Yowanu Mupapatishi—Chakutalilahu Chatukwashaña Kutwalekahu Kwikala naMuzañalu

KUDIHU mudimu wumunakufwila muchipompelu ilaña himunakuwuzataku? Hadaha diwu mudimu wunakuzata muntu wacheñi. Hela diwu mudimu wumwazatileña kunyima. Hela chochu, kukula, kukata kata, kukala kwamali hela kwakamena chisaka kunakuyikañesha kuzata mudimu wumwatela kuzata. Indi kwiji muloña wakuhimpika mukuloñesha, mwalekeli kuzata mudimu wumwazatili hadi mpinji yayilehi. Hichidi namuloña naniku kukalaku, munateli kudimona nenu munakuzata wanyi kwesekeja nachimwatela kuzata mumudimu waNzambi. Mukukala kwamuchidiwu, mpinji yikwawu munateli kuneña. Hela chochu, chumanyi chinateli kuyikwasha kubula kuneña, kubula kuzuwa hela kuhemba ndulu? Munateli kutwalekahu ñahi kwikala namuzañalu?

Tunateli kudizilaku chuma chalema kudi Yowanu Mupapatishi hakwila nawu tutwalekihu kwikala namuzañalu. Yowanu wadiña nakuzata nyidimu yayivulu, ilaña hakuhweleleli nindi kudi chuma chikumumwekena muchihandiluku. Hadaha Yowanu hatoñojokelihu nindi wukushakama mpinji yayilehi mukaleya kubadika yazatiliyi mumudimu wakushimwinaku. Hela chochu, Yowanu watwalekelihu kwikala namuzañalu muchihandilu chindi chejima. Chumanyi chamukwashili? Nawa tunateli kwikala ñahi cheñi namuzañalu hela chakwila tunakuhita mukukala?

MUDIMU WAMUZAÑALESHELEÑA YOWANU

Mu 29 C.E., Yowanu watachikili mudimu windi wakwimenaku kwinza kwaMesiya, dichi watachikili kuhosha nindi: “Balumukenu munyichima, muloña Wanta wamwiwulu wunaswini dehi kwakwihi.” (Mat. 3:2; Luka 1:12-17) Amavulu atiyili. Dichi, antu amavulu afumineña kwakulehi nakwinza nakutiya mazu indi, dichi abalumukili nawa apapatisheweli. Cheñi, Yowanu wahamukili nakuyisoñamisha anlomboli amunsakililu adimweneña kuloña nindi akayisompesha neyi abula kuhimpa yilwilu yawu. (Mat. 3:5-12) Yowanu welili chuma chalema mumudimu windi wakushimwina hampinji yamupapatishiliyi Yesu kukuma kwa 29 C.E. Kufuma hayina mpinji, Yowanu walejeleña antu kumulondela Yesu, Mesiya akaniniwu.—Yow. 1:32-37.

Kutalisha hamudimu wazatileña Yowana, Yesu wahosheli nindi: “Hadi antu avwalika kudi ambanda, kanda kwikaleñahu dehi muntu wamubadika Yowanu Mupapatishiku.” (Mat. 11:11) Chakadi nikujina Yowanu wazañaleli nankisu jatambwililiyi. Kufwana Yowanu, antu amavulu makonu anatambwili nkisu jajivulu kufuma kudi Yehova. Talenu chuma chamumwekeneni manakwetu Terry. Yena niñodindi Sandra, anazati yaaka kubadika ha 50 mumudimu wampinji yejima. Manakwetu Terry wahosheli nindi: “Nadiña nakukooleka kwakuvulu. Nadiña payiniya, nazatilileña haBeteli, nadiña payiniya wadimena, nkoñi wañinza, nkoñi wankambi nawa nekali cheñi payiniya wadimena.” Twazañalalaña neyi atwinka kukooleka kwamuchidiwu mumudimu waYehova, ilaña neyi chitukudizila kudi Yowanu chakeñekaña kuzata nañovu neyi chihandilu chinahimpiki.

TWALEKENUHU KUSAKILILA

Yowanu Mupapatishi watwalekelihu kwikala namuzañalu muloña wazañaleleña namudimu windi. Shinshikenu hanichi chakutalilahu. Hanyima yakumupapatisha Yesu, mudimu waYowanu watachikili kufunta mwishima ilaña waYesu wayilileñaku hambidi. Atumbanji twaYowanu adakameneni, dichi amwilili Yowanu nawu: “Tiyaña, nakupapatisha, nawa antu ejima anakuya kudi yena.” (Yow. 3:26) Yowanu wayakwili nindi: “Muntu wejima wukweti kankaña hikalemba. Ilaña ibwambu dakalemba neyi yemana nakutiya chinakuhoshayi, wazañalalaña nankashi hakutiya izu dakalemba. Dichi, muzañalu wami wunasweji chikupu.” (Yow. 3:29) Yowanu watoñojokeli wanyi nindi mudimu windi wadiña wamukunkulwayi muloña wamudimu walema wadiña nakuzatayi Yesu. Ilaña, watwalekelihu kwikala namuzañalu muloña walemesheli mudimu windi wakwikala “ibwambu dakalemba.”

Yilwilu yindi yamukwashili kutwalekahu kwikala namuzañalu hela chakwila mudimu wazatileñayi wadiña wapela wanyi. Chakutalilahu, Yowanu wadiña kaNaziri dichi amukanishili kunwa vinyu. (Luka 1:15) Yesu wahosheli kutalisha hachihandilu chaYowanu nindi: “Chenjiliyi, hadiileña hela kunwaku.” Kwambukaku, Yesu niatumbanji twindi hiyadiña munilu lushimbiku, ilaña adiña nakuhanda neyi antu ejima. (Mat. 11:18, 19) Cheñi, chineli Yowanu wadiña wanyi nakukoña yihayamisha, welukili nindi atumbanji twaYesu kushilahu ninana adiña atumbanji twindi ayinkeli ñovu yakukoña yihayamisha. (Mat. 10:1; Yow. 10:41) Yowanu washili muchima hamudimu windi wamwinkeliwu kudi Yehova chatela yatoñojokeña hanichi chaambu.

