Zañalalenu Namudimu Wenu

1-3. (a) Antu amavulu atiyaña ñahi nanyidimu yazatañawu? (b) Mwalwihwinyi itukuhanjekahu mukanu kapetulu?

ANTU mukaayi kejima azataña nañovu kulonda adikwasheña aweni niyisaka yawu. Amavulu nyidimu yazatañawu ayikeña wanyi, amakwawu akeñaña nikuya kumudimu wanyi. Neyi dichimwatoñojokaña, chumanyi chimukwila kulonda muzañalaleña namudimu wumwazataña? Yumanyi yikuletesha mukeñi mudimu wenu?

² Yehova watulejaña nindi: ‘Muntu wejima watela kuda nikunwa kulonda yazañalali nanyidimu yindi yejima yinakudikitayi. Hichawaana chakudi Nzambi.’ (Mukwakutañisha 3:13) Yehova watuleñeli namuchima wakukeña kuzata. Wakeñaña nindi tuzañalaleña nayuma yitwelaña.—Tañenu Mukwakutañisha 2:24; 5:18.

³ Yumanyi yikutukwasha kuzañalala nanyidimu yetu? Nyidimwinyi yatela kubula kwiñilayi mukwaKristu? Tukwila ñahi kulonda tubuleña kusha muchima hamudimu hohu ilaña tusheña muchima nihakumuzatila Yehova? Nawa mudimwinyi wasweja kulema wutwatela kuzata?

YEHOVA NIYESU ADIKITA CHIKUPU

4, 5. Yehova wamonaña ñahi kuzata?

⁴ Yehova yomweni wakeña kuzata. Kutachika 1:1 yahosha nawu: “Hakutachika Nzambi waleñeli mawulu niiseki.” Chamanishiliyi Nzambi kuleña iseki niyuma yejima yekalahu, wahosheli nindi yuma yaleñeliyi “yinawahi chikupu.” (Kutachika 1:31) Nleñi yetu wazañaleli nayuma yaleñeliyi.—1 Timotewu 1:11.

⁵ Yehova halekaña kuzataku. Yesu nindi: “Tata yami wuchidi kuzata kushika niyinu mpinji.” (Yowanu 5:17) Hela chakwila tuneluki wanyi yuma yayiwahi yejima yinakwilayi Yehova, yuma yikwawu dinu tunayiluki. Wasakulaña antu akayuulaña hamu naMwanindi, Yesu Kristu, muWanta. (2 Akorinda 5:17) Yehova cheñi nakulombola chikupu antu nikuyakamena. Hamuloña wamudimu wunakushimwinawu mukaayi kejima, antu amavulu anakumwiluka Yehova nawa adi nakuchiñeja kwakushakama haya nyaaka muparadisa heseki.—Yowanu 6:44; Aroma 6:23.

6, 7. Yesu wadiña mukwakuzata wamuchidinyi?

⁶ Yesu niyena wakeña kuzata neyi Tata yindi. Henohu kanda yenzi heseki, Yesu wadiña ‘mukalawenu’ waNzambi wamukwashiliku kuleña yuma yejima yamwiwulu niyahamaseki. (Yishimu 8:22-31; Akolosi 1:15-17) Chadiñayi heseki, watwalekelihu kuzata nañovu. Hadiñayi kansi, welukili nankashi kusoña, hadaha chakusoña yitwamu nikutuña matala. Yesu wawilukili iwu mudimu chakwila amwilukili nawu “mukwakusoña.”—Maku 6:3.

⁷ Ilaña mudimu walemesheliyi Yesu hanu heseki wadiña wakushimwina nsañu yayiwahi nikudizisha antu kulonda amwiluki Yehova. Wadiña nayaaka yisatu nachikunku yakumanishilamu mudimu windi wakushimwina, dichi wadikitileña kufuma budidi kushika niwufuku. (Luka 21:37, 38; Yowanu 3:2) Yesu wendeleña maluña amalehi munyikwakwa yalunkuñu nakushimwina nsañu yayiwahi kudi antu amavulu.—Luka 8:1.

