 12:1, 6-8) Dichaleñeleli yatoñojoki nindi wateleleli kuzatisha mpinji yindi kulonda ‘yakwashi akwakujila.’—Rom. 15:25, 26.

6. (a) Kwesekeja nachalumbulwiliyi Pawulu, muloñadi mudimu wakukwasha adi mukukaankila chiwekalila hakachi kanyidimu yamukudifukula kwetu? (b) Lumbululenu chitwazataña mudimu wetu wakukwasha adi mukukaankila mukaayi kejima makonu. (Talenu chikasha chinakwila nawu “Kudiloñesha Henohu Wubanji Kanda Wumwekani” hefu 214.)

⁶ Pawulu wayikwashili aKorinda kwiluka nawu kukwasha adi mulukadi wadiña mudimu walema mukudifukula kudi Yehova. Talenu chahosheliyi: AkwaKristu akwashaña akwawu adi mulukadi elaña mwenimu muloña ‘ovwahilaña nsañu yayiwahi yahosha hadi Kristu.’ (2 Kor. 9:13) AkwaKristu akwashaña akwawu akakwitiya muloña afwilaña kwila mwayilejeliyi Kristu. Pawulu wahosheli nindi nyidimu yayiwahi yakoñelañawu amanakwawu yamwekesheleña ‘luwi lwaNzambi lwasweja.’ (2 Kor. 9:14; 1 Pet. 4:10) Kaposhi Kakutalila kaChizungu kaDecember 1, 1975, kashimwini hakukalakela amanakwetu ahutwa kubombelahu nimudimu wakukwasha adi mukukaankila nawu: “Twatela kwiluka netu mudimu wamuchidiwu awulemesha kudi Yehova niMwanindi Yesu Kristu.” Mudimu wakukwasha adi muyihuñu himudimu wajila.—Rom. 12:1, 7; 2 Kor. 8:7; Heb. 13:16.

Chaleñelaña Tukwashi Adi Muyihuñu

7, 8. Chumanyi chatachi chatuleñelaña kuzata mudimu wakukwasha adi mukukaankila? Lumbululenu.

⁷ Muloñadi chitwakwashilaña antu adi muyihuñu? Pawulu wakwili ilu lwihu mumukanda windi wamuchiyedi wasonekeleliyi aKorinda. (Tañenu 2 Akorinda 9:11-15.) Munawa mavasi, Pawulu washimwini yuma yisatu yitwelaña hakukalakala “iwu mudimu wakuzatila antu,” dikwila nawu, kukwasha adi muyihuñu. Tuhanjekenu haniyi nyidimu.

⁸ Chatachi, mudimu wakukwasha adi muyihuñu waletaña kalemesha kudi Yehova. Talenu Pawulu chateneniyi Yehova Nzambi mapampa katanu munawa mavasi anafumuhu. Pawulu wahosheleña hanjila ‘yaleñelaña antu kumusakilila Nzambi’ ‘nihakumukakilila Nzambi chikupu.’ (Mavasi 11, 12) Wateneni mudimu wakukwasha chiwakwashaña akwaKristu ‘kulemesha Nzambi’ nikuhameka “muloña waNzambi lwasweja.” (Mavasi 13, 14) Pawulu wakunkulwili mazu ashimwiniyi hamudimu wakukwasha adi muyihuñu nindi: “Tumusakililenu Nzambi.”—Vasi 15; 1 Pet. 4:11.

9. Antu ahimpaña ñahi yitoñojoka yawu hakumona mudimu wetu wakukwasha adi mukukaankila? Shimunenu chakutalilahu.

⁹ Kufwana Pawulu, ambuña Nzambi makonu eluka nawu kukwasha adi muyihuñu kwamulemeshaña Yehova nikuwahisha ntañishilu yindi. (1 Kor. 10:31; Tit. 2:10) Kafwampi, iwu mudimu waleteshaña antu antu kubula kumukeña Yehova niaYinsahu jindi kubalumuka. Chakutalilahu: Mumbanda washakamineña mwiluña mwamwekeni mpepela yeneni yaHurricane washili chinjikijilu hachisu chindi nindi: “aYinsahu jaYehova Bayi Mwinza Hetala Damiku.” Ifuku dimu wamweni antu anakuwahisha matala awantu akisikili nampepela yeneni anakuwahisha itala dakisikili heshinadi damukwakwa. Hadi mafuku amavulu, wayimweneña awa antu chamwekesheleñawu kukeña, dichi wayili nakuyihula kulonda yayiluki. Chelukiliyi nindi awa antu adiña aYinsahu jaYehova watiyili kuwaha nawa wahosheli nindi, “Nayimweneña munjila yatama enu antu.” Chumanyi chafuminimu? Wafumishili china chinjikijilu hachisu chindi.

