Yuma Yitwadizilaña kuChihayamisha chaMankendi

1. Mankendi adiña alema ñahi kunyima?

MANKENDI diyakuda yadiileñawu nankashi antu amavulu kunyima. (Kutach. 14:18; Luka 4:4) Kafwampi, adiña alema chikupu chakwila Bayibolu mpinji jikwawu yatena yakuda yejima nawu “mankendi.” (Mat. 6:11) Mankendi cheñi diwu azatishiliyi Yesu muyihayamisha yindi yiyedi yaya mpuhu. (Mat. 16:9, 10) Nsañu yimu ayishimuna muYowanu kapetulu 6. Chitukuhanjekaña haniyi nsañu, tukumona yuma yitunateli kudizilaku makonu.

2. Chumanyi chamwekeni hakwila kukeñekeña yakuda yakwinka antu?

² Chelili apostolu aYesu afunti kufuma kwayiliwu nakushimwina, Yesu wayili nawu nawatu kwishinadi daKaluñalwiji kaÑaliliya nakunooka. (Maku 6:7, 30-32; Luka 9:10) Ayili kwiluña dakankawawu kuBeteseda. Hela chochu, hashimbwili wanyi, antu amavulu nankashi enjili nawa ayiwuñili. Yesu wayidiwili wanyi. Wadiña nampinji yakuyitañisha haWanta waNzambi nikuuka akata. Chikwayileña nakwiyila, atumbanji atachikili kwakamena awa antu ejima kukuwanawu yakuda yikudawu. Amakwawu hakachi kawu adiñahu nayakuda yantesha, ilaña amavulu ateleli kuya munyikala nakulanda yakuda yikudawu. (Mat. 14:15; Yow. 6:4, 5) Yesu welili ñahi?

CHIHAYAMISHA CHAKWILISHA MANKENDI

3. Yesu walejeli apostolu indi kwilila izaza dawantu yumanyi? (Talenu cheñi mwevulu hakava.)

³ Yesu wayilejeli apostolu indi nindi: “Hiyatela kuyaku; yowenenu yinkenu yakuda.” (Mat. 14:16) Iku kwadiña kukala kweneni, muloña kwadiña amayala kwakwihi na 5,000. Nawa kubombelaku ambanda nianyana, hadaha antu ashikili ku 15,000 ateleleli kudiishawu. (Mat. 14:21) Anderi wanyamukili nakuhosha nindi: “Kudi iwu kansi weyala wudi namankendi atanu abali niinshi janyanya jiyedi. Iyi yakuda diyi yikuwanina antu amavulu ñana?” (Yow. 6:9) Mankendi abali avulileña kuyiida kudi atuzweñi niantu amakwawu, nawa inshi janyanya jatela jadiña jakwanyika nawa jakushaku muñwa. Hohamu, iyi yakuda yadiña naniwu kansi yadiña yantesha nankashi kudiisha antu amavulu.

4. Yumanyi yitunateli kudizila kunsañu yekala haYowanu 6:11-13? (Talenu cheñi nyevulu.)

⁴ Yesu wakeñeleña kumwekeshela izaza chisambu, dichi wayilejeli antu kushakama mumazanvu hamatahu. (Maku 6:39, 40; tañenu Yowanu 6:11-13.) Twatañaña netu Yesu walombeli kulomba kwakusakilila kudi Tata yindi hamankendi niinshi. Chateleleli kumusakilila Nzambi, muloña Diyi wahanini yakuda. Chumichi chinakutwanukisha chitunateli kumwimbujola Yesu kuhitila mukulomba henohu kanda tudii, chili tudi nkawetu hela hadi antu amakwawu. Yesu wayilejeli nindi ahani yakuda nawa antu adiili nakwikuta. Kwashalili yakuda yikwawu, yabulili kukeñayi Yesu nindi yikisiki. Dichi wayilejeli nindi apompeshi yakuda yashalilihu, hadaha akayizatisha cheñi. Yesu welili chuma chachiwahi chitwatela kwimbujola neyi tunakukeña kuzatisha chiwahi yuma yitukweti. Neyi mudi nvwali, kwila mutaña iyi nsañu nawanyanenu nikuhanjeka hayuma yimunateli kudizilaku kutalisha hakulomba, chisambu nikwikala namuchima wakuhana nehi?

