Yowanu naKuloñesha Njila

Yowanu mwana kaZekariya naElizabeta, wekalili kaprofwetu chakuliliyi. Yehova wamuzatishili Yowanu kushimwina antu nindi Mesiya nakwinza. Chatela atañishileña mumasinagogi hela mumatawuni, Yowanu washimwinineña mwisaña. Antu afumineña muYerusalema nimuYuda mwejima nakwinza kudi Yowanu kulonda ayidizishi. Wayidizishileña nindi hakwila amutiyisheña Nzambi kuwaha, ateleleli kuleka kwila yuma yatama. Hanyima yakutiyilila kudi Yowanu, antu amavulu abalumukileña munyichima nakuleka nshidi jawu nawa wayipapatishileña muKaloña Yodani.

Yowanu hadiña nayuma yayivuluku. Wavwalileña yakuvwala yakutuña namavuji angameli nawa wadiileña atuboola niwuchi wamwisaña. Antu akeñeleña kwiluka nsañu yayivulu hadi Yowanu. NiaFwarisi nawaSadusi adivwimba enjili nakumutala. Yowanu wayilejeli nindi: ‘Mwatela kuhimpa yilwilu yenu nakubalumuka mumuchima. Bayi mutoñojoka nenu mwalema muloña wanochu chimwahoshaña nenu mudi anyana kaAbarahamaku. Chumichi hichinatalishi mukwila nawu mudi anyana kaNzambiku.’

Antu amavulu enjili kudi Yowanu nakumwihula nawu: ‘Chumanyi chitwatela kwila hakwila tumutiyisheña Nzambi kuwaha?’ Yena wayilejeli aYudeya nindi: ‘Neyi wukweti yakuvwala yiyedi, hanakuhu chimu kudi muntu wunabuli.’ Wuneluki chaletesheli ahoshi muniyi njila? Wakeñeleña nindi atumbanji twindi eluki nawu hakwila amutiyisheña Nzambi kuwaha, atela kukeña antu.

Yowanu walejeli akakutambula nyisonku nindi: ‘Ikalenuña ashinshika nawa bayi mudimba muntu wudi wejimaku.’ Amashidika wayilejeli nindi: ‘Bayi mutambula majika kanwa hela kutwambaku.’

Atupristu niaLevi niwena enjili kudi Yowanu nakumwihula nawu: ‘Yeyinyi? Ejima anakukeña kwiluka.’ Yena wayakwili nindi: ‘Yami izu dinakubidika mwisaña, dinakulombola antu kudi Yehova, neyi chashimwineñahu dehi Isaya.’

Antu akeñeli nsañu yayidizishileñayi Yowanu. Amavulu adihwileña neyi chakwila diyi wadiña Mesiya. Ilaña wayilejeli nindi: ‘Wambadika ami nakwinza. Ami nashikilimu wanyi nikukasununa nkwabilu jindi. Ami napapatishaña namenji, ilaña yena wakapapatishaña naspiritu yajila.’