10, 11. (a) Yakutalilahwinyi yinakumwekesha nawu twawanishaña munabuliwu akwetu akwakwitiya mumudimu wetu wakukwasha adi mukukaankila? (b) Buloshuwanyi yakwashaña akwakuzata mudimu wakukwasha adi mukukaankila? (Talenu cheñi chikasha chinakwila nawu “Chozelu Chikwawu Chakukwasha Akwakuzata Mudimu Wakukwasha Adi Mukukaankila.”)

¹⁰ Chamuchiyedi, ‘twawanishaña munabuliwu’ akwetu akwakwitiya. (2 Kor. 9:12a) Twafwilaña kuwanisha munabuliwu amanakwetu niahela kulonda abuli kusweji kukabakana. Muloñadi? Muloña antu amuchipompelu chawakwaKristu ekala “mujimba wumu,” nawa neyi “chidi chimu chikukaba, yidi yejima yamwenaña hamu kukaba.” (1 Kor. 12:20, 26) Dichi kukeñañana kwawu kwayisañumunaña amanakwetu niahela kuleka yuma yinakwilawu nakusenda yozelu yawu yakuzatisha nikuya kwiluña kunamwekani wubanji wadimwekenaña kulonda akwashi akwawu akwakwitiya adi mukukaankila. (Yak. 2:15, 16) Chakutalilahu, chelili muJapan muholoki mutentanshi weneni waleteli dinkanda datenañawu nawu tsunami mu 2011, kasanji kamutayi kaUnited States katemesheli mukanda kuKometi yaKutuña yamuUnited States, nakwihula neyi chakwila “amanakwetu ashikahu antesha” anateli kuya nakukwasha kutuñulula Matala aWanta mudina iluña. Amanakwetu elili ñahi? Hanyima yanyilungu yantesha hohu, akwakuzata mukudikeñela akushika kwakwihi na 600, asonekesheli nawa etejeli kudifwetela aweni hakuya kuJapan nikufunta. Kasanji kamutayi kakuUnited States kahosheli nawu, “Antu anasonekeshi kuya nakukwasha anavuli kubadika itunakukeña.” Manakwetu wumu muJapan chehwiliyi mukwakuzata mukudikeñela wafumini kwituña dacheñi kulonda yashimuni chuma chamusañumwini kuya nakukwasha wamulejeli nindi: “Twekala ‘mujimba wumu’ nawamanakwetu amuJapan.’ Neyi anakukabakana ninetu twakabakanaña.” Muloña wakukeña, akwakuzata mukudikeñela kakavulu ashaña wumi wawu hakatoña kufwila kukwasha akwawu akwakwitiya.c—1 Yow. 3:16.

Switzerland, 1946

MUDIMU WENENI WATACHI WAKUKWASHA ADI MUKUKAANKILA WUTUNAZATI MAKONU

CHIMWAHITILI tukweji twantesha kufuma hamanini Njita Yakaayi Yamuchiyedi muEurope, muSeptember 1945 Manakwetu Knorr wabidikili kutachika kwakampeni yeneni yakutemesha “yuma yakukwasha amanakwetu adiñi mukukaankila muEurope.”

Chimwahitili nyilungu yantesha kufuma habidikiliwu, aYinsahu muCanada, muUnited States nikumatuña amakwawu atachikili kupompesha nikuloñeja chiwahi yakuda niyakuvwala yakutemeshela akwawu. Kufuma muJanuary 1946 nakuya kumbidi, adiña nakutemesha wukwashu kudi akwawu akwakwitiya amuAustria, Belgium, Bulgaria, Czechoslovakia, Denmark, England, Finland, France, Germany, Greece, Hungary, Italy, nimatuña amuNetherlands, Norway, Poland, Romania kushilahu niamanakwetu adiña muChina, nimuPhilippines.

