Yesu Nadiishi Antu Amavulu

Henohu Chipandakenu chamuchaaka cha 32 C.E., kanda chishiki, apostolu afuntili kufuma kwayiliwu nakushimwina. Dichi Yesu wayisendeli muwatu nakuya kuBeteseda, kulonda akanooki. Ilaña chashikiliwu kwakwihi nachikumu, Yesu wamweni antu amavulu anayilondeli kwenoku. Hela chakwila Yesu wakeñeleña kwikala kwakankawindi nawapostolu indi, wayitambwilili antu chiwahi. Wokili antu jawu akata nawa watachikili kuyidizisha. Mwaana wejima, wayidizishili haWanta waNzambi. Chikwelili melela, apostolu indi enjili nakumuleja nawu: ‘Awa antu atela anatiyi nzala. Yileji ayi nakukeña yakuda.’

Yesu wahosheli nindi: ‘Hiyatela kuyaku. Yinkenu yakuda kwokunu.’ Apostolu amwihwili nawu: ‘Wunakukeña tuyi nakuyilandila mankendi?’ Fwilipu, wumu wahadi apostolu, wahosheli nindi: ‘Hela chakwila twadiña namali amavulu, hitwadi kutwesha kulanda mankendi akuda idi izazaku.’

Yesu wayihwili nindi: ‘Mudi nayakuda yishika hadihi?’ Anderi waakwili nindi: ‘Tukweti mankendi atanu ninshi janyanya jiyedi. Yikushikila wanyi.’ Yesu wahosheli nindi: ‘Nletelenu owu mankendi ninshi.’ Walejeli antu kushakama hamatahu mumazanvu-mumazanvu, imu 50, imu 100. Yesu wanoneli mankendi ninshi, watalili mwiwulu, nawa walombeli. Kuhiñahu wayinkeli apostolu yakuda, nawa wena enkeli antu. Amayala 5,000, ambanda nianyana ejima adiili nakwikuta. Kufumahu, apostolu anoneli yakuda yashalilihu kulonda yibuli kukisika nawa yenzeli mabasiketi 12! Ichi chuma chadiña chakuhayamisha chikupu!

Antu atiyili kuwaha nankashi chakwila akeñeleña kumwilisha Yesu ekali mwanta wawu. Ilaña Yesu welukili nindi iyi hidiyi mpinji yashimwiniyi Yehova yateleleli kwikalayi mwantaku. Dichi walejeli mazaza awantu nindi ayi nawa walejeli apostolu indi nindi ayi kwishinadi dikwawu daKaluñalwiji kaÑaliliya. Akandamini muwatu wawu nawa Yesu wayili kumpidi kwakankawindi. Muloñadi? Muloña wakeñeleña kwikala nampinji yakulomba kudi Tata yindi. Hela chakwila wadiña nanyidimu yayivulu, mpinji yejima Yesu wekalileña nampinji yakulomba.