Añelu Anabidiki Kuvwalika kwaYesu

Nyuuli yawaRoma, Kesari Agusitusi, wahanini lushimbi nindi aYudeya ejima afunti kunyikala yawu nakudisonekesha. Dichi aYosefu naMariya afuntili kuBetelemi, kwafumini chisaka chaYosefu. Mariya wadiña kwakwihi nakuvwala mwana.

Chashikiliwu kuBetelemi, iluña dawaniniwu mwakushakama mwadiña hohu mwitaña. Mariya dimwavwalililiyi mwanindi Yesu. Wamuvuñekeli mumahina nakumukaamika mwadiilaña yimuna.

Kwakwihi naBetelemi, kwadiña atubiña ashakamineña mwisaña nakuhemba yimuna yawu nawufuku. Hohenohu, kañelu kaYehova wamwekeni kudi wena nawa kulema kwaYehova kwayitoñekeleli chejeji heluña hadiñawu. Atubiña atiyili woma, ilaña kañelu wayilejeli nindi: ‘Bayi mutiya womaku. Inakuyileja nsañu yamuzañalu. Dalelu muBetelemi munavwaliki Mesiya.’ Hayoyenoyu mpinji, kwamwekeni añelu amavulu muluzwizu, nakuhosha nawu: ‘Kulema kwiikali kudi Nzambi mwiwulu nawa hamaseki hekali kuwunda.’ Kuhiñahu añelu alekeli kumwekana. Chumanyi cheliliwu atubiña?

Atubiña atachikili kuhanjeka mulwawu nawu: ‘Tuyenu chochichi kuBetelemi.’ Ayili swayi-swayi nawa awanini aYosefu naMariya mwitaña adi namwanawu wunavwaliki.

Ejima atiyili nsañu yayilejeliwu atubiña kudi kañelu ahayamini. Mariya watoñojokeli chikupu hamazu ahosheliyi kañelu nawa wayihembeli. Atubiña afuntili nakutala yimuna yawu iku anakumusakilila Yehova hayuma yejima yamweniwu nikutiya.