Iwu wukwashu hiwakuminini hohenahanaku. Atwalekelihu kutemesha wukwashu hadi yaaka yiyedi nachikunku. Hayina mpinji amanakwetu niahela akushika ku 85,000 atemesheleli amanakwawu niahela adiña mumatuña mwadiña njita yakuda yakushika kumakeji 300,000, yakuvwala yakushika kumakeji 450,000, nijinsapatu jakushika ku 124,000. MuAugust 1948, iwu mudimu weneni watachi wakukwasha adi mukukaankila wamanini. Kaposhi Kakutalila kamu 1949 kashimwini nawu, “Iwu mudimu wutunazati wunamwekeshi chikupu kukeña kutwadikeña wumu namukwawu. Tuneluki netu amanakwetu ejima elili mwenimu muloña wakumulemesha Mwanta chelukiliwu nawu yumiyi yikukwasha amanakwetu amakwawu kutwalekahu nakudifukula kwalala; nawa amweni nawu hikukooleka kweneni kwakukalakela amanakwawu muniyi njila.” Iwu mudimu wakukwasha adi mukukaankila waleteli kalemesha hadi Yehova, wakwashili akwetu akwakwitiya, wakolesheli wubwambu wetu nawa watuleñeleli kwikala anuñañana nawamanakwetu mukaayi kejima.

¹¹ Antu abula kwikala aYinsahu ahamekaña mudimu wetu wakukwasha adi mukukaankila. Chakutalilahu, hanyima yakwila wubanji wadimwekenaña waweni wuholoki mumusumba waArkansas, muU.S.A., mu 2013, chipapilu chansañu chateneni aYinsahu akwakuzata mukudikeñela chazatiluwu swayi-swayi nawu: “Kuloñesha kwawaYinsahu jaYehova kunatanjiki chiwahi njila yakukwashilamu antu adi muwubanji.” Eñañi, neyi chochu chashimwiniyi kapostolu Pawulu ‘twawanishaña chiwahi munabuluwu’ amanakwetu anakaankili.

12-14. (a) Indi kwila chuma chamuchisatu mumudimu wetu wakukwasha adi mukukaankila kwalemenadi? (b) Mazwinyi ahosheliwu akwetu akwakwitiya amwekeshaña nawu kutwalekahu nanyidimu yaNzambi kwalema?

¹² Chamuchisatu, twakwashaña akwetu adi mukukala kulonda atwalekihu kumuzatila Yehova. Chumichi chalemenadi? Pawulu wahosheli nindi antu atambwilaña wukwashu ‘aswejaña kumusakilila Nzambi.’ (2 Kor. 9:12a) Chuma chachiwahi chatela kwilawu antu atambwilaña wukwashu hakumusakilila Nzambi hikutwalekahu kumuzatila Yehova chakubula kumba mpinji. (Fwi. 1:10) Kaposhi Kakutalila kamu 1945 kashimwini nawu: “Pawulu wetejeli . . . kutambula yawana muloña yakwashileña . . . amanakwetu akwaKristu adiña mukukaankila kulonda niwena ekali nayuma yakeñekeleña kumujimba yateleleli kuyikwasha kutwalekahu kuzata nañovu mumudimu waYehova wakushimwina wunsahu.” Nimakonu twafwilaña kwila chochimu. Neyi atachika cheñi kuzata mudimu wawu wakushimwina, amanakwetu hiyakoleshaña hohu antuñi nawuku ilaña niawenawu.—Tañenu 2 Akorinda 1:3, 4.

¹³ Talenu chahosheluwu antu adiñi mukukala akwashiliwu kulonda atachi cheñi kushimwina, nichayikolesheluiwu hakwila mwenimu. Manakwetu wumu wahosheli nindi, “Chisaka chetu chazañaleli nankashi hakuya mumudimu wakushimwina. Twalekeli kwakamena makabi etwetu aweni muloña twadiña nakukundeja akwetu.” Muhela wumu niyena wahosheli nindi: “Kusha muchima hakuzata nyidimu yaNzambi kwankwashili kuvulamena kukala kwamwekeni mwiluña detu. Hinaswejeli kwakamenaku.” Muhela mukwawu wahosheli nindi: “Hela chakwila hitwadiña nawuswa wakuhimpa yumaku, mudimu wakushimwina wakwashili chisaka chetu kushinshika hachikuhwelelu chitukweti chakumbidi. Kulejaku amakwawu kuchiñeja kutukweti kwetuña dadiha kwakolesheli chikuhwelelu chetu chikupu netu yuma yejima akayibalumuna kwikala yayiha.”

