Chimunateli Kukwashana Neyi Wubanji Wunamwekani

Ichi wubanji wadimwekenaña wunakumwekena nankashi anu mafuku. Neyi wubanji wunamwekani, chakeñekaña kuzata nañovu nikudiloñesha chiwahi hakwila tukwashani kunamwekanai wubanji. Dichi, Izanvu Dalombolaña dashaku Dipatimenti Yatalaña haWubanji mutusanji twanyitayi twejima.

Neyi amanakwetu ekala muniyi dipatimenti atiya nawu kudi wubanji, ashikenaña kutemeshela akulumpi adi munodu iluña kulonda eluki chakukwashawu akakushimwina. Neyi kudi yuma yinakisiki chikupu yikukañanyawu amanakwetu kukwashana, kasanji katemeshaña amanakwetu ashikahu kulonda alomboli mudimu wakukwasha adi muwubanji. Awa amanakwetu anateli kulomba antu anateli kudihana hela yawaana yakulandamu yuma yikwawu, hela anateli kulanda yuma nakuyinka amanakwetu.

Kudi yuma yayiwahi yafumañamu mukwila yuma muniyi njila. Chakwashanaña kubula kufuntishafuntishahu yuma yoyimu, kuluwañesha nikukisañana mali niyuma, neyi amanakwetu adilila yuma awenawu.

Amanakwetu anatondiwu kudi kasanji anateli kwiluka mali niakakudihana anakukeñeka hakukwashana. Mwatela cheñi kudiluka nawakawuswa, anateli kutukwasha kuzata mudimu wakukwashana mukunyakashana. Bayi muntu atambula mali, kutemesha yuma hela kuya kwiluña kunamwekani wubanjiku sampu anayileji kwila mwenimu.

Hela chochu, neyi kudi wubanji wunamwekani twatela kukwashana. (Heb 13:16) Twakeña amanakwetu! Chumanyi chitwatela kwila? Chasweja kulema, twatela kuyilombelaku antu adi muwubanji nianakuyikwasha. Tunateli cheñi kuhana mali kumudimu wetu wamukaayi kejima. Izanvu Dalombolaña didalejaña tusanji twanyitayi kwiluka kunateli kuzatika chiwahi iyi yawaana. Nawa neyi tunakukeña kutuzatisha, twatela kufwachika fomu yaLocal Design/Construction Volunteer Application (DC-50).

TALENU VIDIYO YINAKWILA NAWU DIBAJI DAKISAÑENI YUMA MUBRAZIL NAWA AKULENU ILU LWIHU:

Yumanyi yinayitishi kuwaha hachakwashiliwu aYinsahu jaYehova antu adiña muwubanji hanyima yadibaji dadiñaku muBrazil mu 2020?