8, 9. Muloñadi Yesu chakeñeleliyi mudimu wazatileñayi?

⁸ Yesu wamweneña kuzata mudimu waNzambi neyi yakuda. Iwu mudimu wamwinkeleña ñovu. Mpinji yikwawu Yesu wadiña nakudikita chikupu chakwila wakañenyeña nikuda. (Yowanu 4:31-38) Wazatileña mpinji yejima kulonda yakwashi antu amwiluki Tata yindi. Dichahosheleliyi kudi Yehova nindi: “Nakulemeshi hamaseki, chinnamanishi mudimu wuwanyinkeli kuzata.”—Yowanu 17:4.

⁹ Mwamweni, Yehova niYesu azataña nañovu nawa azañalalaña munyidimu yazatañawu. Tunakukeña kwikala “akwakwimbujola Nzambi,” nawa tunakukeña ‘kumulondela Yesu chikupu muntampu jindi.’ (Aefwesesa 5:1; 1 Petulu 2:21) Dichitwazatilaña nañovu muyuma yejima yitwelaña.

MUDIMU WUTWAZATAÑA TWAWUMONAÑA ÑAHI?

10, 11. Chumanyi chikutukwasha kumona mudimu wetu netu wawuwahi?

¹⁰ Hakwikala antu jaYehova, twazataña nañovu kulonda tudikwasheña etu aweni nichisaka chetu. Twafwilaña kukeña nyidimu yitwazataña, ilaña ichi chinateli kukala. Yumanyi yitwatela kwila neyi mudimu wetu hiwunakutuzañaleshaku?

¹¹ Monenuña mudimu wenu nenu wawuwahi. Hadaha hitunateli kutwesha kuhimpa kutwazatilaña hela chitwazatañaku, ilaña tunateli kuhimpa yilwilu yetu. Neyi twiluka yuma yakeñañayi Yehova nindi twileña chikutukwasha. Chakutalilahu: Yehova wakeñaña nindi mutu wachisaka yazateña nañovu kulonda yakameneña chisaka. Bayibolu nayu muntu wakañanyaña kwinka amuchisaka chindi yuma yakeñekaña “watama kubadika muntu wabula kukuhwelela.” (1 Timotewu 5:8) Neyi mudi mutu wachisaka, mwazataña nañovu kukeñela amuchisaka chenu yuma yakeñekaña. Hela mudimu wenu mwawukeña hela nehi, mwatela kwiluka nenu mwamuzañaleshaña Yehova neyi munakukeñela chisaka yuma yinakukeñawu.

12. Indi kuzata nañovu nikashinshi jatukwashaña ñahi?

¹² Ikalenu adikita nawa ashinshika. Iyi yuma yikuyikwasha kukeña mudimu wenu. (Yishimu 12:24; 22:29) Chikufumamu, akuyikuhwelela kudi wayiñija mudimu. Akulumpi janyidimu akeña ankoñi ashinshika muloña hiyakwiya mali, yuma, hela mpinjiku. (Aefwesesa 4:28) Chasweja dinu kulema, Yehova welukaña neyi mwadikita nawa mwashinshika. Mukwikala nachinleji “chamuchima chitooka” muloña muneluki nenu munakumuzañalesha Nzambi imwakeña.—Aheberu 13:18; Akolosi 3:22-24.

13. Chumanyi chikwawu chikufumamu neyi tunakuzata nakashinshi hamudimu?

¹³ Ilukenu nenu yilwilu yimwamwekeshaña hamudimu yinateli kumulemesha Yehova. Ichi hichuma chikwawu chikuletesha tukeñi mudimu wetu. (Titusa 2:9, 10) Yinateli nikukokola muntu imwazataña nindi kutachika kudiza Bayibolu muloña wayilwilu yenu.—Tañenu Yishimu 27:11; 1 Petulu 2:12.