5. Antu elili ñahi nayuma yeliliyi Yesu hadina ifuku, nawa yena welili ñahi?

⁵ Antu atiyili kuwaha nanjila yatañishilileñamu Yesu niyihayamisha yakoñeliyi. Chineli elukili nawu Mosi washiikili nindi Nzambi wakayitondela kaprofwetu wadimena, atela adihwileña nawu, ‘Kwila Yesu diyi nehi?’ (Kuhit. 18:15-18) Neyi dichatoñojokeleñawu, atela amweneña nawu nateli kwikala nyuuli wamuwahi, hadaha wunateli kwinka muza wejima yakuda. Chafuminimu, izaza dakeñeleña “[kumukwata Yesu] kulonda amudiishi wanta.” (Yow. 6:14, 15) Neyi Yesu wetejeli kwila chumichi, wadi kudiñija munsañu jamapolitiki awaYudeya, ayuulileñawu kudi aRoma. Komana wetejeli? Inehi. Twatañaña netu Yesu ‘wafuminiku nakuya kumpidi.’ Hela chakwila amukanjikijileña kudi antu, hadiñijili mumapolitikiku. Tunakudizilaku chuma chalema!

6. Tunateli kumwekesha ñahi netu tunakumwimbujola Yesu? (Talenu cheñi mwevulu.)

⁶ Chakadi nikujina, antu hiyakutuleja nawu tuvulishi mankendi indi kwiji kuuka akata muchihayamisha; hela kutukanjikija nawu twiikali mwanta hela nyuuli wetuñaku. Ilaña anateli kutukanjikija nawu tudiñiji mumapolitiki kuhitila mukuvotela hela kukwasha muntu anakutoñojokawu nawu wukuwahisha yuma. Hela chochu, chuma cheliliyi Yesu chakuyamba wanyi. Wakaanini kudiñija munsañu jamapolitiki, nkumininaku wahosheli nindi: “Wanta wami wambadi yakanu kaayi wanyi.” (Yow. 17:14; 18:36) AkaKristu makonu elaña chiwahi kwimbujola yitoñojoka yaYesu niyuma yeliliyi. Twahakwilañaku, kuhana wunsahu nikulombelaku iwu Wanta. (Mat. 6:10) Tufuntenu cheñi kunsañu yaYesu yelishiliyi mankendi muchihayamisha nikumona yuma yikwawu yitunateli kudizilaku.

“MWATALISHILI MANKENDI AHANINIYI”

7. Chumanyi cheliliyi Yesu niapostolu? (Yowanu 6:16-20)

⁷ Hanyima yakwila Yesu nadiishi izaza, wayilejeli apostolu indi kufuma kunidi iluña nakuya kuKaperinamu nawatu nawa yena wayili kumpidi, wachiinineña izaza kumudiisha wanta. (Tañenu Yowanu 6:16-20.) Hampinji yayileñawu apostolu nawatu, kwenjili nvula yampepela, nawa yaleteli mankanda chikupu. Kuhiñahu, Yesu wenjili kwadiñawu iku nakwenda hamenji. Nawa wamulejeli kapostolu Petulu nindi niyena endi hamenji. (Mat. 14:22-31) Yesu chakandaminiyi muwatu, mpepela yalekeli. Chumichi chaletesheli atumbanji ahoshi nawu: “Chalala eyi wudi Mwana kaNzambi.”a (Mat. 14:33) Chatuhayamishaña hakumona nawu atumbanji enjili nakuhosha awa mazu hanyima yakwila Yesu nendi hamenji, bayi hanyima yakuvulisha mankendiku. Maku wabombelelihu iyi nsañu nindi: “[Apostolu] ahayamini nankashi nachumichi, muloña atiyishili wanyi mwatalishili mankendi ahaniniyi, ilaña atwalekelihu kujinoka munyichima yawu.” (Maku 6:50-52) Eña, akañenyi kwiluka ñovu yaYehova yamwinkeliyi Yesu kulonda akoñeña yihayamisha. Hela chochu, hashimbwili wanyi, Yesu wahosheli cheñi hachihayamisha chamankendi hakutudizisha chuma chikwawu.

8-9. Muloñadi izaza dawantu chidamulondeleli Yesu? (Yowanu 6:26, 27)

⁸ Izaza dadiishiliyi Yesu dashili muchima kuyuma yakumujimba niyafwilileñawu. Tuneluki ñahi? Hefuku dalondelelihu, amweni nawu Yesu niapostolu indi anayi. Dichi izaza dawantu dakandamini maatu amakwawu ashikili kufuma kuTiberasi nawa anyamukili nakuya kuKaperinamu nakumuwana Yesu. (Yow. 6:22-24) Komana amulondeleleña kulonda ayi nakudizilahu nsañu yikwawu kutalisha haWanta? Inehi. Ashili hohu maana hamankendi. Tuneluki ñahi?

