Elizabeta Nekali naMwana

Chimwahitili yaaka kubadika ha 400, kufuma hatuñulwiliwu mpwembu jaYerusalema, kapristu Zekariya niñodindi Elizabeta, ashakamineña kwakwihi namusumba. Ashakamini muwulu hadi yaaka yayivulu, ilaña hiyadiñahu namwanaku. Ifuku dimu, Zekariya halambwileñayi insensi mutembeli yajila, kañelu Gabireli wamwekeni. Zekariya watiyili woma, ilaña Gabireli wamulejeli nindi: ‘Bayi wutiya womaku. Nakuleteli nsañu yayiwahi yinafumi kudi Yehova. Ñodeyi Elizabeta wakavwala mwana weyala nawa ijina dindi wakekala Yowanu. Yehova namutondi Yowanu kulonda akazati mudimu wadimena.’ Zekariya wehwili nindi: ‘Nukukuhwelela ñahi muwunahoshi? Ami niñodami twakula dehi tukutwesha kwikala namwana wanyi.’ Gabireli waakwili nindi: ‘Anantemeshi kudi Nzambi nakukuleja iyi nsañu yayiwahi. Ilaña chineli wunankuhweleli wanyi, wukwikala kamama sampu mwana navwaliki.’

Hanidi ifuku, Zekariya washimbwili nankashi mwiluña dajila. Chelili nediki dehi hanji, antu amuhembeleleña hanji akeñeleña kwiluka chuma chamwekeni. Zekariya hatwesheleña kuhoshaku. Wazatishileña hohu makasa. Hohenohu antu elukili nawu kudi nsañu yinatambwiliyi kudi Nzambi.

Mukuhita kwampinji, Elizabeta wekalili nevumu nawa wavweli mwana weyala, neyi chashimwiniyi kañelu. Amabwambu jindi niantaña enjili nakutala mwana. Azañaleli nankashi. Elizabeta wahosheli nindi: ‘Ijina dindi wukwikala Yowanu.’ Wena ahosheli nawu: ‘Muchisaka cheyi mwosi niwumu wukweti ijina daYowanu. Mutuumbi neyi Zekariya, ijina datata yindi.’ Ilaña Zekariya wasonekeli nindi: “Ijina dindi diyi Yowanu.” Hayoyina mpinji, Zekariya watachikili kuhosha cheñi! Nsañu yaniwu mwana yatiyakeni muYuda mwejima nawa antu atachikili kuhosha nawu: ‘Indi iwu mwana wakekala muntu wamuchidinyi?’

Kuhiñahu Zekariya wenzeli naspiritu yajila. Waprofweteli nindi: ‘Yehova amushimeki. Wamukanini Abarahama nindi wakatemesha chamwinu, Mesiya, wakatwamwina. Yowanu wakekala kaprofwetu, nawa wakamuloñeshela Mesiya njila.’

Kudi cheñi chuma chadimena chamumwekeneni Mariya ntaña yaElizabeta. Tuyenu tutali chumichi mukapetulu kanalondelihu.