MUDIMWINYI WUNATELA KUZATA?

14-16. Yumanyi yimwatela kutoñojokahu neyi himukukeña mudimu?

¹⁴ Bayibolu hiyatanjika nyitapu yanyidimu yatela kuzata hela kubula kuzatayi mukwaKristuku. Ilaña yashimuna yishina yinateli kutukwasha neyi hitukukeña mudimu wutwatela kuzata. (Yishimu 2:6) Hampinji yitunakuzatisha yishina yamuBayibolu, tunateli kudihula awa malwihu.

¹⁵ Komana iwu mudimu wukuletesha nileña yuma yakaanishayi Yehova? Tuneluki yuma yahelayi Yehova, yidi neyi kwiya nikutwamba. (Kwidika 20:4; Yilwilu 15:29; Aefwesesa 4:28; Chimwekeshu 21:8) Dichi twatondolwelaña nyidimu yikutuletesha tufumpi nshimbi jaYehova.—Tañenu 1 Yowanu 5:3.

¹⁶ Komana iwu mudimu wetejaña hela kwila yuma yahelayi Yehova? Chakutalilahu, mukwila ñahi neyi muwana mudimu wakutambwila antu hachipatela chafumishaña mavumu? Mudimu wakutambwila antu watama wanyi. Ilaña mweluka yitoñojoka yaYehova kutalisha hakufumisha ivumu. Hela chakwila hiyenu mukufumishaña mavumu awantuku, komana mukwikala namuloña wanyi kwesekeja nachamonañayi Yehova?—Kwidika 21:22-24.

17. Yumanyi yinateli kutukwasha kufuukula yuma yikumuzañalesha Nzambi?

¹⁷ Neyi tuzatishaña yishina yaNzambi, tukwikala neyi antu atenawu haAheberu 5:14, “afumba ñovu jawu jakutoñojoka chiwahi jakwaambula yuma yayiwahi nayatama.” Dihulenu nenu: ‘Komana antu amakwawu akuhukana neyi niñila iwu mudimu? Komana iwu mudimu wukunletesha kuya kwituña dacheñi nakushiya mwinikwami nianyanami? Chumanyi chikuyimwekena neyi niyishiya?’

“ILUKENU YUMA YALEMA NANKASHI”

18. Chinateli kwikala ñahi chakala mpinji yikwawu kusambila kutwamijaku kudifukula kwetu?

¹⁸ Chinateli kutukalila kusambila kutwamijaku kudifukula kudi Yehova munanu mafuku “akukuminina [mudi] mpinji jakala.” (2 Timotewu 3:1) Kuwana mudimu nikuwuhemba hichuma chinateli kukala. Twatela kwakamenaña chisaka chetu, ilaña tweluka netu twatela kusambila kutwamijaku kudifukula kwetu. Hitwatela kutwamijañaku yuma yakumujimba muchihandilu chetuku. (1 Timotewu 6:9, 10) Hanu dinu tunateli kwiluka ñahi “yuma yalema nankashi” hampinji yoyimu nikwakamena chisaka?—Afwilipi 1:10.

19. Kumukuhwelela Yehova kwatukwashaña ñahi kuzata mudimu wetu nakwesekeja?

¹⁹ Mukuhwelelenu Yehova chikupu. (Tañenu Yishimu 3:5, 6) Tweluka cheñi netu Nzambi weluka yuma yitwakeñaña nawa watwakamenaña chikupu. (Masamu 37:25; 1 Petulu 5:7) Izu dindi datulejaña nawu: “Chihandilu chenu chiikali chakadi kusweja kukeña mali, iku munakuzañalala nayuma yimudi nayu. Muloña [Nzambi] wahosha nindi: ‘Hinamba kakushiya hela kukufutalelaku.’” (Aheberu 13:5) Yehova hakeñaña nindi mpinji yejima tutoñojokeña hajakwakamena chisakaku. Nawa mpinji yejima wamwekeshaña nindi wukuyinkaña antu jindi yuma yakeñañawu. (Matewu 6:25-32) Hela chakwila mudimu wetu wamuchidinyi, twadizaña Izu daNzambi, kushimwina nsañu yayiwahi nikuya kukupompa kwanetu akwaKristu mpinji yejima.—Matewu 24:14; Aheberu 10:24, 25.