⁹ Talenu chuma chamwekeni chelili izaza dawantu dimuwani Yesu kwakwihi naKaperinamu. Yesu wahosheli hatooka nindi afwilileña yuma yakumujimba yakapinji kantesha. Welukili nindi “[adiili] mankendi nakwikuta, . . . yakuda yakisikaña.” Ilaña wayikonkomweneni nindi azatileña “yakuda yashakamaña haya nyaaka.” (Tañenu Yowanu 6:26, 27.) Yesu wahosheli nindi Tata yindi wakayinka yakuda yamuchidiwu. Atela ahayamini chatiyiliwu nawu kudi yakuda yatwalaña kuwumi wahaya nyaaka! Yakuda yamuchidinyi yinateli kwila chuma chamuchidiwu, nawa antiyilili jaYesu adi kuyitambwila ñahi?

10. ‘Mudimwinyi waNzambi’ wateleleli kwilukawu antu?

¹⁰ Hadaha, ana aYudeya atoñojokeleña nawu kudi yuma yatela kwilawu hakwila atambwili yakuda yamuchidiwu. Atela atoñojokeleña ‘hanyidimu’ yashimwiniwu muNshimbi jaMosi. Hela chochu, Yesu wayilejeli nindi: “Mudimu waNzambi diweniwu, nawu mukuhweleli mudi owu atemesheliyi.” (Yow. 6:28, 29) Kukuhwelela ñimenu yaNzambi dichuma chitwatela kwila hakwila twakekali “[nawumi] wahaya nyaaka.” Kafwampi, Yesu wadiña wahoshahu dehi hachumichi. (Yow. 3:16-18, 36) Nawa kudi yuma yikwawu yahosheliyi kutalisha hachitunateli kwikala nawumi wahaya nyaaka.—Yow. 17:3.

11. AYudeya amwekesheli ñahi nawu ashili hohu muchima hakwikuta mankendi? (Isamu 78:24, 25)

¹¹ Ana aYudeya etejeli wanyi yuma yatañishileñayi Yesu “hamudimu waNzambi” wawuha. Amwihwili nawu: “Chinjikijilwinyi chiwukukoña kulonda tuchimoni mwaka dinu tukukuhweleli?” (Yow. 6:30) Ahosheli nawu ankakulula jawu mumafuku aMosi atambwilili manina, itunateli kwesekeja namankendi. (Nehe. 9:15; tañenu Isamu 78:24, 25.) Chakadi nikujina, atoñojokeleña hohu jakwikuta mankendi. Akañenyi nikumwihula Yesu kulonda ayileji mwatalishiliyi chahosheliyi “[hayakuda] yalala kufuma mwiwulu,” yadiña neyi manina ahanaña wumi kufuma mwiwulu. (Yow. 6:32) Ashili nankashi muchima kuyuma yakumujimba chakwila adiwili chalala chakuspiritu chayilejeleñayi Yesu. Yumanyi yitukudizila kuniyi nsañu?

CHUMA CHITWATELA KULEMESHA NANKASHI

12. Yesu wamwekesheli ñahi chuma chitwatela kulemesha muchihandilu?

¹² Ichi dichikuma chalema chitunakudiza chekala muYowanu kapetulu 6. Chuma chitwatela kulemesha nankashi hiyuma yakuspiritu. Anukenu Yesu wakolesheli ichi chikuma hampinji yakaanineñayi kweseka kwaSatana. (Mat. 4:3, 4) Nawa muMpanji yahaMpidi, wakonkomweneni antu nindi afwileña kudiza kulonda amwiluki Nzambi. (Mat. 5:3) Dichi, twatela kudihula etu aweni netu, ‘Komana chihandilu chami chamwekeshaña nawu nasha muchima kuyuma yakuspiritu kubadika kufwila yuma yakumujimba?’

