Kwitiya kwawakaKristu Kunataandi kuNyuza Yayivulu

Apostolu ovwahilili lushimbi lwaYesu lwakutaandisha nsañu yayiwahi mwahita iseki dejima. Muchaaka cha 47 C.E., amanakwetu muAntiyoki atemesheli aPawulu naBaranaba halwendu lwakushimwina. Awa akakushimwina ayedi adikita ahitañeni muAsia Minor mwejima kumaluña adi neyi Deribi, Lisitira niIkoniyumu.

APawulu naBaranaba ashimwinineña antu ejima, chili waheta hela kazweñi, kansi hela mukulumpi. Antu amavulu etejeleña chalala chahosha hadi Kristu. APawulu naBaranaba chamushimwininiwu Seriji Pawulosi, nguvulu wakuKipirosi, katepa watachikili kuyikañesha. Pawulu wamulejeli iwu katepa nindi: ‘Yehova nakukubabesha.’ Hohenohu, katepa wapuutili mesu. Nguvulu Pawulosi chamweniyi chuma chamwekeni, wetiyili.

APawulu naBaranaba ashimwinineña kwejima, kwitala niitala, kumamaketi, munyikwakwa nimumasinagogi. Chokiliwu iyala wadiña chifwayi muLisitira, antu amweni ichi chihayamisha atoñojokeli nawu hiyanzambi nawa akeñeleña kudifukula kudi wena. Ilaña aPawulu naBaranaba ayilekesheli, nakuyileja nawu: ‘Mwatela kudifukula kudi Nzambi hohu! Ninetu tudi hohu antu.’ Kuhiñahu kudi aYudeya enjili nakusañumuna izaza dawantu kulonda dimwimakeni Pawulu. Idi izaza damwasili malola, damukokeleli hanji yamusumba nawa damushiyili kwakwihi nakufwa. Hela chochu, Pawulu hafwiliku! Hohenohu, amanakwetu enjili nakumwamwina nawa amufuntishili mumusumba. Chimwahitili mpinji, Pawulu wafuntili kuAntiyoki.

Muchaaka cha 49  C.E., Pawulu wayili halwendu lukwawu lwakushimwina. Chafuntiliyi nakumona amanakwetu muAsia Minor, washimwinini nsañu yayiwahi nikumaluña amakwawu amuEurope. Wayili nakushimwina kuAtenisi, kuEfwesesa, kuFwilipi, kuTesalonika nikumaluña amakwawu. Silasi, Luka, nikansi Timotewu ayili hamu naPawulu halwendu lwindi. Azatilili hamu kutuña yipompelu nawa ayikwashili kwikala yakola. Pawulu washakamini muKorinda hadi chaaka chimu nachikunku, nakukolesha amanakwetu kwenoku. Washimwinineña, kutañisha nikusonekela yipompelu yayivulu nyikanda. Wazatileña nimudimu wakuchima matenti. Chimwahitili mpinji, Pawulu wafuntili kuAntiyoki.

Muchaaka cha 52 C.E., Pawulu wayili halwendu lwamuchisatu lwakushimwina, watachikilili muAsia Minor. Wahitañeni nakushika kukabeta kakuchimunswa kaFwilipi, kuhiñahu wakunkumukilili kuKorinda. Pawulu washakamini yaaka yayivulu muEfwesesa, nakutañisha, kuuka akata nikukwasha chipompelu. Wahanineña nimpanji jawantu amavulu hefuku-hefuku mukapeka keneni kashikola. Antu amavulu atiyilileña chadizishileñayi nawa ahimpileña yilwilu yawu. Nkumininaku, Pawulu chelili nashimwini dehi nsañu yayiwahi mumatuña amavulu, wayili kuYerusalema.