¹⁴ Kutachika kupompa hichuma chikwawu chatela kwilawu amanakwetu anaholokeli muwubanji chakubula kumba mpinji. Shinshikenu chuma chamumwekeneni muhela wejina daKiyoko, wudi dehi muyaaka yamuma 50. Chakisikili yuma yindi namutentanshi weneni waleteli dinkanda datenañawu nawu tsunami, washalili hohu nayuma yavwaliliyi nimasanda, welukili wanyi chakuhandañayi. Dichi eluda wamulejeli nindi akupompelaña mpinji yejima kupompa kwawakwaKristu mumotoka yaniwu eluda. Kiyoko wahosheli nindi: “Ami, eluda, ñodindi nimuhela mukwawu twashakamini mumotoka. Hela chakwila twadiña antesha hakupompa, iku kupompa kwadiña neyi chihayamisha muloña nalekeli kutoñojoka hamakabi inamweni muloña watsunami. Muchima mwivumu wawundili. Akuna kupompa kwankwashili kwiluka kulema kwakudikunda nawakwaKristu.” Muhela mukwawu wahosheli hakupompa kwapompeliyi hanyima yawubanji wamwekeni nindi: “Kupompa kwankwashili kuumika!”—Rom. 1:11, 12; 12:12.

Kukwasha Adi Mukukaankila Kwaletaña Nkisu Yahaya Nyaka

15, 16. (a) Nkiswinyi yatambwililiwu akwaKristu aKorinda niamakwawu hamuloña wamudimu wakukwasha adi mukukaankila? (b) Twahetelañamu ñahi makonu mumudimu wakukwasha adi mukukaankila?

¹⁵ Hampinji yahosheleñayi hamudimu wakukwasha adi mukukaankila, Pawulu wayilumbulwilili aKorinda nkisu yinateli kutambwila niakwawu akwaKristu muloña wakuzata iwu mudimu. Wahosheli nindi: ‘hiyakuyilembelela, [A Yudeya akwaKristu ashakamineña muYerusalema atambwilili wukwashu] nikufwila kuyimona muloña ayikeñeli, nanolu luwi lwaNzambi lwasweja nankashi mudenu.’ (2 Kor. 9:14) Mwamweni, muchima wakuhana wamwekesheluwu aKorinda wayisañumwini aYudeya akwaKristu kulombelelaku amanakwawu adiña muKorinda kushilahu niaJentili, nawa chumichi chaleñeleli asweji kuyikeña.

¹⁶ Hakuhosha hamazu aPawulu ashimuna hankisu yafumaña mukukwasha adi mukukaankila munanu mafuku etu, Kaposhi Kakutalila kaChizungu kaDecember 1, 1945 kahosheli nawu: “Neyi izanvu dimu dawantu jaNzambi dikwasha izanvu dikwawu didi mukukaankila, toñojokenu hakunuñañana kwafumañamu!” Ichi dichuma chamonañawu amanakwetu azataña mudimu wakukwasha adi mukukaankila. Eluda wumu wazatiluku mudimu wakukwasha mwiluña mwadiña dibaji wahosheli nindi, “Kuzata mudimu wakukwasha adi mukukaankila kwanleñeleli kudikunda chikupu nawamanakwami.” Muhela wumu wahamekeli hawukwashu watambwililiyi wahosheli nindi, “Kudikunda nawamanakwetu diyi Paradisa yitwadiluñishaña makonu.”—Tañenu Yishimu 17:17.

17. (a) Indi mazu ekala haIsaya 41:13 akundama ñahi kumudimu wakukwasha adi mukukaankila? (b) Shimunenu yakutalilahu yinakumwekesha mudimu wakukwasha adi mukukaankila chiwalemeshaña Yehova nikukolesha kunuñañana kwetu. (Talenu cheñi chikasha chinakwila nawu “Akwakukwasha Mukudikeñela Amumatuña Ashiyashana Akwashaña Adi Mukukaankila.”)