13. (a) Muloñadi chitwadiluñishilaña yakuda? (b) Kusoñamishanyi kutwatela kushaku muchima? (1 AKorinda 10:6, 7, 11)

¹³ Chidi hohu chiwahi kulomba hayuma yakumujimba nikudiluñisha yumiyi. (Luka 11:3) Kuzata nañovu kwatukwashaña “kuda nikunwa,” kwaletaña muzañalu nawa “[kwafuma] kuchikasa chaNzambi walala.” (Mukwa. 2:24; 8:15; Yak. 1:17) Hela chochu, hitwatela kutwamijaku yuma yakumujimbaku. Kapostolu Pawulu wakonkomweneni hachumichi hayisonekeleliyi akaKristu ashakamineña kwakwihi nakukuma kwanshakaminu yawaYudeya. Washimwini yuma yayimwekeneni aIsarela kunyima, kushilahu niyuma yamwekeni kwakwihi naMpidi yaSinayi. Wayisoñamishili akaKristu kubula “kufwila yuma yatama neyi chayifwililiwu [aIsarela].” (Tañenu 1 AKorinda 10:6, 7, 11.) AIsarela afwilileña yakuda nankashi chakwila amweneña yakuda yayinkeleñayi Yehova muchihayamisha nawu “yuma yatama.” (Kuch. 11:4-6, 31-34) Nawa hampinji yadifukwileñawu kudi mwana kañombi wawuru, adiili, kunwa nawa adiluñishili. (Kwid. 32:4-6) Pawulu wazatishili chakutalilahu chawu kulonda asoñamishi akaKristu adiñaku henohu kukuma kwanshakaminu yawaYudeya kanda kushiki mu 70 C.E. Tunakushakama kwakwihi nakukuma kwanshakaminu yamakonu, dichi tukwila chiwahi kutiyilila chikupu kukufumba kwaPawulu.

14. Kutalisha hayakuda, yumanyi yitunakutalila mwituña dadiha?

¹⁴ Chahosheleñayi “[hakutwinka] yakuda yetu yefuku dalelu,” Yesu wateneni mpinji yakela nkeñelu yaNzambi akayili “hamaseki neyi chayilañawu mwiwulu.” (Mat. 6:9-11) Chumichi chinakuyanukishadi? Bayibolu yamwekeshaña nawu yuma yafwilañayi Nzambi kwila hamaseki mwabombela niyakuda yayiwahi. Kwesekeja naIsaya 25:6-8, kwakekala yakuda yayivulu yayiwahi yitwakadiluñishaña muWanta waYehova. Isamu 72:16 yahosha nawu: “Hamaseki hakekala mbutu jajivulu chikupu; jakavula nankashi hewulu damapidi.” Komana mwatalilaña wanyi kulonda mwakazatishi iji mbutu kutuñilamu mankendi imwakeñesha hela kudiza njila jajiha jakutuñilamu? Kubombelahu, mwakadiluñishaña nyikaabu yamumatempa anyivinyu yimwadimini. (Isa. 65:21, 22) Nawa himwakekala nkawenuku.

15. Progiramu yamuchidinyi yakudizisha yakekalaku neyi antu anayisañuli dehi? (Yowanu 6:35)

¹⁵ Tañenu Yowanu 6:35. Chumanyi chakayimwekena antu adiili mankendi niinshi javulishiliyi Yesu? Neyi anayisañuli, hadaha amakwawu mwakadibulakana nawu. Hela chakwila kunyima hiyamwekesheli chikuhweleluku, hadaha akayisañula. (Yow. 5:28, 29) Antu amuchidawa akeluka mwatalishili mazu aYesu akwila nawu: “Yami yakuda yawumi. Wejima wukwinza kudi ami, hakatiya cheñi nzalaku.” Akakeñekaña kukuhwelela mwifutu danyiloña daYesu, nakukuhwelela nawu wahanini wumi windi kukoola wena. Hayina mpinji, kwakekala progiramu yakuspiritu yakudizisha antu akasañuka nianyana akavwalika hayina mpinji. Wenowu muzañalu wutwakekala nawu hakuzataku iwu mudimu wakudizisha! Kwila mwenimu kwakayizañaleshaña nankashi kubadika yakuda yakumujimba. Eña, yuma yakuspiritu diyakekala yalema nankashi.

16. Yumanyi yitwakahanjekahu muchibaaba chinalondelihu?

¹⁶ Tunahanjeki nsañu yantesha hansañu yekala muYowanu kapetulu 6, ilaña Yesu watañishili yuma yayivulu kutalisha “[hawumi] wahaya nyaaka.” Iyi nsañu yayikundamini ana aYudeya nawa yinatukundami ninetu. Twakatwalekahu kuhanjeka hansañu yidi muYowanu kapetulu 6 muchibaaba chinalondelihu.