20. Tunateli kupeleshaku ñahi chihandilu chetu?

²⁰ Disu denu ditaleña mumu hohu. (Tañenu Matewu 6:22, 23) Chumichi chinayi mukwila nawu peleshenuku chihandilu chenu kulonda mumukalakeleña Yehova. Tweluka netu hiwusupi neyi tusweja kulemesha mali, yakuvwala hela yozelu yayiha kubadika wubwambu wetu naNzambi. Hanu dinu, yumanyi yikutukwasha kusambila kutwamijaku yuma yalema? Twatela kuzata nañovu kulonda tubuli nyikudi. Neyi mudi namukudi, zatilenuhu swayi kulonda mufwetiku hela muwumanishi. Neyi kubabala nehi, yuma yakumujimba yinateli kutumanishilaña mpinji niñovu nawa chikufumamu tukuleka kulomba, kudiza nikushimwina. Chatela yuma yakumujimba yiluwañeshi chihandilu chetu, twatela kumona yuma yitukweti yidi neyi “yakuda niyakuvwala” netu yinashikili. (1 Timotewu 6:8) Nawa hichikweti muloña nachidi yumaku, twatela kudishinshikaña mpinji yejima kulonda tumoni chitunateli kumukalakelaña Yehova chikupu.

21. Muloñadi chitwatela kutondahu yuma yitwatela kusambila kulemesha muchihandilu chetu?

²¹ Twamijenuñaku yuma yatelela. Twatela kuzatishaña chiwahi mpinji yetu, ñovu niyuma yitukweti. Neyi kubabala nehi, yuma yabula kulema yidi neyi shikola hela mali, yikutusendelaña mpinji yeneni. Yesu wahosheli nindi: “Twalekenuhu kusambila kukeña Wanta.” (Matewu 6:33) Yuma yitwatondaña, yilwilu yetu, yuma yitwelaña mafuku ejima niyuma yitwafwilaña kwila kumbidi, yamwekeshaña yuma yalemesha muchima wetu.

MUDIMU WALEMA WUTWAZATAÑA

22, 23. (a) Mudimwinyi wasweja kulema wutukweti etu akwaKristu? (b) Yumanyi yinateli kutukwasha kuzañalala namudimu wetu?

²² Mudimu walema wutukweti hikumukalakela Yehova nikushimwina antu nsañu yayiwahi. (Matewu 24:14; 28:19, 20) Kufwana Yesu, ninetu tunakukeña kuzata nañovu muniwu mudimu. Amakwawu anayi nakuzatila kudi kukaankila. Amakwawu anakudiza idimi dacheñi kulonda ashimwineña antu ahoshaña odu idimi. Hanjekenu nawantu elahu iyi yuma nawa muyihujoli haniyi nsañu. Akuyileja nawu anekali namuzañalu chikupu nawa yuma muchihandilu chawu yinawahi.—Tañenu Yishimu 10:22.

²³ Etu amakwawu, tunakumanishaña mpinji yeneni kumudimu ninyidimu yikwawu kulonda tukeñeli yisaka yetu yuma yakeñekaña. Yehova weluka chumichi, nawa wasakililaña chitwazataña nañovu kulonda twakameneña chisaka chetu. Dichi wejima wetu tutwalekihu kumwimbujola Yehova niYesu, tuzateña nañovu hichikweti muloña namudimu wutwazatañaku. Nawa mpinji yejima twanukeña netu mudimu wasweja kulema wutukweti hikumukalakela Yehova nikushimwina nsañu yayiwahi yaWanta waNzambi. Dichuma chikatuletela muzañalu waweni.