¹⁷ Neyi akwakuzata mudimu wakukwasha adi mukukaankila ashika mwiluña mudi kukala amanakwetu anaholokeli mukukala elukaña nawu ichi chikaninu chaNzambi chalala chakwila nawu: “Ami Yehova Nzambi yeyi nakakukwataña kuchikasa cheyi chachidiilu, nakakwilaña nami, Bayi wutiya womaku, nukukukwashañaku.” (Isa. 41:13) Hanyima yakupuluka muwubanji muhela wumu wahosheli nindi: “Nakañenyi mwakwilila chinamweni yuma yakisikili, ilaña Yehova wankwatili nachikasa chindi chachidiilu. Nakañanyaña kulumbulula wukwashu wunatambwilili kudi amanakwetu.” Mwiluña dawu chimwamwekeni wubanji, aeluda ayedi asonekeli mukanda kukasanji kamutayi hakwimenaku yipompelu yawu nawu: “Hela chakwila mutentanshi waleteli makabi akadi kumonañahu dehi, ilaña twamweni Yehova chakwashañayi kuhitila mudi amanakwetu. Twatañileña hohu hamudimu wakukwasha adi mukukaankila, ilaña ichi tunadimweni chazatañawu iwu mudimu.”

Komana Munateli Kuzataku Mudimu Wakukwasha Adi Mukukaankila?

18. Chumanyi chimunateli kwila neyi munakukeña kuzataku mumudimu wakukwasha adi mukukaankila? (Talenu cheñi chikasha chakwila nawu “Iwu Mudimu Wamukwashili Chikupu Muchihandilu Chindi.”)

¹⁸ Komana munakukeña kwikala namuzañalu wafumaña mukuzata mudimu wakukwasha adi mukukaankila? Neyi chochu, ilukenu nenu ankoñi amumudimu wakukwasha adi mukukaankila ayifumishaña mumazanvu awakwakutuña Matala aWanta. Dichi lejenu aeluda nenu munakukeña kusoneka fomu yaS-82-E. Eluda wazata mudimu wakukwasha adi mukukaankila wahosheli nindi: “Mwatela kuya kwiluña kunamwekani wubanji chiña neyi ayitambika kudi Komiti Yakwashaña Antu Adi Mukukaankila.” Neyi mwila mwenimu, mudimu wetu wakukwasha adi mukukaankila wukwenda mukutela.

19. Akwakuzata mudimu wakukwasha adi mukukaankila amwekeshaña ñahi nawu twekala atumbanji twaKristu alala?

¹⁹ Mwamweni mudimu wakukwasha adi mukukaankila hinjila yimu yitwovwahilaña lushimbi lwaKristu lwakwila nawu “keñañanenu.” Neyi tukeñañana muniyi njila, twamwekeshaña netu tudi atumbanji twaKristu alala. (Yow. 13:34, 35) Twakooleka nankashi makonu hakwikala nawakwakuzata amavulu adihanaña aletaña kalemesha kudi Yehova muloña wakukwasha antu adi mukukaankila ahakwilañaku Wanta waNzambi.

a Akanu kapetulu kanakuhosha hamudimu wakukwasha adi mukukaankila wutwazatilaña akwetu akwakwitiya. Kakavulu mudimu wetu wakukwasha adi mukukaankila waheteshaña niantu abula kwikala aYinsahu.—Ñal. 6:10.

b Pawulu wazatishili izu dodimu dakwila nawu di·aʹko·nos (nkoñi) hakulumbulula ‘ankoñi akuzatila.’—1 Tim.3:12.

c Talenu chibaaba chinakwila nawu “Aiding Our Family of Believers in Bosnia,” [Kukwasha Chisaka Chetu Chawakwakwitiya muBosnia] muKaposhi Kakutalila kaChizungu kaNovember 1, 1994, mafu 23-27.

