Muntu Wakaloñesha Njila Navwaliki

Elizabeta wudi kwakwihi nakupaapa. Ntaña yindi Mariya nashakami nindi hadi tukweji tusatu. Ichi dinu Mariya hakufunta kumukala wawu hadi chintampu chachilehi kukabeta kakuchimunswa kuNazareta. Niyena wukuvwala mwana weyala neyi munahiti dehi tukweji kwakwihi na 6.

Mariya chinayiyi tuhu, Elizabeta napaapi. Wenowu muzañalu wunatiyiwu muloña Elizabeta napaapi chiwahi nawa yena nimukeki akola kumujimba! Elizabeta chinayilejiyi antuñi nindi niantaña jindi iwu mwana, anazañaleli hamu nindi.

Nshimbi jaNzambi jayinkeliyi aIsarela jahosheli nawu mwana weyala atela kumwalamisha hefuku damu 8 kufuma havwalikiliyi, nikumutuumba ijina. (ALevi 12:2, 3) Amakwawu anakukeña nawu iwu mwana kaZekariya amutuumbi ijina datata yindi. Ilaña, Elizabeta nakaani nakuhosha nindi: “Inehi! tukumutenaña netu Yowanu.” (Luka 1:60) Anukenu nenu kañelu Gabireli wahosheli nindi iwu mukeki atela kumutuumba nawu Yowanu.

Antuñi nindi niantaña jindi anakaani nawu: “Hakachi kawantaña jeyi hosi niwumu wukweti idi ijinaku.” (Luka 1:61) Anamwihuli Zekariya namakasa kulonda eluki ijina dinakukeñayi nindi amutuumbi mwanindi. Zekariya nalombi ilola dawubasa nawa nasonekihu ñakwilu nindi: “Ijina dindi diyi Yowanu.”—Luka 1:63.

Hohenohu, muchihayamisha Zekariya natachiki kuhosha cheñi. Neyi chimunakwanuka, walekeli kuhosha hampinji yabulili kukuhwelelayi mazu amulejeliwu kudi kañelu nindi, Elizabeta wakavwala mwana weyala. Ichi dinu, Zekariya chinatachikiyi kuhosha, antuñi nindi anahayami nawa anakudihula nawu: “Indi iwu mukeki wakekala muntu wamuchidinyi?” (Luka 1:66) Anamoni ñovu jaNzambi munjila munamutuumbiliwu Yowanu ijina.

Kuhiñahu, Zekariya nenzali naspiritu yajila nakuhosha nindi: “Yehova Nzambi yaIsarela amushimeki, muloña naanuki antu jindi nawa nayikuuli. Nawa natunyamwini dehi luseñu lwawamwinu mwitala dakambuñindi Davidi.” (Luka 1:68, 69) Chinahoshiyi nindi “luseñu lwawamwinu,” dikwila nawu nakutena Mwanta Yesu, wuchidi kanda avwaliki. Kuhitila mudi Owu, Zekariya nahoshi nindi, Nzambi “hanyima yakutupulwisha mumakasa awayilumbu, wakatwinka kukooleka kwakumuzatila mudimu wajila chakadi woma nakashinshi nikuloña kumesu indi mafuku etu ejima.”—Luka 1:74, 75.

Zekariya nashimwini chadimu kutalisha hadi mwanindi nindi: “Hakwila eyi mwana wanyanya, akakutena nawu kaprofwetu kaMukakubadika Chikupu, muloña wakayañahu dehi hambidi yaYehova kulonda wakamuloñesheli njila jindi, nikuleja antu jindi nsañu yawamwinu nakuyanakena nshidi jawu, hamuloña waluwi lwaNzambi yetu. Ilu luwi lwakufuma mwiwulu lwakatoñekela hadi etu neyi chejeji chetena dinakusela, nakutoñekela antu adi mumwidima nimumwidima wakufwa nikulombola nyendu yetu munjila yakuwunda.” (Luka 1:76-79) Iwu wuprofwetu watukoleshaña chikupu!

Haniyi mpinji, Mariya wuchidi kanda asumbuki, nashiki mumukala wawu muNazareta. Chumanyi chikumumwekena neyi antu eluka nawu wudi nevumu?