Yowanu Nakukeña Kutiya Chikuhoshayi Yesu

FYowanu Mpapatishi nashakami mukaleya kwakwihi nachaaka chimu. Hela chochu, nakutiya nyidimu yamaneni yinakuzatayi Yesu. Fwikijenu chinatiyiyi Yowanu chinamulejiwu kudi atumbanji twindi nawu Yesu nasañuli mwana kantuluwa muNena. Hela chochu, Yowanu nakukeña Yesu amuleji munatalishi yuma yejimiyi. Dichi Yowanu natemeshi atumbanji twindi ayedi. Nakwiladi? Nakumwihula Yesu nawu: “Komana yeyi Owu Wunakwinza tahindi twatela kutalila wacheñi?”—Luka 7:19.

Komana ilu hilwihu lwakala? Yowanu hiiyala wadihana, hamupapatishileñayi Yesu kwakwihi nayaaka yiyedi yinahitihu, wamweni spiritu yaNzambi yinakwinza hadi Yesu nawa watiyili izu daNzambi dakumwiteja. Kwila tutoñojoka netu chikuhwelelu chaYowanu chinazeyi nehi. Neyi dichichadiña, Yesu hadi kumuhameka Yowanu haniyi mpinjiku. Hanu neyi Yowanu nakujinoka wanyi, muloñadi chinamwihwiliyi Yesu ilu lwihu?

Yowanu nakukeña hohu kutiya mukanwa kaYesu nindi diyi Mesiya. Chumichi chikumukolesha Yowanu hampinji yinakukabakanayi mukaleya. Nawa hadaha lwihu lwindi lunakumwekesha nawu kudi yuma yikwawu yinakukeña kwilukayi. Weluka nankashi wuprofwetu wamuBayibolu wamwekeshaña nawu waWayishewa waNzambi wakekala mwanta nawa chamwinu. Hela chochu, munahiti tukweji twatuvulu kufuma hamupapatishiliwu Yesu, Yowanu wuchidi mukaleya. Dichi Yowanu nakwihula neyi kudi muntu mukwawu wunakwinza, wakamusinsa Yesu, munjila yikwawu, wakashikija yuma yejima yashimwineñahu dehi hadi Mesiya nawu wakayila.

Chatela ayileji atumbanji twaYowanu nindi, ‘Eña iyami wunakwinza,’ Yesu nayileji wunsahu nindi anakumukwasha kudi Nzambi kuhitila mukuuka antu amavulu akweti nyisoñu niyikatu yashiyashana. Kuhiñahu nayileji atumbanji nindi: “Yenu mwakamuleji Yowanu yuma yimunakutiya nikumona, nenu: Amputamesu anakumona, ayifwayi anakwenda, akambumba anakuyitookesha, anjika matu anakutiya, afu anakuyisañula nawa atuzweñi anakuyishimwina nsañu yayiwahi.”—Matewu 11:4, 5.

Lwihu lwaYowanu lunakumwekesha nawu Yesu watela kwila yuma yayivulu kubadika yinakwilayi haniyi mpinji nawa hadaha nikumufumisha Yowanu mukaleya. Hela chochu, Yesu nakumuleja Yowanu kubula kukuhwelela yuma yayivulu kubadika yihayamisha yinakukoñayi.

Chinayiwu atumbanji twaYowanu, Yesu naleji izaza dawantu nindi Yowanu hikaprofwetu hohu wanyi. Diyi “ntemesha” aprofweteleñahu dehi haMalaki 3:1. Diyi cheñi kaprofwetu Elija, ashimwineñawu dehi haMalaki 4:5, 6. Yesu nalumbululi nindi: “Inakuyileja chalala nami, hadi antu avwalika kudi ambanda, kanda kwikaleñahu dehi muntu wamubadika Yowanu Mpapatishiku, ilaña muntu wakehelamu muWanta wamumawulu diyi wamubadika.”—Matewu 11:11.

Yesu chinahoshiyi nindi wakehelamu muWanta wamumawulu diyi wamubadika Yowanu, nakumwekesha nindi Yowanu hakekala muWanta wamwiwuluku. Yowanu waloñesheli njila yaYesu ilaña nafwi henohu Kristu kanda enzununi njila yakuya mwiwulu. (AHeberu 10:19, 20) Ilaña, Yowanu hikaprofwetu kaNzambi washinshika nawa wakekala muWanta waNzambi wahamaseki.