MUDIMU WAMUKWASHILI CHIKUPU MUCHIHANDILU CHINDI

INDI kuzataku mudimu wakukwasha adi mukukaankila kunateli kukwasha ñahi atwansi? Talenu chahetelelimu Peter Johnson, wazatiliku iwu mudimu hadiñayi nayaaka 18. Wanukaña nindi: “Chinamweneña amanakwetu chadiña nakusakililawu nimuzañalu wafumaña mukuhana, chanshikili chikupu hamuchima. Chankwashili kwikala nampwila yakumuzatila Yehova muchihandilu chami.” Hanyima yakuzataku iwu mudimu, Peter watachikili wupayiniya wampinji yejima. Wazatililiku cheñi haBeteli nawa mukuhita kwampinji wekalili membala wamuKomiti yaKutuña. Chayinu mpinji, Peter wahosheli nindi, “Kuzataku mudimu wakukwasha adi mukukaankila katachi muchaaka cha 1974, kwankwashili chikupu muchihandilu chami.” Komana wudi kansi? Kwila wila neyi cheliliyi Peter nehi? Chilukanyi hadaha kuzataku mudimu wakukwasha adi mukukaankila kunateli kukukwasha chikupu muchihandilu cheyi mumudimu waYehova.

AKWAKUKWASHA MUKUDIKEÑELA AMUMATUÑA ASHIYASHANA AKWASHAÑA ADI MUKUKAANKILA

CENTRAL NIWEST AFRICA

Mu 1994, antu 800,000 hela kubadikahu ayijahili muRwanda munjita yazuñileñawu muloña wanyichidi. Hanyima yawubanji weniwu, yikonkojola yashikili kuCentral Africa, chakwila yilombu yawamatunduka yenzeli nankashi. Hakwila akwashi akwawu akwakwitiya akabakeni, aYinsahu jaYehova amuBelgium, France nimuSwitzerland atemesheli nandeki yakuvwala, yitumbu, matenti, yakuda yakushika kumakeji 300,000 niyuma yikwawu. Munyilungu yantesha hohu, iyi yuma yashikili kudi amanakwetu adiñi mukukaankila.

Izanvu dawandotolu nimanasi ikumi afumini kuFrance enjili muAfrica nakukwasha amanakwetu akabakeneña muloña wanjita, nzala yakapwelendendi niyikatu yikwawu. Hayaaka yiyedi hohu yahitilihu, idi izanvu dakwashili antu akubadika ha 10,000. Mudimu wawu waletaña mpuhu kudi Yehova nikuloñesha kwindi. Nasi wumu wahosheli nindi: “Neyi tunashiki mwiluña nakukwasha amanakwetu niahela, antu ahoshaña nakalemesha nawu, ‘Awa antu hiyaYinsahu jaYehova. Anenzi nakukwasha amanakwawu.’” Hanyima yakumukwasha kudi nasi wumu, Chinsahu wumu wabidikili nindi: “Nasakililiku, muhelami. Nasakililiku, Yehova!”

Mpinji yikwawu neyi kunamwekani wubanji wahamukwakwa, kwakeñekaña kukwasha antu anaholokeli muwubanji. Mu 2012, kuNigeria, aYinsahu akushika ku 13 afwili muwubanji wahamukwakwa nawa aYinsahu akushika ku 54 adikatishili nankashi, wejima wawu amuchipompelu chimu. Komiti yakukwasha adi mukukaankila yakameneni antu wenawa hampinji yadiñawu muchipatela. Muyeji wadiña munichi chipatela chamweniyi amanakwetu niahela chayakameneneñawu, wamutemesheleli pasita wamuchechi yawu nshiña nakumuleja nindi: “Kwosi muntu niwumu wamuchechi yetu wunenzi nakunhempula. Twayenu kuchipatela mudimweni kukeña kwadikeñawu aYinsahu jaYehova.”

Hela chakwila amanakwetu munichi chipompelu chanyanya ayandili chikupu, kukeña kwayimwekesheleliwu akwawu akwakwitiya kwayikundejeli. Kubombelahu, hanyima yakumona kukeña kwamwekesheliwu akwakuzata mudimu wakukwasha adi mukukaankila, antu amavulu munichi chipompelu azatili hakumina ñovu jawu mumudimu wakushimwina. Henohu iwu wubanji kanda wumwekani, munichi chipompelu mwadiña akwakushimwina 35. Muchaaka chimu hohu akwakushimwina avuliliku nakushika ku 60.