Neyi ninetu tulemesha mudimu wutukweti mumudimu waYehova, chikutukwasha kwikala namuzañalu. Manakwetu Terry itwashimuna hakusambila, wahosheli nindi, “ nashili maana hamudimu wejima wanyinkeleñawu.” Neyi yanuka hachihandilu chindi chamumudimu wampinji yejima wahoshaña nindi: “Naditoñeshaña wanyi ilaña nanukaña hohu yuma yayiwahi.”

Tunateli kwikala namuzañalu chikupu mumudimu waNzambi kuhitila mukutoñojoka chikupu hachuma chaleñelaña mudimu wejima hela kukooleka kudi kwejima kwikali kwalema. Kwikala “akwakukalakala hamu naNzambi,” hikukooleka kwakweni. (1 Kor. 3:9) Chuma chinateli kutwalekahu kumwekana lubanji neyi tunakuchihemba chiwahi, munjila yoyimu tunateli kutwalekahu kwikala namuzañalu neyi tutoñojokaña chalemena kumukalakela Yehova. Twesekejaña wanyi nyidimu yetu nayawantu amakwawu. Tukumonaña wanyi mudimu wutunakuzata netu wamukunkulwayi muloña wamudimu wunakuzata akwetu.—Ñal. 6:4.

SHENU MUCHIMA HAYUMA YAKUSPIRITU

Hadaha Yowanu welukili nindi mudimu windi wukashimbula wanyi, ilaña welukili wanyi chiwadi kumana. (Yow. 3:30) Chimwahitili tukweji 6 kufuma hamupapatishiliwu Yesu mu 30 C.E., Yowanu amukasili kudi Mwanta Herodi. Hela chochu, Yowanu watwalekelihu kushimwina nsañu yayiwahi. (Maku 6:17-20) Hanu dinu, chumanyi chadi kumukwasha kutwalekahu kwikala namuzañalu muniku kukala? Watwalekelihu kusha muchima hayuma yakuspiritu.

Hampinji yadiñayi Yowanu mukaleya, watiyili nawu Yesu nakukalakala nyidimu yamaneni. (Mat. 11:2; Luka 7:18) Yowanu welukili chikupu nindi Yesu wadiña Mesiya ilaña wajinokeleña chadi kushikijayi Yesu yuma yejima yashimwiniwu munsona kutalisha hadi Mesiya. Chineli Mesiya wenjileña nakwikala Mwanta, komana chiyuulu chaYesu chadi kutachika kuyuula hohenohu? Komana wadi kumufumisha Yowanu mukaleya? Yowanu wakeñeleña kwiluka yuma yayivulu yadi kukoñayi Yesu, dichi watemesheli atumbanji twindi ayedi kulonda amwihuli Yesu nawu: “Komana Yeyi itwatalilaña nawu wunakwinza tahindi kudi wacheñi?” (Luka 7:19) Chafuntiliwu, Yowanu watela watiyilili nakanañachima chalumbulwileñawu nawu Yesu nakuuka antu muchihayamisha nawa wayifuntishili kuya nakumuleja Yowanu nawu: “Amputamesu anakumona, akwakubalakata anakwenda, akwambumba anakuyitookesha, ajika matu anakutiya, afu anakuyisañula nawa atuzweñi anakuyishimwina nsañu yayiwahi.”—Luka 7:20-22.

Yuma yamulejeliwu Yowanu kudi atumbanji twindi yamukolesheli. Chamwekesheli hatoka nawu Yesu nakushikija wuprofwetu wawuMesiya. Yowanu welukili nindi mudimu windi wadiña walema hela chakwila Yesu wamufumishili wanyi mukaleya. Hela chakwila wadiña mukukala, watwalekelihu kwikala namuzañalu.

Kufwana Yowana, neyi tusha maana hakumukalakela Yehova, tukutwesha kuumika namuzañalu nikudiwunjika. (Kol. 1:9-11) Tunateli kuumika kuhitila mukutaña Bayibolu nikutoñojokahu chikupu, nawa chumichi chikutwanukishaña netu mudimu wejima wutwamukalakelaña Nzambi wamukunkulwayi wanyi. (1 Kor. 15:58) Muhela Sandra wahosheli nindi: “Kutaña kapetulu kamu kamuBayibolu hefuku-hefuku kunankwashi kuswina kwakwihi naYehova. Kwankwashaña kusha muchima hadi yena bayi hadi ami aweniku.” Twatela cheñi kusha muchima hansañu yinakuhosha hanyidimu yaWanta, yinateli kutukwasha kuleka kutoñojoka hakukala kwetu kulonda tusheña maana hanyidimu yinakuzatayi Yehova. Sandra wahosheli nindi: “Progiramu yahakakweji yaJW Broadcasting^® yinatukwashi kukundama kwakwihi nakuloñesha nikutwalekahu kwikala namuzañalu mumudimu wetu.”

Hampinji yantesha yazatiliyi Yowanu Mupapatishi, washimwinini “naspiritu niñovu yaElija” nawa kufwana Elija, “wadiña muntu watiyileña neyi chitwatiyaña etu.” (Luka 1:17; Yak. 5:17) Neyi twimbujola chalemesheliyi mudimu windi nikushindamena hayuma yakuspiritu, ninetu tukwikala namuzañalu mumudimu wetu waWanta, hichidi namuloña nayuma yinateli kumwekanaku.