Yesu Wavwalikilili Kudihi Nawa Mpinjinyi?

Kesari Agusitusi, mwanta waWanta waRoma, nahani lushimbi nindi antu ejima atela kusonekesha. Dichi aYosefu naMariya atela kuya kumusumba kwavwalikililiyi Yosefu, musumba waBetelemi, kukabeta kakuchidiilu kaYerusalema.

Antu amavulu adi muYerusalema nakusonekesha. Iluña mwatela kushakamawu hohu aYosefu naMariya himwitaña, mwahembelañawu ayimbuulu niyimuna yikwawu. Yesu navwalikili mwenomu. Mariya namuvuñekeli mumahina nakumukaamika mwiluña mwadiilaña yimuna.

Nzambi wamuletesheli Kesari Agusitusi kutuña ilu lushimbi lwakudisonekesha. Muloñadi? Muloña chumichi chaletesheli Yesu avwalikili muBetelemi, mukala wankakulula yindi Mwanta Davidi. Nsona jashimwineñahu dehi kunyima nawu iwu diwu musumba mwakavwalikila Nyuuli akaniniwu nawu wakavwalika.—Mika 5:2.

Iwu hiwufuku walema chikupu! Iku izanvu dawatubiña didi mumasaña, chejeji chatoñeka chinayitoñekeli. Hikulema kwaYehova! Kañelu kaNzambi wumu nayileji atubiña nindi: “Bayi mutiya womaku, tiyenu, inakuyileja nsañu yayiwahi yamuzañalu wasweja wakekala nawantu ejima. Muloña dalelu mumusumba waDavidi munavwaliki chamwinu chenu, diyi Kristu Mwanta. Ichi dichinjikijilu chimukumwilukilaku; mukuwana mukeki anavuñekeliwu mumahina nawa anamukaamiki mwadiilaña yimuna.” Hohenohu, añelu amakwawu amavulu anamwekani nakuhosha nawu: “Kulema kwiikali kudi Nzambi mwiwulu nawa hamaseki hekali kuwunda hakachi kawantu atiyañayi kuwaha.”—Luka 2:10-14.

Añelu chinayiwu, atubiña anakudileja nawu: “Tuyenu chochichi kuBetelemi tukamoni yuma yinamwekani, yinatulejiyi Yehova.” (Luka 2:15) Ananyakali kuya nawa anamuwani Yesu wunavwaliki mwiluña mwayilejayi kañelu. Atubiña chinakulumbululawu nsañu yayilejawu kudi kañelu, antu ejima anahayami. Mariya nahembi iyi nsañu yejima nawa nakutoñojoka mumuchima windi muyinatalishi.

Antu amavulu makonu akuhwelela nawu Yesu wavwalikili ha 25 December. Ilaña muBetelemi, mukakweji kaDecember mwekalaña nvula nichishika. Mpinji yikwawu, mwanokaña nisino. Munaka kakweji, chadi kuyikalila nankashi atubiña kushakama mumasaña wufuku wejima nakubiña nyikanka yayimuna yawu. Cheñi, hichadi kutwesheka mwanta waRoma kuleja antu adikañileña nayena nindi endi lwendu lwamafuku amavulu muchishika chasweja nakuya nakudisonekeshaku. Chakadi nikujina, Yesu wavwalikili mumaOctober.