AUSTRALIA

Mu 2013, kabadi kamu kakuchikumu chaQueensland kwamwekeni dibaji dakisañeni matala awaYinsahu 70. Mark naRhonda nimwanawu wamumbanda atemukilili kwiluña daloñesheluwu dakushikena antu adi mukukaankila. Mwiluña denidi mwadiña antu amavulu chikupu. Rhonda wahosheli nindi, “Himwadiña hakushakamaku.” Ipumba datupokupoku twadiña nakuwila nikutuuka daleñeleli mwiluña mwenimu musweji kutama. Muloña wakwila wakameneni chikupu, Rhonda wamwihwili nfumwindi nindi, “Tukwila ñahi?” Mark walombeli kudi Yehova nakumulembelela nindi yayikwashi. Rhonda wahosheli nindi, “Chimwahitili hohu jiminiti 30 kwenjili motoka mwadiña amanakwetu asatu. Chiyenjiliwu kutwadiña atulejeli nawu: ‘Tunakuyisenda. Mukushakamaña kwitala damanakwetu.’” Rhonda wahosheli cheñi nindi: “Chakala kulumbulula chitwatiyili hayina mpinji hakukeña kwatumwekesheleli kuloñesha kwaYehova.”

Akwakuzata mukudikeñela akushika ku 250 ayili kunidi iluña kwamwekeni wubanji nakukwasha amanakwawu. Manakwetu washinakaja dehi wahosheli nindi: “Izanvu dawaYinsahu dinabulili nikwiluka kudafumini denjili nakutachika kufumisha yuma yakisikili mwitala dami. Ami niñodami hitwamba kalalamena chatukwashiliwuku.”

BRAZIL

Mu 2008, mumusumba waSanta Catarina mwekalili dibaji nimalowa aleñeleli antu akushika ku 80,000 kufuma mumatalawu. Muntu washakamaña mwiluña mwamwekeni wubanji wahosheli nindi, idi dibaji dadiña neyi kwiji “mutentanshi watenañawu nawu tsunami of clay, wakotweli nyitondu nikuleta malowa.” Amanakwetu amakwawu atemukilili Mwitala daKupompela Kupompa Kwamaneni. Márcio wahembeleña Itala daKupompela Kupompa Kwamaneni, washimwini nindi: “Awa amanakwetu adiña hohu nayakuvwala yavwaliliwu nawa wejima wawu azoweli namalowa.” Muhela mukwawu wahosheli nindi: “Itala detu dahumukili. Twatiyili kutama hakumona itala denu hidikuhumuka mujisekondi jantesha hohu, ilaña hinamba kavulamena amanakwetu niahela chatukundejeliwuku. Amanakwetu niahela atumwekesheleli kukeña munjila jajivulu. Chumichi chanleñeleli kulemesha chikupu amanakwetu niaheletu.”

Itala daKupompela kupompa kwamaneni kuSanta Catarina, muBrazil, dekalili iluña dakukwashilamu antu adiñi mukukankila nawa mwenzeli wukwashu wahaniniwu amanakwetu mu 2009

Dibaji daletaña malowa dakisañeni chikupu maluña ekala mujimpidi kwakwihi namusumba waRio de Janeiro. Hakwila azateña chiwahi neyi kunamwekani wubanji, amanakwetu atuñili Komiti yaKukwasha Adi Mukukankila. Neyi wubanji wudi kwakwihi nakumwekana, amanakwetu enkawu mudimu wakutala hachumichi (amanakwetu ashakamaña mwiluña denidi) asoñamishaña iyi komiti. Akwakuzata mukudikeñela ashikaña swayi-swayi munyotoka yasonekawu nawu “Jehovah’s Witnesses”—Humanitarian Aid” [aYinsahu jaYehova—Kukwasha Antu]. Amamembala ejima amunidi izanvu daloñeshawu chiwahi, ayinkelaña chadimu nyidimu yatela kuzatawu. Awa ankoñi avwalaña yakuvwala yakuyilukilaku nawu hiyaYinsahu jaYehova. Azatilaña hamu nawamanakwetu ekala muJikomiti Jatiyañanaña naYipatela nawa akwashaña amanakwetu niahela anadikatishi. Akwakuzata mudimu wakukwasha adi mukukaankila aletaña yakuda, menji, yihemba, yakuvwala niyuma yikwawu yakeñekaña. Kufumisha malowa mumatala himudimu weneni chikupu. Mwiluña dimu chimwamwekeni dibaji daleteli malowa, akwakuzata mukudikeñela akushika ku 60, afumishili malowa enzeli nyotoka yiwana mwitala dimu hohu.